ەكسپو كورمەسىنىڭ اياسىندا قالا اكىمدىگى دە ءتۇرلى قىزىقتى شارالار ۇيىمداستىرىپ كەلەدى. سولاردىڭ ءبىرى قازاقستاندىق ديزاينەرلەردىڭ قاتىسۋىمەن وتەتىن «Expo Fashion Fest» ءسان فەستيۆالى بولماق.
ءسان سالتاناتى بۇگىن «بايتەرەك» مونۋمەنتىنىڭ الدىنداعى الاڭدا ساعات 12.00-21.00 ارالىعىندا وتەدى. وتىزعا جۋىق وتاندىق ديزاينەر ءوز تۋىندىلارىن كوپشىلىك نازارىنا ۇسىناتىن بولادى. ال كەلۋشىلەر الاڭدا ورناتىلعان كورمە زالىندا كيىم-كەشەكتى كيىپ كورىپ, ۇناعانىن ساتىپ الۋ مۇمكىندىگىنە يە بولادى.
تۇسكى ساعات ءتورت-بەستىڭ كەزىندە بەلگىلى يميدجمەيكەر جاننا احمەتوۆا ستيل بويىنشا تەگىن شەبەرلىك سىنىبىن وتكىزەدى. ال بەت ارلەۋشىلەر ءمىنسىز ماكياج جاساۋ قۇپيالارىمەن بولىسەدى. ۆيزاج ساباعىنا ساعات 17.00-18.30 ارالىعىندا قاتىسۋعا بولادى.
فەستيۆالدىڭ شارىقتاۋ شەگى تانىمال ديزاينەرلەردىڭ اشىق اسپان استىندا وتەتىن ءساندى كيىمدەر كورسەتىلىمى بولماق. «Expo Fashion Fest» شاراسىندا SAMIDEL, DeGuise, AYANA style, Avventurista, Ainel جانە Zhamili Kapanova ۇلتتىق برەندتەرى سوڭعى كيىم ۇلگىلەرىن پاش ەتەدى. كورسەتىلىم كەشكى ساعات جەتىدەن باستالىپ, ەكى ساعاتقا دەيىن جالعاسادى.
فەستيۆالدى تاماشالاۋعا جينالعان قاۋىم ءساندى كيىم كورسەتىلىمىنەن باسقا ەلىمىزدىڭ ەسترادا ارتىستەرى مەن بي ۇجىمدارىنىڭ قاتىسۋىمەن وتەتىن ويىن-ساۋىق باعدارلاماسىن تاماشالايدى. سونداي-اق, ولار سانگەرلەر ۇيىمداستىرعان سىيلىقتار مەن جۇلدەلەر ۇتىسىنا قاتىسادى.
گۇلدانا تالعاتقىزى
