ەلىمىزدىڭ دەنساۋلىق ساقتاۋ جۇيەسىندەگى جاقسى وزگەرىستەردىڭ ءبىرى – «كەزەكسىز ەمحانا جوباسى». بۇل استانادا, سونىڭ ىشىندە قالالىق №5 ەمحانادا ءساتتى جۇزەگە اسىرىلىپ جاتىر.
قازىرگى ۋاقىتتا استانا قالاسىندا حالىق سانىنىڭ وسۋىنە بايلانىستى قالا ەمحانالارى بىرنەشە ەسە ارتىق جۇكتەمەمەن جۇمىس ىستەپ وتىر. ارينە, قالادا اشىلعان جاڭا ەمحانالار جۇكتەمەنى ەداۋىر ازايتتى. دەگەنمەن دە, كەزەكتى ازايتۋ ءۇشىن قوسىمشا جوبالار كەرەك ەكەنى تۇسىنىكتى.
ەلوردانىڭ №5 ەمحاناسى وسىدان ەكى جىل بۇرىن «كەزەكسىز ەمحانا» جوباسىن قولعا الىپ, ونى ءساتتى جۇزەگە اسىرىپ كەلەدى. قازىرگى تاڭدا دارىگەرگە كىرۋ ءۇشىن سارىلىپ ۇزاق تۇراتىن ادامداردىڭ قاتارى سيرەگەنىن بايقاۋعا بولادى. اتالمىش ەمحانانىڭ وتباسىلىق دەنساۋلىق ساقتاۋ ءبولىمىنىڭ مەڭگەرۋشىسى ۇلتۋعان ابدراحمانوۆانىڭ ايتۋىنشا, جوبانىڭ ارقاسىندا كەز-كەلگەن ادام call – ورتالىق ارقىلى تەلەفونمەن حابارلاسىپ نەمەسە ونلاين تۇردە تىركەلىپ, دارىگەردىڭ قاراۋىنا جازىلا الادى. ول ءۇشىن ۇزاق-سونار كەزەككە تۇرۋدىڭ قاجەتى جوق. ادام جازىلعان ۋاقىتىندا كەلەدى دە, دارىگەرگە كىرە بەرەدى. ەلەكتروندى جۇيەگە اۋىسۋدىڭ باستى ارتىقشىلىعى ەمحاناداعى كەزەكتىڭ سيرەۋ جانە سىرقاتتانۋشىلار ۋاقىتىنىڭ ۇنەمدەلۋىندە ەكەن.
وسى ەمحانانىڭ كومەگىنە قالالىقتار عانا ەمەس, اقمولا وبلىسىنىڭ تالاپكەر, قاجىمۇقان اۋىلدارىنىڭ تۇرعىندارى دا جۇگىنەدى. بۇنداي جاعدايدا ەمدەلۋشى ءوتىنىش ءبىلدىرىپ, ەمحاناعا الدىن-الا تىركەلۋى قاجەت. سودان كەيىن ەمدەلۋشى مەن ەمحانا اراسىندا زاڭدى تۇردە كەلىسىم-شارت جاسالادى.
الدىن-الا جازىلۋدىڭ تاعى ءبىر ارتىقشىلىعى – دارىگەر الدىنا كەلگەن ەمدەلۋشى جايىندا عالامتورداعى ارنايى جۇيە ارقىلى تولىق اقپارات الا الادى. ياعني, ەمدەلۋشىنىڭ جەكە دەنساۋلىق پاراعىنىڭ ەلەكتروندى نۇسقاسى ەمدەلۋشىلەر بازاسىندا ساقتالادى. كەلۋشى دارىگەرگە قارالعان سايىن سىرقات تاريحى مەديتسينالىق اقپارات بازاسىنا مىندەتتى تۇردە ەنگىزىلىپ وتىرادى. ال ناۋقاستىڭ كارتوچكاسى ەمدەلۋشىنىڭ وزىندە بولادى. بۇگىندە №5 قالالىق ەمحاناسىنىڭ ەلەكتروندى جۇيەسىندە 67 مىڭنان اسا ادام تىركەلىپتى. مۇنداي جۇيە دارىگەردىڭ جۇمىسىنداعى قاعازباستىلىقتى دا ەداۋىر ازايتقان كورىنەدى.
جۇرتشىلىققا ەلەكتروندى نۇسقادا قىزمەت كورسەتۋگە كوشە باستاعان №5 قالالىق ەمحانانىڭ ماتەريالدىق-تەحنيكالىق بازاسى دا تولىققاندى. بارلىق دارىگەر بولمەلەرى كومپيۋتەرمەن جابدىقتالعان. كەلەشەكتە ەمدەلۋشىلەرگە ەلەكتروندى جۇيەدە قىزمەت كورسەتۋ اياسى كەڭەيە تۇسەدى دەيدى ماماندار.
بوتا جاكەن ,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
