بىرەر اي بۇرىن استانا اكىمدىگىنىڭ باستاماسىمەن 1 ملن تەڭگەنىڭ تۇرعىن ءۇي جارناسى دارىگەرلەرگە, پوليتسەيلەرگە جانە مۇعالىمدەرگە, ياعني باس-اياعى 90 قىزمەتكەرگە تاپسىرىلعان بولاتىن. جاقىندا وسى جەڭىلدىك بويىنشا «تۇرعىن ءۇي قۇرىلىس جيناق بانكى» (تقجب) ارقىلى پاتەر العانداردىڭ العاشقىسى قونىس تويىن تويلاماق.
تۇرعىن ءۇي سەرتيفيكاتىن الۋشىلاردىڭ ءتىزىمىن قالا اكىمدىگى ازىرلەگەن. ال ونىڭ باستى تالابى مامانداردىڭ استانادا باسپاناسى بولماۋى, الايدا تۇراقتى تىركەۋدە بولۋى, سونداي-اق اتالعان بانكتىڭ سالىمشىلارى بولۋى شارت ەتىلىپتى.
– قالا اكىمدىگى قىزمەتكەرلەردىڭ باسپانالى بولۋى ءۇشىن قوسىمشا 2 ملرد تەڭگە ءبولۋدى جوسپارلاپ وتىر. بۇل ولاردىڭ ەڭ تومەنگى باستاپقى جارناسىن, ياعني 20 پايىزىن جيناۋىنا سەپتىگىن تيگىزەدى. ال ارى قاراي بانك جىلدىق 7 پايىز مولشەرى بويىنشا ونى ارى قاراي تومەندەتۋمەن نەسيە بەرەدى, – دەيدى اتالعان بانكتىڭ ورتالىق فيليالىنىڭ ديرەكتورى جانسۇلتان ماتاەۆ.
ال باسپانالى بولعان №58 مەكتەپ-گيمنازياسىنىڭ مۇعالىمى گۇلبانۋ سەكەن قوستاناي وڭىرىنەن كەلىپ, 4 جىل بويى پاتەر جالداپ تۇرعانىن ايتتى. ۇستازدىق ءوتىلى 16 جىلدى قۇراپتى.
– باس-اياعى 40 شارشى مەتر بولاتىن ءبىر بولمەلى پاتەردىڭ قۇنى 12 ملن 896 مىڭ تەڭگەگە شىعىپ, نەسيە 19 جىلعا راسىمدەلدى. ونىڭ العاشقى 8 جىلىندا 7 پايىزبەن 103 مىڭ تەڭگە تولەسەك, قالعان 11 جىلىن 3,8 پايىزبەن 59 مىڭ تەڭگەمەن قايتارامىز. قىمباتقا شىققان سياقتى, – دەيدى ۇستاز كوڭىلىندە قۋانىشى مەن كۇدىگى ارالاس.
