قازاقستان پرەزيدەنتى رەسەي ۇكىمەتىنىڭ توراعاسى ميحايل ميشۋستينمەن كەزدەستى. مەملەكەت باسشىسى قازاقستان مەن رەسەي ۇكىمەتتەرى باسشىلارىنىڭ وتكىزگەن كەلىسسوزدەرىنىڭ قورىتىندىسىن جوعارى باعالادى.
– كەشە سىزدەر وتە مازمۇندى, تابىستى كەلىسسوزدەر جۇرگىزدىڭىزدەر. ەكى مەملەكەتتىڭ ساۋدا-ەكونوميكا سالاسىنداعى ءوزارا ءىس-قيمىلدىڭ قارقىندى دامىعانىن اتاپ وتكىم كەلەدى. ىنتىماقتاستىقتى ودان ءارى قارقىندى دامىتۋعا مۇمكىندىك بەرەتىن ماڭىزدى كەلىسىمدەرگە قول قويۋعا دايىندىق ءجۇرىپ جاتىر. پاندەمياعا بايلانىستى تۋىنداپ وتىرعان بارلىق قيىندىقتارعا قاراماستان, ەكى ەل اراسىنداعى ساۋدا وتكەن 5 ايدىڭ ىشىندە 26 پايىزعا ارتتى, – دەدى قاسىم-جومارت توقاەۆ.
قازاقستان پرەزيدەنتى بولاشاقتا ەكونوميكالىق بايلانىستاردى ارتتىرۋدىڭ الەۋەتى زور ەكەنىنە نازار اۋداردى.
– ءبىزدىڭ جوسپارىمىز – ناقتى جوبالاردى جۇزەگە اسىرۋ ارقىلى ىنتىماقتاستىعىمىزدى نىعايتا ءتۇسۋ. قازىرگى ۋاقىتتا ەكى ەل ۇكىمەتتەرى ماشينا جاساۋ, اۋىل شارۋاشىلىعى جانە باسقا دا اسا ماڭىزدى سالالاردا ءىرى جوبالاردى جۇزەگە اسىرۋعا كۇش جۇمىلدىرۋدا. بۇل باعىتتاعى جۇمىستاردى جالعاستىرا بەرۋىمىز كەرەك. ءسىزدىڭ وسى جۇمىسقا دەگەن قۇلشىنىسىڭىزدى قۇپتايمىن جانە تابىستى بولاتىنىنا سەنىمدىمىن, – دەدى مەملەكەت باسشىسى.
رەسەي پرەمەر-ءمينيسترى ميحايل ميشۋستين قاسىم-جومارت توقاەۆقا قوناقجايلىعى ءۇشىن العىس ءبىلدىرىپ, پرەزيدەنت ۆلاديمير ءپۋتيننىڭ سالەمىن جەتكىزدى.
اڭگىمەلەسۋ بارىسىندا قازاقستان مەن رەسەيدىڭ پاندەمياعا قارسى كۇرەس جانە بىرلەسىپ ۆاكتسينا شىعارۋ سياقتى ءوزارا ءىس-قيمىلداعى باسىم باعىتتار تۋرالى ءسوز بولدى.
تاراپتار ايماقتار اراسىنداعى بايلانىستاردىڭ وڭ قارقىنى تۋرالى دا پىكىر الماستى. بۇل قاتىناستارعا وسى كۇزدە كوكشەتاۋ قالاسىندا مەملەكەت باسشىلارىنىڭ قاتىسۋىمەن وتەتىن كەزەكتى ايماقارالىق ىنتىماقتاستىق فورۋمى تىڭ سەرپىن بەرەدى.
