ۋاقىت وتكەن سايىن قالا كولەمى ۇلعايىپ, استانا قارقىندى دامىپ كەلەدى. ارينە, اسەم قالا الىستان كوز تارتار سان الۋان عيماراتتارىمەن عانا ەمەس, سۋبۇرقاقتارىمەن, گۇلزارلارىمەن, جايقالعان جاسىل اللەيالارىمەن, سول سياقتى ساياباقتارىمەن دە ءساندى.
ونسىز كورىكتى قالانىڭ كورنىسىن ەلەستەتۋ قيىن. ەلوردادا جاسىل جەلەكپەن كومكەرىلگەن دەمالىس ورىندارى از ەمەس. سولاردىڭ ءبىرى ءھام بىرەگەيى – پرەزيدەنت ساياباعى. بۇل ساياباق كەرەي مەن جانىبەك حاندار جانە ءاليحان بوكەيحان كوشەلەرىنىڭ قيىلىسىندا, بەيبىتشىلشىك جانە كەلىسىم سارايىنىڭ اۋماعىندا ورنالاسقان. ونىمەن قوسا, جىل بويى ءتۇرلى مادەني شارالار ءوتىپ تۇراتىن قالاداعى ەرەكشە عيماراتتاردىڭ ءبىرى نازارباەۆ ورتالىعى دا اتالمىش ساياباقتىڭ تۋرا جانىنان ورىن تەپكەن.
80 گەكتار جەردى الىپ جاتقان ساياباقتا بيىل 500-دەن اسا تال مەن 300-گە جۋىق جاڭا ورىندىق پايدا بولدى. بۇدان بولەك نەگىزگى قاقپا مەن ەكى سۋبۇرقاق اۋماعى جانە ساياباقتىڭ كىرەبەرىستەرى جاڭارتىلدى. بۇل – تۇڭعىش پرەزيدەنت قورىنىڭ ەلوردانىڭ 20 جىلدىق مەرەيتويىنا تارتۋى بولدى. ەندى ونداعى ءسىبىر شىرشاسى, تاۋلى قاراعاي, كازاك ارشاسى, دالا بادامى قالا ساياباعىن ودان ءارى اجارلاندىرا تۇسپەك. سونىمەن قاتار, ساياباق اۋماعىنىڭ ءار جەرىندە ءبىر جىلدىق گۇلدەر دە جايقالىپ تۇر.
كەلۋشىلەردى ادەمىلىگىمەن عانا ەمەس, تازالىعىمەن دە باۋراي تۇسەتىن ساياباقتاعى ورىندىقتاردىڭ جانىندا جاڭا قوقىس جاشىكتەرى دە كوپتەپ ورناتىلعان.
پرەزيدەنت ساياباعىندا كۇنى كەشكە دەيىن سەرۋەندەپ, كورىكتى دەمالىس ورنىن قىزىقتايتىنداردىڭ قاتارى قالىڭ. بۇل جەر ەرەسەكتەرمەن قاتار بالالارعا دا وتە جايلى. مۇندا بالعىنداردىڭ اسىر سالىپ ويناۋى ءۇشىن بارلىق جاعداي قاراستىرىلعان. ۋاقىتتى كوڭىلدى وتكىزىپ قانا قويماي, سپورتپەن اينالىسۋعا دا مۇمكىندىك مول. بالالار جانە سپورت الاڭدارى دا بار.
ال ساياباقتى ۇستىڭگى جاعىنان تاماشالاساڭىز, ەرەكشە پىشىندەگى سۋبۇرقاقتان ەرتەگى قۇسىنىڭ بەينەسىندەگى سامۇرىقتى بايقاۋعا بولادى.
