تالقىلاۋ بارىسىندا الەۋمەتتىك تۇرعىن ۇيمەن قامتاماسىز ەتۋ, مەملەكەتتىك جاڭارتۋ باعدارلاماسى شەڭبەرىندە اپاتتى جانە ەسكىرگەن تۇرعىن ۇيلەردى ءسۇرۋ, ميب قۇرۋ, كوپپاتەرلى تۇرعىن ۇيلەر مەن ليفت جابدىقتارىن جاڭعىرتۋ جانە جوندەۋ سياقتى وزەكتى ماسەلەلەر قوزعالدى.
«ەلوردا حالقىنىڭ ءوسۋىن ەسكەرە وتىرىپ, كوممۋنالدىق تۇرعىن ءۇي قورىنان تۇرعىن ۇيگە مۇقتاجدار سانى دا وسۋدە. ەگەر 2018 جىلى 110 الەۋمەتتىك پاتەر بەرىلسە, 2019 جىلى 2900 پاتەر بەرىلدى, وتكەن جىلى قولجەتىمدى تۇرعىن ءۇي سانى بىرنەشە ەسەگە ارتتى. 7000-نان استام پاتەر بەرىلدى» دەدى قالا اكىمىنىڭ ورىنباسارى نۇرلان نۇركەنوۆ. قۇرىلىستىڭ جوعارى قارقىنىنا قاراماستان, ازاماتتاردى تۇرعىن ۇيمەن قامتاماسىز ەتۋ ەلوردا اكىمدىگىنىڭ تۇراقتى باقىلاۋىنداعى ماڭىزدى ماسەلەلەردىڭ ءبىرى بولىپ قالا بەرەدى.
قالا اكىمىنىڭ ورىنباسارى بيىل تۇرعىن ۇيگە مۇقتاجدار ەسەبىندە تۇرعان كەزەكتەگىلەر ءۇشىن جانە قالانىڭ جۇمىس ىستەيتىن جاستارى ءۇشىن 10000 پاتەردى پايدالانۋعا بەرۋ جوسپارلانعانىن جەتكىزدى. نۇر-سۇلتان قالاسى تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ءانۋار سايپوۆ ەلورداداعى رەنوۆاتسيا باعدارلاماسى 2030 جىلعا دەيىنگى پەرسپەكتيۆامەن يگەرۋ شەكاراسىنداعى تۇرعىن ءۇيدى ءسۇرۋدى قامتيتىن قالانىڭ ىقشام قۇرىلىسى بويىنشا باس جانە كەشەندى جوسپار شەڭبەرىندە ىسكە اسىرىلىپ جاتقانىن ايتتى. باعدارلاما قالا اكىمدىگىنىڭ 2018 جىلعى 30 مامىرداعى قاۋلىسىمەن ماقۇلدانعان.
«جوبانىڭ ءبىرىنشى كەزەڭى 2013-2017 جىلدار ارالىعىندا ءوتتى. سول كەزەڭدە 3519 پاتەرلىك 228 اپاتتى ءۇي بۇزىلدى. 2018 جىلدان باستاپ 2022 جىلعا دەيىنگى كەزەڭگە ەسەپتەلگەن ەكىنشى كەزەڭدى ىسكە اسىرۋ شەڭبەرىندە اپاتتى جاعدايداعى 54 ءۇي – 874 پاتەردىڭ تۇرعىندارىن كوشىرۋ جوسپارلانعان. 2018-2020 جىلدارى 492 پاتەرگە 30 ءۇيدىڭ تۇرعىندارى كوشىرىلدى. 2021-2022 جىلدارعا 382 پاتەرلىك 24 ءۇي جوسپارلانعان. ونىڭ ىشىندە بيىل 257 پاتەرلىك اپاتتى جاعدايداعى سەگىز ءۇي اياقتالادى» دەدى ءانۋار سايپوۆ.
