سان سالالى قىزمەت ساپاسى قانداي؟

قالا باسشىسىنىڭ باستاماسىمەن استانادا سان ءتۇرلى سالاداعى سەرۆيستى قالاي دامىتۋ جونىندە الەمدىك ساراپشى دجون شوۋلدىڭ قاتىسۋىمەن بيزنەس-سەمينار وتپەك. وسى ورايدا قالالىق اكىمدىكتە استانا قالاسى قىزمەت ساپاسى اكادەميا­سىنىڭ باسشىسى جانار ۇسىپبەكوۆا ءباسپاسوز ءماسليحاتىن وتكىزدى.

قىزمەت مادەنيەتى سالاسىندا 40 جىلدان استام ۋاقىت ەڭبەك ەتىپ كەلە جاتقان امەريكالىق ازامات دجون شوۋل 1979 جىلى پەرسونالدىڭ كليەنتتەرمەن جۇمىس ىستەۋى تۋرالى الەم بو­يىنشا العاشقى بولىپ وقىتۋ باعدارلاماسىن ازىرلەپتى. وسى سالادا موتيۆاتسيالىق كىتاپتار مەن ءبىلىم الۋ باعدارلامالارىن جازىپ, «Servict Quality Institute» كومپانياسىنىڭ نەگىزىن قالاعان سپيكەر اتالمىش كومپانيا باعدارلاماسى بويىنشا الەمنىڭ 40 ەلىندە 2 ميلليوننان استام ادامدى وقىتىپتى. مامانداردىڭ مالىمەتىنە سۇيەنسەك, «تسەسنابانك» اق, «تەحنودوم» اق, «سبەربانك» اق سياقتى قازاقستانداعى بىرقاتار ءىرى كومپانيالار دجون شوۋلدىڭ باعدارلاماسى نەگىزىندە جۇمىس ىستەيتىن كورىنەدى.
– استانادا حالىقارالىق شارالار ۇنەمى ءوتىپ تۇراتىندىقتان, قالاعا الىس-جاقىن شەتەلدەردەن كەلەتىن قوناقتار سانى از ەمەس. ماسەلەن, بيىل «ەكسپو-2017» كورمەسى وتسە, كەلەر جىلى ەلوردانىڭ 20 جىلدىق مەرەيتويى ەكەنى بەلگىلى. وسى تۇرعىدا قىزمەت كورسەتۋ ساپاسىن ودان ءارى جاقسارتۋ ءبىز ءۇشىن قاجەتتىلىك دەر ەدىم. ال بيزنەس-سەميناردى وتكىزۋدەگى ماقساتىمىز – استاناداعى قىز­مەت كورسەتۋ ساپاسىن جاڭا دەڭگەيگە كوتەرۋ, – دەگەن قىزمەت ساپاسى اكادەمياسىنىڭ باسشىسى جانار ۇسىپبەكوۆا, – سەمينارعا قاتىسقاندارعا حالىقارالىق سەرتيفيكات تابىستالادى. سونىمەن قاتار, قاتىسۋشىلارعا تۇتىنۋشىلاردىڭ نازارىن تارتۋدىڭ ناتيجەلى امالدارىن قولدانۋ, سۇرانىستىڭ وزگەرۋىنە تەز ارادا ارەكەت ەتۋ, ۇتىمدى جۇمىستى جوسپارلاۋ, جۇمىس بارىسىنداعى شيەلەنىسكەن جاعدايلاردى باسقارا ءبىلۋ سياقتى جوعارى دارەجەلى قىزمەتتى قالاي كورسەتۋگە بولاتىنى جايلى كەلەلى كەڭەستەر بەرىلەدى.
سەمينار قىزمەت ساپاسى سالاسىنا جاڭا لەپ اكەلەدى دەپ ويلايمىن, – دەيدى.
ءسوز سوڭىندا جانار جولداس­بايقىزى مەملەكەتتىك مەكەمەلەر مەن ۇلتتىق كومپانيالار باسشىلارىن, كاسىپ­كەرلەردى جانە بارلىق نيەت ءبىلدىرۋ­شىلەردى بيزنەس-سەمينارعا قاتىسۋعا شاقىردى. ايتا كەتۋ كەرەك, اتالمىش بيزنەس-سەمينار 19 قاراشا كۇنى «Radison» قوناقۇيىندە وتەدى.

نۇرداۋلەت كاكىشەۆ