كوكتەمنىڭ العاشقى كۇنىندە استانالىق بەلسەندى قاريالار ق.مۇڭايتپاسوۆ اتىنداعى ورتالىق ستاديونعا جينالىپ, شاڭعى تەبۋدەن ءوزارا جۇيرىكتەرىن انىقتادى. العىس ايتۋ كۇنىنە تۋرا كەلگەن بۇل شارانى ۇيىمداستىرۋعا قالالىق ارداگەرلەر كەڭەسى ۇيىتقى بولدى.
بۇل جارىسقا قاتىسۋعا 50-دەن اسا قارت نيەت ءبىلدىردى. ولاردىڭ ىشىندە قيمىلى شيراق اپالارىمىز دا بار. سوندىقتان جينالعان قاۋىم ەرلەر جانە ايەلدەر بولىپ, ەكىگە ءبولىنىپ جارىستى.
– ءوزىم كوكشەتاۋ ولكەسىنىڭ تۋماسىمىن. ءبىز جاقتا قار قالىڭ تۇسەدى. سوندىقتان شاڭعىعا جاستايىمنان اۋەس بولدىم. ال استاناعا قونىس اۋدارعانىما بەس جىلدان ەندى استى. وسى قالاعا كوشىپ كەلگەلى مۇنداي بۇقارالىق جارىستاردىڭ ەشقايسىسىنان قۇر قالعان ەمەسپىن. جازدا جۇگىرىپ جارىسسام, قىستا شاڭعى تەبۋدەن سايىسقا تۇسەمىن. اقپان ايىندا شاڭعىشىلار كۇنىنە وراي ۇيىمداستىرىلاتىن شارالارعا ۇزبەي قاتىسىپ كەلەمىن. ەكى جىل قاتارىنان ءبىرىنشى ورىن, ءبىر رەت ەكىنشى ورىن الدىم, – دەدى سەيىلبەك سەگىزباەۆ اتتى اقساقال.
سونداي-اق, ول شاڭعى جارىسىندا كوش باسىندا جۇرەتىن قاريالاردىڭ قاتارى دا سيرەپ كەلە جاتقانىن ايتادى. ولاردىڭ اراسىندا قۋاتى كەمىپ, جاسى سەكسەننەن اسقان قارتتار دا بار ەكەن. ءاردايىم الدىڭعى ورىننان كورىنەتىن بىرنەشە شاڭعىشى اقساقالداردىڭ بۇل جارىستا بوي كورسەتپەۋىنەن جاڭا ەسىمدەردىڭ پايدا بولۋى مۇمكىن.
سالاۋاتتى ءومىر سالتىن ناسيحاتتاۋعا باعىتتالعان جارىسقا قاتىسۋعا ءار اۋداننىڭ ارداگەرلەر ۇيىمى ءوز شاڭعىشىلارىن ۇسىندى. بۇل جارىستىڭ ماقساتى جەڭىس ەمەس, ەڭ الدىمەن بىرلىك-ىنتىماق ەكەنى اتالىپ ءوتتى.
جالپى كوماندالىق ەسەپ بويىنشا سارىارقا اۋدانىنىڭ قاريالارى 1-ورىندى يەلەندى. ودان كەيىنگى ورىن ەسىل اۋدانىنا بۇيىردى. ۇشتىكتى الماتى اۋدانى تۇيىندەدى.
ورىنبەك وتەمۇرات
