ەرتەڭنەن باستاپ استانادا جول قوزعالىسى ەرەجەسىن قالت جىبەرمەيتىن «سەرگەك» فوتو-بەينە تىركەگىش جۇيەسى ىسكە قوسىلادى. پيلوتتىق جوبا بۇعان دەيىن سىناق رەجيمىندە جۇمىس ىستەسە, ەندى جول ەرەجەسىن بۇزعان كولىك جۇرگىزۋشىلەرىنە ايىپپۇل سالىنا باستايدى.
ەلوردالىقتاردىڭ قاۋىپسىزدىگى ءۇشىن قولعا الىنعان جوبانىڭ مۇمكىندىگى كوپ. بەينەباقىلاۋ, تالداۋ جانە بولجام جاساۋ ينتەللەكتۋالدى جۇيەسى قۇقىقبۇزۋشىلىقتىڭ الدىن الىپ, جول اپاتىن ازايتۋعا سەپتىگىن تيگىزەتىنى ءسوزسىز. ەڭ الدىمەن, بۇل جۇيە جىلدامدىق قوزعالىسىن اسىرعانى ءۇشىن جانە Bus Lane سىزىعىن كەسىپ ءوتۋ سياقتى بۇزۋشىلىقتاردى تىركەيتىن بولادى. جاڭادان ىسكە قوسىلاتىن بۇل بەينەباقىلاۋ كامەرالارى تاۋلىك بويى جۇمىس ىستەيدى. ەرەجە بۇزىپ, كامەراعا ءتۇسىپ قالعان كولىك يەلەرىنىڭ دەرەگى احۋالدىق ورتالىققا وڭدەلۋ ءۇشىن جىبەرىلەدى.
كەشەننىڭ تەستىلىك كەزەڭىندەگى مالىمەتىنە سۇيەنسەك, تامىز ايىنىڭ وزىندە اۆتوكولىك يەلەرى وتىزعا جۋىق جول ەرەجەسىن بۇزعان. الايدا, ەندى كەشىرىم بەرىلمەيدى.
«بۇل باستامانى جۇزەگە اسىرا وتىرىپ, ءبىز Smart City» تەحنولوگياسىن ەنگىزۋ ارقىلى ەلوردا تۇرعىندارى مەن قوناقتارىنىڭ ءومىرىن قاۋىپسىز جانە جايلى جاعدايمەن قامتاماسىز ەتۋدى ءوزىمىزدىڭ باستى ماقساتىمىز ەتىپ وتىرمىز» دەيدى استانا قالاسىنىڭ ينۆەستيتسيالار جانە دامۋ باسقارماسىنىڭ باسشىسى الىشەر ابدىقادىروۆ. ونىڭ ايتۋىنشا, جىل سوڭىنا دەيىن كوشە قيىلىستارى مەن قالانىڭ شەتكى ايماقتارىندا جانە كوپشىلىك ورىنداردا 13 000 بەينەباقىلاۋ كامەرالارى قولدانىسقا ەنەدى.
ايىپپۇل ماسەلەسىنە كەلسەك, تولەۋدىڭ ءتۇرلى تاسىلدەرى قاراستىرىلعان. اتاپ ايتقاندا, قولما-قول اقشامەن ەكىنشى دەڭگەيلى بانكتەر نەمەسە «قازپوشتا», Kaspi جانە QIWI كوشەلەك تەرمينالدارى ارقىلى تولەۋگە بولادى. سونىمەن قاتار بانك كارتاسىمەن egov.kz پورتالىندا تىركەلۋ ارقىلى ونلاين-تولەم جاساۋعا جانە HandyPay, MyPay موبيلدىك قوسىمشالارىن پايدالانعان ءتيىمدى.
جالپى, «سەرگەك» فوتو-بەينە تىركەگىش جۇيەسىنىڭ ەرەكشەلىگى تۋرالى گازەتىمىزدىڭ الداعى سانىندا كەڭىنەن ايتاتىن بولامىز.
گۇلميرا ايماعانبەت
