«استانا» كونتسەرت زالىندا «تاۋەلسىزدىكتىڭ 30 جىلدىعى: سارىارقا – تاريحتىڭ باستاۋى» اتتى سالتاناتتى ءىس-شارا ءوتتى. مەرەكەلىك شارانى سارىارقا اۋدانىنىڭ اكىمى ەسەت بايكەن اشتى. ول اۋداننىڭ دامۋى تۋرالى ايتىپ, ەلوردالىقتاردى مەرەكەمەن قۇتتىقتادى.
«تاۋەلسىزدىك – حالقىمىزدىڭ باستى قۇندىلىعى. ەگەمەندىكتىڭ 30 جىلى ىشىندە ەلىمىز بارلىق قيىندىقتاردى ەڭسەرىپ, حالىقارالىق ارەناعا شىقتى. تاۋەلسىزدىگىمىزدىڭ جارقىن جەتىستىكتەرىنىڭ ءبىرى – ەلوردا. سارىارقا اۋدانى ەلوردانىڭ قالىپتاسۋىنا كۋا بولدى. ارقايسىسىڭىز ەلىمىزدىڭ يگىلىگى ءۇشىن ەڭبەك ەتىپ كەلەسىزدەر. بارشا قازاقستاندىقتى تاۋەلسىزدىك كۇنىمەن قۇتتىقتايمىن!» دەدى ەسەت بايكەن قۇتتىقتاۋ سوزىندە. نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ ءوز جۇمىسىن سول كەزدە حالىق ەڭ كوپ قونىستانعان سارىارقا اۋدانىندا باستاعانىن اتاپ ءوتتى.
«30 جىل ىشىندە ەلىمىزدە ۇلكەن وزگەرىستەر بولدى. ەلباسىنىڭ ۇستانعان ساياساتىنىڭ ارقاسىندا اينالامىزداعى كورشىلەرمەن كەلىسسوزدەر جۇرگىزىلىپ, مەملەكەتتىك شەكارامىز شەگەندەلدى, الەۋمەتتىك-ەكونوميكالىق, دەموگرافيالىق, ەكولوگيالىق رەفورمالار جاسالدى. ەلباسىنىڭ ەڭ ۇلى شەشىمدەرىنىڭ ءبىرى – استانانى اقمولاعا كوشىرۋ. ول كەزدە شاعىن پروۆينتسيالىق قالادا نەبارى 150 مىڭ تۇرعىن بولاتىن. مەن ءوز قىزمەتىمدى 2002 جىلى سارىارقا اۋدانىندا باستادىم. ول كەزدە ەكى اۋداننىڭ ىشىندە سارىارقانىڭ تۇرعىنى كوپ بولدى. قازىر قالامىزدا 4 اۋدان بار. قالا ءوسىپ كەلەدى, ۇيلەر سالىنىپ جاتىر, ال مۇنىڭ ءبارى اتقارىلعان ەڭبەكتىڭ ارقاسىندا. مەن استانامىزدىڭ جانە بۇكىل ەلدىڭ يگىلىگى ءۇشىن ەڭبەك ەتكەن جاندارعا العىسىمدى بىلدىرگىم كەلەدى. ەلوردامىز بۇكىل رەسپۋبليكا دامۋىنىڭ لوكوموتيۆىنە اينالدى» دەدى ەرلان كاناليموۆ.
سونىمەن قاتار نۇر-سۇلتان قالاسى قوعامدىق كەڭەسىنىڭ توراعاسى سانسىزباي ەسىلوۆ ەلوردالىق ارداگەرلەرگە قالانىڭ قالىپتاسۋى مەن دامۋىنا قوسقان ۇلەسى ءۇشىن العىسىن ءبىلدىردى.
سالتاناتتى جيىن بارىسىندا اۋدان تۇرعىندارىن ماراپاتتاۋ ءراسىمى ءوتتى. قر پرەزيدەنتىنىڭ جارلىعىمەن «قازاقستان تاۋەلسىزدىگىنە 30 جىل» توسبەلگىسىن 12 ادام, «حالىق العىسى» مەدالىن 8 ادام الدى. قالا اكىمى مەن اۋدان اكىمىنىڭ العىس حاتتارى قالامىزدىڭ 40 تۇرعىنىنا تاپسىرىلدى, ولاردىڭ اراسىندا قوعام قايراتكەرلەرى, بەلسەندى قالا تۇرعىندارى, ارداگەرلەر, الەۋمەتتىك ماڭىزى بار ماماندىق يەلەرى بار. سول سياقتى «التىن القا» جانە «كۇمىس القا» توسبەلگىلەرىمەن ماراپاتتالعان اۋداننىڭ كوپبالالى انالارى دا قۇرمەتكە بولەندى.
سالتاناتتى شارا قازاقستاندىق ەسترادا جۇلدىزدارى مەن نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ مەرەكەلىك كونتسەرتىمەن جالعاستى.
https://www.youtube.com/watch?v=ZddcRWxHFn4
