ساياسي جاڭعىرۋدى تالقىلادى

سەنات سپيكەرى ماۋلەن اشىمباەۆ ەو-نىڭ ادام قۇقىقتارى جونىندەگى ارناۋلى وكىلى يمون گيلمورمەن جانە ەو-نىڭ ورتالىق ازيا بويىنشا ارناۋلى وكىلى تەري حاكالامەن كەزدەستى.
جوعارى پالاتا توراعاسى كەزدەسۋدە قازاقستان ەۋروپالىق وداققا مۇشە بارلىق ەلدەرمەن جانە ينستيتۋتتارىمەن ءوزارا ءتيىمدى جانە پراگماتيكالىق تۇرعىداعى ىنتىماقتاستىقتى قالىپتاستىرۋعا زور ماڭىز بەرەتىنىن اتاپ ءوتتى. سەنات بۇل تۇرعىدا پارلامەنتارالىق ىنتىماقتاستىقتى ودان ءارى دامىتۋعا ەرەكشە نازار اۋدارادى.
تاراپتار مۇددەلى ماسەلەلەر بويىنشا ماڭىزدى اقپاراتپەن جۇيەلى الماسۋدى بەلگىلەيتىن ديالوگ الاڭدارىنىڭ جۇمىسىن ودان ءارى كۇشەيتۋ قاجەتتىگىن اتاپ ءوتتى. ەكىجاقتى ساۋدا مەن ينۆەستيتسيالار كولەمىن كەڭەيتۋ, وڭىرلىك قاۋىپسىزدىك ماسەلەلەرى بويىنشا پىكىر الماسۋ, دەموكراتيالىق قۇندىلىقتاردى ىلگەرىلەتۋ, سونداي-اق پرەزيدەنت قاسىم-جومارت توقاەۆتىڭ باستاماسىمەن ەلىمىزدە جۇرگىزىلىپ جاتقان ساياسي رەفورمالار باسىم تاقىرىپتاردىڭ قاتارىندا بولدى.
«مەملەكەت باسشىسى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىن ىسكە اسىرۋ جونىندەگى شارالار تۋرالى جارلىققا قول قويدى. ساياسي جاڭعىرۋ جانە ادام قۇقىقتارىن قورعاۋ بولىگى ەداۋىر كولەمدە ۇسىنىلىپ وتىر. اتاپ ايتقاندا, ساياسي جاڭعىرۋ باعىتىن جالعاستىرۋ اياسىندا بىرقاتار زاڭداردى قابىلداۋ جوسپارلانۋدا. زاڭناماعا اۋدان اكىمدەرىن تىكەلەي سايلاۋدى قاناتقاقتى جوبا تۇرىندە وتكىزۋ ءۇشىن قاجەتتى تۇزەتۋلەر ازىرلەنەدى» دەپ اتاپ ءوتتى سەنات توراعاسى.
كەزدەسۋدە مەملەكەتتىڭ تيىمدىلىگىن, ساياسي پروتسەستىڭ اشىقتىعى مەن باسەكەلەستىگىن ودان ءارى ارتتىرۋدىڭ كەپىلى رەتىندەگى قازاقستاندا جۇرگىزىلىپ جاتقان ساياسي جاڭعىرۋ تالقىلاۋدىڭ باستى تاقىرىبى بولدى.