ءبىلىم بايگەلەرىندە ەلوردا مارتەبەسىن اسقاقتاتقان مەكتەپ تۇلەكتەرىن سالتاناتتى تۇردە ماراپاتتاۋ داستۇرگە اينالدى. وسىعان وراي, جاڭا وقۋشىلار سارايىندا دارىندى بالالارعا ارنالعان «تريۋمف» بالى ءوتتى.
«استانا دارىنى» ورتالىعىنىڭ مالىمدەۋىنشە, 2013-2014 وقۋ جىلىندا 362 وقۋشى اقش, برازيليا, گوللانديا, گرۋزيا, يندونەزيا, رەسەي, تۇركيا, قىتاي, كيپر, كورەيا, ينديا ەلدەرىندە وتكەن حالىقارالىق وليمپيادالارعا قاتىسىپ, ناتيجەسىندە 234 مەدالدى قورجىنعا سالعان. ال, استانا قالاسىنىڭ كومانداسى سەگىز جىل قاتارىنان جالپى توپتىق سايىستا «ۇزدىك كوماندا» اتاعىنا يە بولىپ وتىر.
«تريۋمف» بالىنا وسى جىلى جالپى ورتا ءبىلىم بەرەتىن پاندەر بويىنشا وتكىزىلگەن حالىقارالىق, رەسپۋبليكالىق وليمپيادالار مەن عىلىمي جوبا سايىستارىنىڭ 200-دەن اسا جەڭىمپازى قاتىستى. باس جۇلدە يەگەرلەرى مەن ولاردى سايىسقا دايىنداعان عىلىمي جەتەكشىلەر بالدىڭ سالتاناتتى بولىمىندە ماراپاتتالدى.
«ەلىمىزدىڭ ماڭدايالدى ۋنيۆەرسيتەتتەرىنىڭ بىرىنە ەكونوميكا سالاسى بويىنشا وقۋعا ءتۇسۋ ويىمدا بار. قازاقستان ەكونوميكاسىنىڭ وركەندەۋىنە وزىندىك ۇلەس قوسۋدى ارماندايمىن» دەيدى №38 مەكتەپ-ليتسەيدىڭ 11-سىنىپ وقۋشىسى, گەوگرافيا پانىنەن رەسپۋبليكالىق وليمپيادانىڭ التىن مەدال يەگەرى نۇعمان الماس. التىن ۇيا مەكتەپتەرىمەن قوشتاسقان تۇلەكتەردىڭ مەرەكەلىك كوڭىل-كۇيى سازدى اۋەنگە تەربەلگەن ۆالس بيىمەن ۇندەستى. ال, ەسترادا ءانشىسى مارجان اراپباەۆا «قازاق ەلى وسىنداي!» ءانىن ورىنداعاندا جەڭىمپازداردىڭ جەڭىسكە ۇمتىلعان رۋحى ودان ءارى بيىكتەي تۇسكەنى انىق.
ءمادينا جاقىپ
