«ەلوردادا اكادەميك ن.ج.باتپەنوۆ اتىنداعى ۇعتوو دارىگەرلەرى 64 جاستاعى ناۋقاستىڭ تىزە بۋىندارىنا ەندوپروتەز ورناتىپ, 20 جىلدان بەرى مازالاعان سىرقاتىنان قۇتقاردى. قۇنى شامامەن ءبىر ميلليون تەڭگەدەن اساتىن بۇل وتا پاتسيەنتكە ءمامس جۇيەسىندە تەگىن جاسالدى» دەپ حابارلايدى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالىنىڭ ءباسپاسوز قىزمەتى.
شىعىس قازاقستان وبلىسى جارما اۋدانى اۋەزوۆ اۋىلىنىڭ 64 جاستاعى تۇرعىنى كۇلىمحان قوناەۆانىڭ تىزە بۋىنى سىرقاتتانعانىنا 20 جىل بولدى. ول كەزدە جاس, كۇش-قۋاتى مول بولعان سوڭ اۋرۋعا كوپ ءمان بەرمەگەن. ءۇي شارۋاشىلىعىمەن, باۋ-باقشامەن اينالىسىپ, تىنىم تاپپايتىن.
«مەن ءبىر ورىندا وتىرمايتىنمىن, ۇنەمى قوزعالىستا بولدىم. تىزەدەگى اۋىرسىنۋ ءبىر كۇشەيىپ, ءبىر باسىلاتىن. سوندىقتان بولار, دارىگەرگە بارۋعا اسىقپادىم. جىلدار وتە تىزە كوبىرەك اۋىرا باستادى, سوڭعى 5-6 جىلدا سول جاق تىزەم ءتىپتى بۇگىلمەي قالدى. 2018 جىلى دارىگەرلەر وتا جاساۋ قاجەت ەكەنىن ايتىپ, پورتالعا قويدى. بىراق ويلانىپ-ويلانىپ, جۇرەكسىنىپ ءجۇردىم. قازاقشا ايتقاندا, «پىشاققا تۇسۋگە» قاتتى قورىقتىم جانە سوڭعى ساتتە وتادان باس تارتتىم» دەپ ەسىنە الادى ناۋقاس.
جۇرە كەلە اياقتىڭ, تىزەنىڭ اۋىرۋى جانعا باتا باستادى. كۇلiمحان قۇرمانعاليقىزىنا تاياقپەن جۇرۋگە تۋرا كەلدi, ال كولiكپەن ءجۇرۋ ول ءۇشiن ءتىپتى ۇلكەن سىناققا اينالدى.
«اياعىم قاقساپ, جانعا باتىپ, مازا بەرمەدى. ءبىر ورىندا تۇرىپ, ۇزاق جۇرە المادىم, وتىرعان جەرىمنەن تۇرۋ قيىن بولدى. ونىڭ ۇستىنە 93 كەلى سالماعىم بار, قوزعالۋىم ءتىپتى كۇردەلەنە ءتۇستى. مەنىڭ بۇل جاعدايىمدى كورگەن بالالارىم وتا جاساتۋعا كوندىردى. ولاردىڭ بارلىعى ەلوردادا تۇرادى. مۇندا ءمامس بويىنشا تىزەگە تەگىن وتا جاسايتىن عىلىمي ورتالىق بارىن ايتتى. ەندى, مىنە, جارتى جىلدان كەيىن مەن وسى كەرەمەت دارىگەرلەردىڭ قولىنا ءتۇستىم. وپەراتسياعا كەلىسىم بەرگەنىمە وكىنبەيمىن, بۇرىن كومەك سۇراماعانىما, سونشا جىل قينالعانىما وكىنەمىن» دەپ قوستى ناۋقاس.
№7 ورتوپەديا بولىمشەسىنىڭ ەمدەۋشى دارىگەرى جاندوس قالەلوۆتىڭ ايتۋىنشا, ناۋقاستا 3-دارەجەلى ەكى جاقتى دەفورماتسيالىق گونارتروز.
«بۇل اۋرۋ كەزىندە جىلىنشىك پەن سان سۇيەگىنىڭ ءبىر بولىگىن جاباتىن شەمىرشەك تىندەرى زارداپ شەگەدى. اۋىر سالماققا, كوپ جۇكتەمەلەرگە بايلانىستى اۋرۋ دامي بەرەدى, ناتيجەسىندە بۋىن بىرتە-بىرتە بۇزىلىپ, سۇيەكتىڭ زاقىمدانۋى, ونىڭ كەيىنگى پاتولوگيالىق ءوسۋى مەن تىعىزدالۋى بايقالادى. جاياۋ جۇرگەندە قاتتى اۋىرسىنىپ, بۋىنداردا سۇيىقتىق جينالادى, ال كەيىنگى كەزەڭدەردە اياققا تۇرۋ ءتىپتى مۇمكىن بولماي قالادى» دەيدى دارىگەر.
كۇلىمحان قۇرمانعاليقىزىنىڭ سول جاق تىزە بۋىنىنا ەندوپروتەز ورناتىلدى. وپەراتسيادان كەيىن ءبىر اپتادان كەيىن, اۋرۋحانادان شىقتى. ال بىرنەشە وڭالتۋ كۋرستارىنان كەيىن بۇرىنعىشا قالىپتى ەركىن قوزعالاتىن بولادى.
ءمامس جۇيەسىندە مەديتسينالىق كومەك الۋ تۋرالى, ساقتاندىرۋ مارتەبەسى تۋرالى, جارنا اۋدارىمدارى, نەمەسە باسقا دا سۇراقتار تۋىنداعان جاعدايدا قوردىڭ ەلوردالىق فيليالىنا 1406 بايلانىس ورتالىعى نەمەسە Qoldau 24/7 ءموبيلدى قوسىمشاسى, Telegram-داعى SaqtandyryBot, قوردىڭ fms.kz سايتى ارقىلى حابارلاسۋعا بولادى.
«الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالىنىڭ ءباسپاسوز قىزمەتى
