قىتاي مەن اۆسترياعا پاۆيلون بەرىلدى
كەشە ەكسپو اۋماعىندا ورنالاسقان قىتاي جانە اۆستريا ەلدەرىنىڭ پاۆيلوندارى قاتىسۋشى دەلەگاتتارعا تاپسىرىلدى.
بىلتىر 30 قازاندا حالىقارالىق پاۆيلونداردىڭ قۇرىلىسى تولىق اياقتالعان بولاتىن. قازىرگى تاڭدا كورمەگە قاتىسۋعا نيەت بىلدىرگەن 115 مەملەكەتتىڭ 103-ىنە پاۆيلوندارى تابىستالدى. ال قالعان 12 پاۆيلون وسى ايدىڭ سوڭىنا دەيىن بەرىلمەك.
قىتاي پاۆيلونىنىڭ كونسترۋكتسيالىق توپ باسشىسى دجە دجيەنىڭ ايتۋىنشا, كۇنشىعىس ەلى ءۇشىن استانادا وتەتىن «ەكسپو» كورمەسىنە قاتىسۋ اسا ماڭىزدى.
– ءبىز 1000,27 شارشى مەتر اۋداندى قۇرايتىن پاۆيلوندى سۇراپ الدىق. پاۆيلوننىڭ باستى تاقىرىبى – «بولاشاق ەنەرگياسى. جاسىل جىبەك جولى». دەمەك, ءداستۇرلى ەنەرگيا كوزدەرىن جاڭعىرمالى ەنەرگيا كوزدەرىنە اۋىستىرۋ, قورشاعان ورتانى قورعاۋ سياقتى ماڭىزدى ماسەلەلەردى العا تارتقىمىز كەلەدى. كورمەگە جاڭا ەنەرگيا سالاسىندا قىزمەت ەتەتىن قىتايلىق ون كاسىپكەر شاقىرىلدى. سونداي-اق, ەلىمىزدىڭ 25 قالاسىنداعى ءتۇرلى سالاداعى بيزنەسمەندەر استاناعا ات باسىن بۇرادى. ءبىز تاۋارلاردان گورى ەلەكتر قۋاتى مەن يادرولىق ەنەرگيا سالاسىنداعى جاڭا تەحنولوگيالاردى كورسەتكىمىز كەلەدى, – دەدى ول.
ەلىمىزدەگى اۆستريانىڭ ءتوتەنشە جانە وكىلەتتى ەلشىسى گەرحارد سايللەر جۋرناليستەردىڭ ساۋالىنا جاۋاپ بەرە وتىرىپ, اۆستريانىڭ پاۆيلونى قانداي بولاتىنىن بايانداپ بەردى. «كونسترۋكتسيا بولاتتان جاسالعان ءۇش بولىكتەن تۇراتىن بولادى. ولار پاۆيلونىمىزدىڭ «With brain, heart and muscle power» (اقىلمەن, جۇرەكپەن جانە كۇش-قايراتپەن) اتتى تۇجىرىمداماسىنا سايكەس كەلەدى. جاڭا ەنەرگيانىڭ ءمۇمكىندىكتەرىن تاماشالاي الاتىن ارنايى ورىن ازىرلەيمىز. كورمەگە كەلۋشىلەر ءۇشىن دەمالۋعا ارنالعان لاۋندج بار جۇمىس ىستەپ تۇرادى. سونداي-اق, اۆسترياعا قىزىعۋشىلىق تانىتقاندار بارلىق مالىمەتتى ءدال سول جەردە الا الاتىن بولادى. پاۆيلوننىڭ بيۋدجەتى 5 ملن ەۋرونى قۇرايدى. ال ونىڭ اۋدانى 866 شارشى مەتردى الىپ جاتىر. اۆستريا پاۆيلونى مادەني ءىس-شارالارعا دا جەتە كوڭىل بولەدى» دەپ ءسوزىن اياقتادى ەلشى.
ايتا كەتەيىك, پاۆيلونداردى بەزەندىرۋ جۇمىستارى مامىر ايىنىڭ ورتاسىنا دەيىن اياقتالۋى ءتيىس.
گۇلدانا تالعاتقىزى