ادام ءومىرىنىڭ سوڭىنا دەيىن حيرۋرگكە جولىقپاۋى مۇمكىن. الايدا, دۇنيە ەسىگىن اشقاننان ەسەيگەنگە دەيىن ەڭ كوپ كەزدەسەتىن پەدياتر مەن تەراپەۆت دارىگەرلەرىنىڭ ورنى ءبىر توبە. ادامنىڭ فيزيكالىق جانە پسيحيكالىق دامۋىن باقىلاپ, ءوز جاسىنا سايكەس جەتىلۋىن قاداعالايتىن, اۋرۋدىڭ الدىن الاتىن, جۇمىسى اۋىر, كوپبەيىندى بۇل ماماندىققا ەندى كىرىسكەن جانعا تولەنەتىن اقى دا از, بار-جوعى – 50 مىڭ تەڭگە. استانا قالاسىنداعى №9 قالالىق ەمحانانىڭ ەڭ جاس تەراپەۆت-مامانى رىسگۇل پەرنەبەكوۆامەن از-كەم سۇحباتىمىزدا باس اۋىرىپ, بالتىرىمىز سىزداي قالسا, الدىمەن جۇگىنەتىن ماماندار ەڭبەگىنەنىڭ قىر-سىرىنا قانىقتىق.
– رىسگۇل, دارىگەرلىكتى تاڭداۋىڭىزعا نە سەبەپ بولدى؟
– باستاۋىش سىنىپتا «كىم بولعىڭ كەلەدى؟» دەگەن تاقىرىپتا شىعارما جازعاندا, مەن ويلانباستان «دارىگەر بولامىن» دەۋشى ەدىم. سەبەبى, بەس جاسىمدا جانۇيامىزبەن جول اپاتىنا ۇشىراپ, ءولىم اۋزىنان قالعانبىز. وسىدان كەيىن ءومىرىمدى ساقتاپ قالعان اق حالاتتى ابزال جاندارعا قۇرمەتىم ارتىپ, دارىگەر ماماندىعىن الامىن دەگەن شەشىمگە كەلدىم. سول ارمانمەن 2006 جىلى استانا مەديتسينا ۋنيۆەرسيتەتىنىڭ «ەمدەۋ ءىسى» فاكۋلتەتىنە وقۋعا ءتۇسىپ, تەراپەۆت ماماندىعىن يگەرىپ شىقتىم. وقۋىمدى بىتىرگەننەن كەيىن جولداسىممەن بىرگە استانا قالاسىندا قالۋعا شەشىم قابىلدادىق. جاس مامانداردى جۇمىسپەن قامتاماسىز ەتۋ باعدارلاماسىمەن بىلتىر وسى №9 قالالىق ەمحاناعا ۋچاسكەلىك-تەراپەۆت قىزمەتىنە ورنالاستىم.
– جۇمىس كۇنىڭىز قالاي وتەدى؟
– تەراپيا وزىمە قاتتى ۇنايدى. ناۋقاستار سىرقاتىنا ەم تابىلىپ, العىس العان سايىن جۇمىسقا دەگەن قۇلشىنىسىم ارتادى. جۇمىس كۇنىم ادەتتە بەلگىلەنگەن كەستە بويىنشا جۇرەدى. قابىلداۋعا ناۋقاستار الدىن الا جازىلىپ كەلەدى, بىراق اراسىندا سىرقاتى اۋىر جانداردى شۇعىل قابىلدايمىز. قابىلداۋ بىتكەن سوڭ, تىركەۋ بولىمىنەن ۇيگە شاقىرعانداردىڭ مەكەنجايىن الىپ, ۋچاسكەنى ارالاۋعا شىعامىز. ارنايى شاقىرتۋدان بولەك, ارداگەر كىسىلەر مەن مۇگەدەكتەردىڭ حال-جاعدايىن ءبىلىپ تۇرۋ دا – ۋچاسكەلىك دارىگەردىڭ مىندەتى. تۇرعىنداردى جاس دەڭگەيلەرىنە بايلانىستى سكرينينگكە شاقىرامىز جانە مەيىربيكەلەرمەن بىرگە ءتۇسىندىرۋ جۇمىستارىن جۇرگىزەمىز. ناۋقاستاردى جانە ساۋىقتىرۋ ءىس-شارالارىن قاجەت ەتەتىن مۇگەدەكتەردى جوسپارلى تۇردە بىرىڭعاي گوسپيتاليزاتسيا پورتالىنا تىركەپ, اۋرۋحانا مەن ساۋىقتىرۋ ورىندارىنا جولداما بەرەمىز. ناۋقاستارعا قاجەتتى ءتۇرلى انىقتامالار مەن تەكسەرۋلەردى دايىندايمىز. سىرت كوزگە كورىنبەۋى مۇمكىن, الايدا ۋچاسكەلىك دارىگەر وزىنە بەرىلگەن اۋماقتاعى ءاربىر سىرقاتتىڭ, ءتىپتى ءاربىر تۇرعىننىڭ دەنساۋلىعىنان حاباردار بولىپ وتىرۋى ءتيىس.
– وسى ماماندىقتى تاڭداعانىڭىزعا وكىنگەن كەزىڭىز بولدى ما؟
– بولعان (كۇلىپ). استانانىڭ ايازدى كۇندەرى ءۇي-ءۇيدى ارالاۋ كوپ قيىندىق تۋعىزادى. بوراندا توڭىپ, تايىپ جىعىلىپ تا قالاسىڭ. كەيدە جوعارى قاباتتاعى پاتەرلەرگە جاياۋ شىعۋعا تۋرا كەلەدى. ءتىپتى, ارىپتەستەرىمنىڭ يتكە تالانعان كەزدەرى دە بولعان. وسىنداي جايتتار ورىن العاندا ۋچاسكەلىك دارىگەر قىزمەتىنەن كەتىپ قالعىم كەلەدى. بىراق, جاساعان ەمنىڭ ناتيجەسىن كورگەندە, ناۋقاستىڭ جاعدايى جاقسارعاندا, بارلىعىن ۇمىتىپ كەتەسىڭ.
– بۇگىنگى ادامداردىڭ دەنساۋلىعى تۋرالى نە ايتاسىز؟
– قازىرگى تاڭدا اۋرۋلار «جاسارىپ» بارادى. بۇرىندارى تەك قارت كىسىلەردە كەزدەسەتىن اۋرۋ تۇرلەرى قازىر جاستار اراسىندا دا بەلەڭ الۋدا. سەمىزدىك, قان قىسىمىنىڭ جوعارىلاۋى, اس قورىتۋ جۇيەسىنىڭ بۇزىلۋى كوپ كەزدەسەدى. سەبەبى دە بەلگىلى, كۇيبەڭ تىرشىلىكپەن تىنىم تاپپايتىن حالىقتىڭ كوپشىلىگى سالاۋاتتى ءومىر سالتىن ۇستانبايدى, دۇرىس تاماقتانبايدى.
– دارىگەر ماماندىعى بويىنشا ەلىمىزدەگى ەڭ جاقسى وقۋ ورنى دەپ قايسىسىن ايتا الاسىز؟
– جوعارى دارەجەلى ءبىلىم الۋ وقۋ ورنىنا ەمەس, ادامنىڭ وزىنە تىكەلەي بايلانىستى. وقىعان جەرى ماڭىزدى ەمەس. سول سەبەپتى, دارىگەر بولامىن دەپ شەشىم قابىلداعان ادام ونىڭ بىلىمىنە باسقا ادامنىڭ ءومىرى تىكەلەي بايلانىستى ەكەنىن ۇنەمى ەستە ساقتاعانى ءجون.
سۇحباتتاسقان اينۇر راقىشەۆا
