ەلوردالىق دارىگەرلەر وكپەسى 93 پايىزعا زاقىمدانعان اياعى اۋىر ايەلدى امان-ەسەن بوساندىرىپ, بەتىن بەرى قاراتتى. ناۋقاس جۇكتىلىكتىڭ 37-38 اپتاسىندا كوروناۆيرۋس جۇقتىرعان. قالا تۇرعىنى كوپبەيىندى قالالىق بالالار اۋرۋحاناسىنىڭ اكۋشەرلىك بلوگىنان №2 قالالىق كوپبەيىندى اۋرۋحانانىڭ ستاتسيونارىنا اۋىستىرىلعان.
بوتاگوز ەسىمدى ەلوردا تۇرعىنى 20 ماۋسىم كۇنى بويىنان السىزدىك, دەنەنىڭ اۋرۋى, مۇرىننىڭ بىتەلۋى سەكىلدى وزگەرىستەر بايقاعان. سول سياقتى جوتەلىندە قاقىرىق پايدا بولىپ, دەنە تەمپەراتۋراسى كوتەرىلگەن. قۋانىشقا وراي, 28 ماۋسىم كۇنى بوسانىپ, دەنى ساۋ نارەستەنى دۇنيەگە اكەلدى. بىراق دەرت دەندەپ, ونىڭ جاعدايى ناشارلاي تۇسكەن.
«قابىلداۋ كەزىندە ناۋقاستىڭ جاعدايى تىنىس الۋ جەتكىلىكسىزدىگىنىڭ, ينتوكسيكاتسيا سيندرومىنىڭ سالدارىنان وتە اۋىر بولدى. ءبىز مەديتسينالىق كومەك كورسەتۋدىڭ جوعارى تەحنولوگيالىق قىزمەتتەرىن پايدالانا وتىرىپ, ناۋقاستى قۇتقارىپ قالۋ ءۇشىن كۇرەستىك. 21 شىلدەدە پاتسيەنتتى ەكستراكورپورالدى مەمبرانالىق وكسيگەناتسيا اپپاراتىنان شىعاردىق. وسىدان كەيىن ناۋقاس سرار اپپاراتىنا وكپەنى ءماجبۇرلى جەلدەتۋ رەجيمىنە اۋىستىرىلدى. بۇل اپپارات وكپەنىڭ تولىعىمەن اشىلۋى ءۇشىن جۇكتەمە رەتىندە قوسىلادى» دەپ ەسكە الادى №2 قالالىق كوپبەيىندى اۋرۋحانانىڭ دارىگەرى ايجان شانوۆا.
ارادا 28 كۇن وتكەننەن كەيىن ەلوردا تۇرعىنى جالپى پالاتاعا اۋىستىرىلدى. بىراق بۇل ناۋقاس تولىعىمەن ەمدەلىپ شىقتى دەگەندى بىلدىرمەيدى. الداعى ۋاقىتتا دارىگەرلەردىڭ تۇراقتى باقىلاۋىندا بولادى. قازىر بوتاگوزدى ۇيىندە كۇيەۋى مەن قىزى كۇتىپ وتىر.
ەمدەۋ كەزىندە ستاتسيوناردا جوعارى بىلىكتى مامانداردىڭ قاتىسۋىمەن كونسيليۋمدار وتكىزىلدى. دارىگەرلەردىڭ بىرلەسكەن جۇمىسىنىڭ ارقاسىندا ناۋقاس ەمدەلىپ, كوروناۆيرۋستى جەڭىپ شىقتى.
«ءوز ءومىرىم ءۇشىن كۇرەسۋ جانە ۇيىمە ورالۋ باستى ماقساتىم بولدى. بارىڭىزگە, اسىرەسە دارىگەرلەرگە كورسەتكەن كومەگى ءۇشىن, ءومىرىمدى قۇتقارۋعا ۇمتىلعانى ءۇشىن العىس ايتقىم كەلەدى. ەندى ۇيىمە, وتباسىما جانە قىزىما ورالا الامىن» دەپ قورىتىندىلادى ەلوردا تۇرعىنى.
