جۋىردا نۇر-سۇلتان قالاسى سۋرەتشىلەر وداعى عيماراتىندا (اباي داڭعىلى, 19) بەلگىلى قىلقالام شەبەرى, ديزاينەر, ۇستاز باقىتنۇر بۇردەسبەكوۆتىڭ كارتينالارىن ساتۋ كورمەسى اشىلدى. سۋرەتشى ىندەت جۇقتىرىپ, قازىر اۋىر جاعدايدا يۆل اپپاراتى استىندا جاتىر. اتالمىش كورمە ونى قولداۋ ماقساتىندا ۇيىمداستىرىلدى.
باقىتنۇر بۇردەسبەكوۆ – ن. گوگول اتىنداعى الماتى كوركەمسۋرەت ۋچيليششەسى مەن ۆ. مۋحينا اتىنداعى لەنينگراد جوعارى كوركەم-ونەركاسىپ ۋچيليششەسىنىڭ تۇلەگى. ەڭبەك جولىن قاراعاندىنىڭ شىعارماشىلىق وداقتارى مەن وقۋ ورىندارىنان باستادى. ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «ديزاين» كافەدراسىندا اعا وقىتۋشى بولىپ, ەلوردانىڭ سۋرەتشىلەر ۇيىندە جۇمىس ىستەدى. باس قالامىزدىڭ كوركەم عيماراتتارىنىڭ بەزەندىرىلۋىنە ۇلكەن ۇلەسىن قوستى. اتاپ ايتقاندا, «دۋمان» ويىن-ساۋىق ورتالىعىن, اقمولاداعى ساياسي قۋعىن-سۇرگىن جانە توتاليتاريزم قۇرباندارىنىڭ «الجير» مەموريالدى مۇراجاي-كەشەنىن كوركەمدەۋگە قاتىستى.
ونىڭ تۋىندىلارى انگليا, فرانتسيا, يتاليا, يسپانيا, جاپونيا, باە, قىتاي, اقش, كيپر, رەسەي مەملەكەتتەرىندەگى ءىرى كورمەلەرگە قويىلدى. قىلقالام شەبەرىنىڭ تۋىندىلارى قاراپايىمدىلىعىمەن ەرەكشەلەنەدى. ساتۋ كورمەسىن ۇيىمداستىرعان نۇر-سۇلتان قالاسى سۋرەتشىلەر وداعى باقىتنۇر بايقانۇلىنىڭ اۋىر ىندەتتەن جازىلىپ, ورتالارىنا تەزىرەك ورالۋىن تىلەيدى.
