ەلوردا اكىمدىگىندە استانا قالاسى ءماسليحاتىنىڭ دەپۋتاتتارى قىتاي حالىقتىق ساياسي كونسۋلتاتيۆتىك كەڭەسىنىڭ شەنيان قالالىق كوميتەتىنىڭ وكىلدەرىمەن كەزدەستى.
استانا قالالىق ءماسليحات حاتشىسى جانات نۇرپەيىسوۆتىڭ ايتۋىنشا, قازاق-قىتايدىڭ ەكىجاقتى قارىم-قاتىناسى سوڭعى جىلدارى دامىپ كەلە جاتىر. سونداي-اق, ول قىتاي حالىق رەسپۋبليكاسى قازاقستاننىڭ ەڭ باستى سەرىكتەسى بولىپ وتىرعانىن اتاپ ءوتتى.
– قازاق ەلىنىڭ جاس استاناسى اسا جىلدامدىقپەن دامىپ جاتىر. سوندىقتان دا ءبىز ءۇشىن وزگە مەملەكەتتىڭ مەگاپوليس قالاسىمەن دوستىق بايلانىستا بولۋ وتە ماڭىزدى. ماسەلەن, استانا قىتايدىڭ بەيجىڭ جانە ءۇرىمجى قالاسىمەن تىعىز ارىپتەستىك ورناتقان. ەكسپو-2017 حالىقارالىق كورمەسىنىڭ ارقاسىندا استانا قارجىلىق, ينۆەستيتسيالىق جانە تۋريستىك الەۋەتىن ارتتىرۋعا مۇمكىندىك الدى, – دەدى ول.
ال ءوز سوزىندە شەنيان قالالىق كوميتەتىنىڭ توراعاسى تسزيان حۋن استانالىق ءارىپتەستەرىنە العىس ايتتى. سونداي-اق, ول الداعى ۋاقىتتا ەلوردالىق ارىپتەستەرىن شەنيان قالاسىنا قوناققا كەلىپ كەتۋگە شاقىردى.
سەرىك جولداسباي
