«Robotek Grand Tournament 2024» روبوتوتەحنيكا بويىنشا حالىقارالىق چەمپيوناتى ءوز مارەسىنە جەتتى, دەپ حابارلايدى astana-akshamy.kz
استانادا قازاقستان رەسپۋبليكاسى پرەزيدەنتتىك ورتالىعىنىڭ بازاسىندا 2 مامىردا باستالعان چەمپيوناتقا ەلىمىزدىڭ بارلىق وبلىستارى مەن رەسپۋبليكالىق ماڭىزى بار قالالارىنان ەڭ مىقتى 127 كوماندا جانە قىرعىزستان, وزبەكستان, تاجىكستان ەلدەرىنەن 18 ۇمىتكەر قاتىستى.
جارىستىڭ ەكىنشى كۇنىندە قاتىسۋشىلار ءۇش سانات : «مەرگەن» (جوعارى سانات), «روبوتەك», «تۋدى جەتكىزۋ» بويىنشا باق سىنادى. جەڭىمپازدار رەتى كەلەسىدەي:
«روبوتەك» ساناتىندا:
ءى ورىن – كىزىلوردا وبلىسى, كىزىلوردا قالاسىنىڭ كومانداسى;
ءىى ورىن – اباي وبلىسى, جارما اۋدانىنىڭ كومانداسى;
ءىىى ورىن – جەتىسۋ وبلاسى, تالدىقورعان قالاسىنىڭ كومانداسى.
«مەرگەن» (جوعارى سانات) ساناتىندا:
ءى ورىن – باتىس قازاقستان وبلىسى, ورال قالاسىنىڭ كومانداسى;
ءىى ورىن – پاۆلودار وبلىسى, باياناۋىل اۋدانىنىڭ كومانداسى;
ءىىى ورىن – قىزىلوردپ وبلىسى, قىزىلوردا قالاسىنىڭ كومانداسى.
«تۋدى جەتكىزۋ» ساناتىندا:
ءى ورىن – تۇركىستان وبلىسى, كەنتاۋ قالاسىنىڭ كومانداسى
ءىى ورىن – وزبەكستان رەسپۋبليكاسى, چيرچيك قالاسىنىڭ كومانداسى;
ءىىى ورىن – قىزىلوردا وبلىسى, قىزىلوردا قالاسىنىڭ كومانداسى.
ەكى كۇنگە جوسپارلانعان «Robotek Grand Tournament 2024» روبوتوتەحنيكادان وقۋشىلار اراسىنداعى حالىقارالىق چەمپيوناتى ەڭ تانىمال 7 سانات بويىنشا ءوتتى. قاتىسۋشىلار جارىستىڭ ءبىرىنشى كۇنى «مەرگەن» (كىشى سانات), «ينۆەرستىك سىزىق بويىمەن جارىس», «جەتكىزۋشى روبوت», «سۇرىپتاۋشى روبوت» ساناتتارى بويىنشا, ەكىنشى كۇنى «مەرگەن» (جوعارى سانات), «روبوتەك», «تۋدى جەتكىزۋ» ساناتتارى بويىنشا بەرىلگەن ارەكەتتەردى ورىنداۋعا قابىلەتتى روبوتتى قۇراستىرۋدان سايىستى.
چەمپيونات قورىتىندىسى بويىنشا 7 ساناتپەن قاتار 4 ارنايى نوميناتسيا بويىنشا جەڭىمپازدار انىقتالدى. ناتيجەسىندە «ۇزدىك اۋىل كومانداسى» كۋبوگىن ءوز ساناتىندا ەڭ كوپ ۇپاي جيناعان جەتىسۋ وبلىسى, اكسۋ اۋدانىنىڭ «VertuALL» كومانداسى, «ۇزدىك شەتەلدىك كوماندا» كۋبوگىن وزبەكستان رەسپۋبليكاسىنىڭ «SteamLand» كومانداسى, «ۇزدىك ينجەنەرلىك شەشىم» كۋبوگىن تۇركىستان وبلىسىنىڭ «The Best» كومانداسى يەلەنسە, چەمپيوناتتىڭ ەڭ نەگىزىگى كۋبوگى «ەل كۋبوگىن» كوماندالىق ەسەپتە ەڭ كوپ ۇپاي جيناعان باتىس قازاقستان وبلىسىنىڭكومانداسى جەڭىپ الدى.
روبوتوتەحنيكا قۇراستىرۋدا ەرەكشەلەنگەن اباي وبلىسى, ءۇرجار اۋدانىنىڭ جاس ينجەنەرى, 11 سىنىپ وقۋشىسى سليامعازى ميراس قازاقستان-بريتان تەحنيكالىق ۋنيۆەرسيتەتى تاعايىنداعان ارنايى وقۋ گرانتىننىڭ يەگەرى اتاندى. گرانتتى قازاقستان-بريتان تەحنيكالىق ۋنيۆەرسيتەتى ينجەنەريا جانە اقپاراتتىق تەحنولوگيالار مەكتەبىنىڭ دەكانى مۋحامەدگالي اديل سالتاناتتى تۇردە تاپسىردى.
سونىمەن قاتار چەمپيونات اياسىندا وتكىزىلگەن SOCIAL MEDIA CHALLENGE-ءدىڭ قورىتىندىسى بويىنشا نۇرداۋلەت, ءاليحان (Instagram-داعى لاقاپ اتى @alfiya_bolatovna_) ەسىمدى قاتىسۋشىلار جەڭىمپاز اتانىپ, «ياندەكس ميني» كولونكاسىن ۇتىپ الدى.
تارتىسقا تولى ەكى كۇن ىشىندە قاتىسۋشى كوماندالار ءوز داعدىلارىن, بىلىمدەرى مەن تالانتتارىن, تاپقىرلىقتارى مەن قىراعىلىقتارىن كورسەتتى.
چەمپيوناتتىڭ ۇيىمداستىرۋشىلارى – قازاقستان رەسپۋبليكاسى وقۋ-اعارتۋ مينيسترلىگى «دارىن» رەسپۋبليكالىق عىلىمي-پراكتيكالىق ورتالىعى, استانا قالاسى اكىمدىگىنىڭ «استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعى, «Robotek» روبوتوتەحنيكا مەكتەبى.
