باس پروكۋراتۋرانىڭ حابارلاۋىنشا, استانادا مەملەكەت مۇقتاجى ءۇشىن ساياجاي ۋچاسكەلەرىن الۋ ءتارتىبى زاڭدى دەپ تانىلدى.
ەستەرىڭىزدە بولسا, ەلوردانىڭ بىرقاتار تۇرعىندارى استانا قالاسى اكىمدىگىنىڭ مەملەكەت مۇقتاجى ءۇشىن جەر ۋچاسكەلەرىن الىپ قويۋعا بايلانىستى ارەكەتتەرىنە قارسى شاعىم بىلدىرگەن ەدى.
جۇرگىزىلگەن تەكسەرۋلەر ساياجاي ۋچاسكەلەرىن الىپ قويۋدىڭ زاڭ تالاپتارىنا قايشى كەلمەيتىنىن انىقتاعان. اتالمىش جەر ۋچاسكەلەرى مەملەكەتتىك جانە وڭىرلىك باعدارلامالارمەن كوزدەلگەن مەملەكەتتىك ماڭىزى بار جول, باسقا دا نىساندار قۇرىلىسىن سالۋ ءۇشىن الىپ قويىلعان. ال, ساياجاي يەلەرى ۇسىنىلعان وتەماقىنى جەتكىلىكسىز دەپ ەسەپتەپ, ونى 26 ملن تەڭگەگە دەيىن ارتتىرىپ, نەمەسە 2 -3 بولمەلى پاتەر بەرۋ تۋرالى تالاپتار قويعان.
ەلوردا اكىمدىگى وتەماقى مولشەرى تۋرالى كەلىسىمگە قول جەتكىزە الماعاندىقتان, ماجبۇرلەپ يەلىكتەن شىعارۋ تۋرالى تالاپ-ارىزدارمەن سوتقا جۇگىنگەن. زاڭدى كۇشىنە ەنگەن سوت شەشىمدەرى مەن استانا قالاسى اكىمدىگىنىڭ تالاپ-ارىزدارى قاناعاتتاندىرىلدى. ساياجاي ۋچاسكەلەرىنىڭ مەنشىك يەلەرىنە ءۇش ميلليون ءۇش ءجۇز مىڭنان التى ميلليون جەتى ءجۇز مىڭ تەڭگەگە دەيىن اقشالاي وتەماقى تولەي وتىرىپ, مەملەكەت مۇقتاجى جەر ۋچاسكەلەرىن يەلىكتەن شىعارۋ جۇرگىزىلسىن دەپ قاۋلى ەتىلدى.
سايكەسىنشە, ازاماتتاردىڭ ەكونوميكالىق مۇددەلەرى ەسكەرىلگەن, سەبەبى, الىنعان ساياجاي ۋچاسكەلەرىنە ولاردىڭ سالعان قاراجاتتارىنان ءۇش ەسەدەن اسا وتەماقى تولەنگەن.
