25 مامىر كۇنى ءتورت مىڭنان اسا استانالىق مەكتەپ بىتىرۋشىلەر سىڭعىرلاعان كۇمىس قوڭىراۋدىڭ داۋسىنا سوڭعى رەت قۇلاق قۇرىشىن قاندىرىپ, ءومىر دەيتىن ۇلكەن وزەننىڭ اعىسىنا قۇلاش ۇردى.
اق بانتيگىن تاعىنعان الماداي قىزدار مەن ماڭدايلارى جارقىراپ, الشاڭ باسقان ورىكتەي ۇلدار, ءاربىر ءۇيدىڭ الاقانعا سالىپ ايالاعان التىندارى ءدال وسى كۇنى ەلوردا كوشەلەرىنىڭ كوركىنە اينالدى دەسەك, ارتىق ايتقاندىق ەمەس. ولارعا ارناپ قالامىزدىڭ بىرنەشە جەرىندە, اتاپ ايتساق «اراي» ساياباعىندا, ستۋدەنتتەر اللەياسىندا, قارجى مينيسترلىگىنىڭ الدىنداعى الاڭدا مەرەكەلىك شارالار ۇيىمداستىرىلدى.
الدىمەن, «اراي» ساياباعىنا ات باسىن بۇردىق. مۇندا ۇستازدار قاۋىمى مەن اتا-انالاردان بولەك, اعا-اپالارىنا اق جول تىلەۋگە وقۋشىلار سارايىنىڭ ونەرپاز ورەندەرى جينالىپتى. ولار قۋانىش يەلەرىنىڭ الدىندا ءان ايتىپ, بي بيلەدى.
– بيىل 4042 وقۋشى مەكتەپ ءبىتىردى. ولاردىڭ ىشىندە 136 تۇلەك «التىن بەلگىگە» ۇمىتكەر, 3588 وقۋشى ۇلتتىق بىرىڭعاي تەستىلەۋگە قاتىسادى, – دەپ از-كەم مالىمەت بەردى ءبىلىم باسقارماسى باسشىنىڭ ورىنباسارى قاسىمحان سەنعازىەۆ. ونىڭ ايتۋىنشا, ەلوردالىق مەكتەپتەر ءۇشىن وقۋ جىلى ولجالى اياقتالىپ وتىر. ويتكەنى ءبىلىم ساپاسى مەن ءبىلىمدار شاكىرتتەردىڭ جەتىستىكتەرىمەن سالماقتاعاندا, كورسەتكىشتەرگە كوڭىل تولادى.
ءار مەكتەپتىڭ وسى ورتاق ىسكە قوسقان تامشىداي ۇلەسى ءدال سول كۇنگى وقۋ جىلىن قورىتىندىلاعان, بالاپانىنان باۋلىعان تۇلەكتەرىمەن قوش ايتىسقان سالتاناتتى جيىندا جارقىن-جارقىن تىلەككە جەلەۋ بولعانىندا ءسوز جوق.
بۇل كۇنى اقان قۇرمانوۆ اتىنداعى №17 مەكتەپ-گيمنازيانىڭ سوڭعى قوڭىراۋ سالتاناتىنا استانا قالاسى باسقارماسىنىڭ باسشىسى ەلميرا سۋحانبەرديەۆا, پارلامەنت ءماجىلىسىنىڭ دەپۋتاتى سۆەتلانا رومانوۆسكايا, پارلامەنت سەناتىنىڭ دەپۋتاتى قايرات يششانوۆ قادىرمەندى قوناق رەتىندە قاتىسىپ, اتا-انالارعا جىلى لەبىزدەرىن ءبىلدىردى.
ءبىلىم جانە عىلىم ۆيتسە-ءمينيسترى ەسەنعازى يمانعاليەۆ, استانا قالاسى ءبىلىم باسقارماسى باسشىسىنىڭ ورىنباسارى باعلان سماتاەۆا, ەسىل اۋدانى ءبىلىم ءبولىمىنىڭ باس مامانى الكەباتىر بايماقاشەۆتان قۇرالعان تاعى ءبىر مۇراپالى توپ سول جاعالاۋداعى №69 مەكتەپ-گيمنازيادا بولىپ, ۇستازدار قاۋىمى مەن وقۋشىلاردى جىلدىڭ جەمىستى اياقتالۋىمەن قۇتتىقتادى.
قۇربىلارىمەن قوشتاسۋ ءۆالسىن بيلەگەن بوزبالالار مەن بويجەتكەندەرگە ۇستازدارى سوڭعى رەت سىنىپ ساعاتىن وتكىزىپ, ءومىر دەگەن سىندارلى جولعا سالدى.
ەدىل بوكەەۆ
