س. سەيفۋللين مۇراجايىندا داڭقتى بالۋان قاجىمۇقان مۇڭايتپاسۇلىنىڭ تۋعانىنا 150 جىل تولۋىنا ارنالعان «كۇش اتاسى – قاجىمۇقان» ءدارىسى ءوتتى. ءدارىستى بەلگىلى ءانشى, ونەر زەرتتەۋشى, تۇلعاتانۋشى, قازاقستاننىڭ ەڭبەك سىڭىرگەن ءارتىسى سەرىك وسپانوۆ وقىدى.
قازىر قاجىمۇقاننىڭ بالۋاندىعى تۋرالى عانا كوپ ايتىلادى. ونىڭ باسقا قىرلارى جايلى ەستي قويمايمىز. ول قازاق ايتاتىنداي سەگىز قىرلى, ءبىر سىرلى ادام ەدى. مۇڭايتپاستىڭ ۇلى ادەبيەت پەن ونەرگە دە جاقىن بولعان. جانىنان ولەڭ شىعارىپ, ءان سالعان. بىرنەشە ولەڭى وسى كۇندەرى ساقتالعان دا.
– قاجىمۇقان بابامىز ءتاپ-ءتاۋىر دومبىرا شەرتىپ, ءان سالعان. ول تۋرالى الەكساندر زاتاەۆيچ «قازاقتىڭ 1000 ءانى» جيناعىنىڭ ەسكەرتۋىندە بالۋان شولاقتىڭ «عاليا» ءانىن عايني ماشيروۆا دەگەن تاتار قىزىنا قاجىمۇقان بالۋان ۇيرەتكەنىن ايتادى. ال 1947 جىلى الماتىدا ءابدىلدا تاجىباەۆتىڭ ۇيىندە مۇقاڭ دومبىراعا قوسىلىپ, ءابدىلدا ەكەۋى ساكەننىڭ «اقساق كيىك» ءانىن ايتقانى تۋرالى ءسابيت مۇقانوۆتىڭ ەستەلىگى بار. اتاقتى قاجىمۇقان قازاق توپىراعىندا جارالعان ءار ادامنىڭ بويىنان تابىلاتىن اقىندىق قاسيەتتەن دە ادا بولماعان. قاجەكەڭ اياق استىنان وتكىر ءازىل, اتالى ءسوزدى قيسىنىن تاۋىپ, سۋىرىپ سالاتىن ۇشقىر ويدىڭ يەسى دە بولعان. دومبىرا شەرتىپ, داۋىسى قوڭىرجاي, جاعىمدى ەدى, – دەيدى سەرىك وسپانوۆ. قاجىمۇقاننىڭ:
اتاندىم مۇقان پالۋان
بالا جاستان,
ىشىندە كۇشتىلەردىڭ
بولدىم استام.
تالاي-تالاي جەرلەردىڭ
ءدامىن تاتىپ,
ءوتتى داۋرەن وسىلاي ءبىزدىڭ باستان, – دەگەن ءبىر شۋماق ولەڭىن كەلتىرگەن زەرتتەۋشى بالۋاننىڭ تۋعان جەرگە دەگەن ساعىنىشتان تۋعان تولعاۋى دا بار ەكەنىن ايتادى.
