پرەمەر-مينيستر اسقار مامين قازاقستانعا جۇمىس ساپارىمەن كەلگەن رف ۇكىمەتىنىڭ توراعاسى ميحايل ميشۋستينمەن كەلىسسوز جۇرگىزدى.
كەزدەسۋ «استانا» حالىقارالىق قارجى ورتالىعىنىڭ الاڭىندا ءوتتى. تاراپتار ساۋدا-ەكونوميكا, ونەركاسىپتىك كووپەراتسيا, كولىك-لوگيستيكا, ەنەرگەتيكا جانە باسقا دا سالالارداعى ىنتىماقتاستىقتى ودان ءارى ارتتىرۋ ماسەلەلەرىن تالقىلادى. ەۋرازيالىق ەكونوميكالىق وداق فورماتىنداعى ءوزارا ءىس-قيمىلدىڭ وزەكتى ماسەلەلەرى قارالدى. رەسەي – قازاقستاننىڭ نەگىزگى ساۋدا-ەكونوميكالىق سەرىكتەسى. وسى جىلى ەلدەر اراسىنداعى ساۋدا-ەكونوميكالىق ىنتىماقتاستىق سەرپىنى بىرتىندەپ قالپىنا كەلتىرىلۋدە. بيىلعى قاڭتار-ماۋسىم ايلارىندا ەكىجاقتى تاۋار اينالىمى $10,7 ملرد قۇرادى, بۇل 2020 جىلدىڭ سايكەس كەزەڭىندەگى كورسەتكىشتەن 27 پايىزعا جوعارى. قازىرگى ديناميكا ساقتالعان جاعدايدا, ەكى ەل اراسىنداعى ساۋدا كولەمى بيىل $23 ملرد-تان اسۋى مۇمكىن. قازاقستاندا رەسەيدىڭ قاتىسۋىمەن 7791 كاسىپورىن جانە 3325 قازاقستان-رەسەي بىرلەسكەن كاسىپورىندارى جۇمىس ىستەيدى. رەسەيلىك كومپانيالار قر ەكونوميكاسىنا سالىنعان قاراجات كولەمى بويىنشا باستى ينۆەستورلاردىڭ بەستىگىنە كىرەدى. سوڭعى 10 جىلدا رەسەي قازاقستانعا شامامەن $12,6 ملرد ينۆەستيتسيا سالدى. رەسەيلىك كومپانيالاردىڭ ينۆەستيتسيالىق پورتفەلى ءاربىر سالادا دەرلىك بار. جالپى سوماسى $5,3 ملرد قۇرايتىن, ونەركاسىپتىك كووپەراتسيا, ساۋدا, قۇرىلىس يندۋسترياسى, فارماتسەۆتيكا, مۇناي-حيميا جانە جەڭىل ونەركاسىپ سالالارىنداعى 30 بىرلەسكەن ءىرى جوبا ىسكە اسىرۋ جانە پىسىقتاۋ ساتىسىندا تۇر. مىسالى, «تاتنەفت»-پەن بىرلەسىپ شينا ءوندىرۋ زاۋىتى, «كاماز» جاق-پەن شويىن قۇيۋ جانە جەتەكشى بەلدەمەلەردىڭ باس بەرىلىستەرىنىڭ رەدۋكتورلارىن ءوندىرۋ زاۋىتى سالىنىپ جاتىر جانە ت. ب. وسى جىلدىڭ 6 ايىندا قازاقستان مەن رەسەي ارقىلى ورتالىق ازيا, ەۋروپا, قيىر شىعىس باعىتتارىندا بارلىعى 406,5 مىڭ جفە تاسىمالداندى, بۇل 2020 جىلدىڭ سايكەس كەزەڭىندەگىدەن 48 پايىزعا ارتىق. قازاقستان اۋماعى ارقىلى كونتەينەرلىك تاسىمالدار كولەمى 326,2 مىڭ جفە (+58 پايىز) قۇرادى. كەلىسسوز قورىتىندىسى بويىنشا ەكى ەلدىڭ ۇكىمەت باسشىلارىنىڭ قاتىسۋىمەن كەلەسى بىرقاتار قۇجاتقا قول قويىلدى.
