كەشە استانادا «ەكسپو-2017» حالىقارالىق مامانداندىرىلعان كورمە اياسىندا شىعىس قازاقستان وبلىسىنىڭ مادەني كۇندەرى باستالدى. «بايتەرەك» مونۋمەنتىنىڭ الاڭىندا جانە «ستۋدەنتتىك» ساياباعىنداعى «پارۋس» ساحناسىندا ءوڭىردىڭ شىعارماشىلىق ۇجىمدارىنىڭ كونتسەرتىمەن اشىلعان شىعىستىقتاردىڭ شاشۋى 25 شىلدەگە دەيىن جالعاسادى.
مادەني باعدارلاماعا سايكەس ەلوردادا وسى ايماق تاريحىنان سىر شەرتەتىن «اتا-بابالار مۇراسى» ارحەولوگيالىق ارتەفاكتىلەر كورمەسى جانە «تۋعان جەرىمە» اتتى فوتوكورمە ۇيىمداستىرىلادى. كەشە م.گوركي اتىنداعى مەملەكەتتىك اكادەميالىق ورىس دراما تەاترى ساحناسىندا وبلىستىق اباي اتىنداعى تەاترى ە.پورتەردىڭ «پوللياننا» سپەكتاكلىن قويىپ ۇلگەردى.
ال الداعى دەمالىس كۇندەرى «ەتنواۋىل» ۇلتتىق-مادەني كەشەنىندە ايماق قولونەرشىلەرىنىڭ كورمەسى مەن ونەر شەبەرلەرىنىڭ قاتىسۋىمەن تەاترلاندىرىلعان قويىلىم ۇسىنىلادى.
روزا رىمباەۆا باستاعان قازاقستاندىق ەسترادا جۇلدىزدارى 25 شىلدە كۇنى «ەكسپو» قالاشىعىنداعى امفيتەاتردا وتەتىن «نۇرلى شىعىستان – نۇرلى الەمگە نۇر شاشۋ» اتتى كونتسەرتتە ءان شىرقاپ, ءوڭىر مادەني كۇندەرىن تۇيىندەيدى. بۇدان كەيىن ەستافەتانى جامبىل وبلىسى جالعايدى.26 شىلدە كۇنى باستالاتىن اۋليەاتا ءوڭىرىنىڭ مادەني كۇندەرى 30 شىلدەگە دەيىن جالعاسادى.
امانعالي قالجانوۆ
