«سلاۆيان بازارى» تاعى دا قازاققا بۇيىردى
«سلاۆيان بازارى-2016» XXV حالىقارالىق ونەر بايقاۋىندا قازاقستاندىق ءانشى Adam بىرىنشى ورىندى يەلەندى.
ءانشىنىڭ كۇندەلىكتى ءان ورىنداۋى ءبىر باسقا, ساحنادا شىرقاۋى ءبىر باسقا بولسا, حالىقارالىق جارىستاردا شارىقتاتا شىرقاۋى بولەك دۇنيە. ءار ءانشى بيىك شىڭداردان كورىنىپ, ءوزىن-ءوزى جەتىلدىرگىسى كەلەدى. سوڭعى جىلدارى قازاق ەستراداسىندا حالىقارالىق بايقاۋلاردا بيىك مىنبەرلەردەن جۇلدەلى ورالىپ جۇرگەن تالانتتى انشىلەرىمىز كوبەيىپ كەلەدى. بىلتىر ەلىمىزدىڭ اتىنان «سلاۆيان بازارى» بايقاۋىنا ديماش قۇدايبەرگەنوۆ قاتىسىپ, گران-پريمەن ورالسا, بيىل وسى كوشتىڭ تىزبەگىن جاس ءانشى Adam جالعاستىردى.
فەستيۆالدىڭ العاشقى كۇنى جەرلەسىمىز Adam نيكولاي نوسكوۆتىڭ «ءمىناجات» ءانىن ورىنداسا, كونكۋرستىڭ فينالىندا سەم ءسميتتىڭ «I’m Not The Only One» ءانىن شىرقادى. ناتيجەسىندە 155 ۇپاي جيناپ, بەلارۋستىق الەكسەي گروسسقا ەكى ۇپاي ەسە جىبەرىپ الدى. دەسە دە, قازاق ەلىنە ەكىنشى جەڭىستى اپەرگەن ءانشىنىڭ تابىسى وتانداستارىمىزدى زور قۋانىشقا بولەدى. ءانشى ءوزىنىڭ «Instagram» الەۋمەتتىك جەلىسىندەگى پاراقشاسىندا جەڭىسىن قازاقستاندىقتارعا ارناعانىن جازعان بولاتىن.
ايتا كەتەيىك, «سلاۆيان بازارى» بايقاۋىنا 21 ەلدەن جاس ورىنداۋشى قاتىستى. وسىنشاما ۇكىلەپ قوسقان ۇمىتكەرلەردىڭ اراسىنان سۋىرىلىپ شىعۋ وڭاي شارۋا ەمەس. جاس ءانشى بۇعان دەيىن دە تالاي بەلەستەردەن ءوتىپ, ىسىلعان. ايتالىق, قازاقستان اتىنان يۋرمالادا وتكەن «جاڭا تولقىن» بايقاۋىنا قاتىسىپ, بەسىنشى ورىن السا, ودان بولەك, «SuperStar KZ», «X-Factor» باعدارلامالارىنا دا قاتىسىپ, باعىن سىناعان.
تىڭدارمان تالعامىنا قاراي ءوز ءانشىسىن ارقاشان ىزدەپ تۇرادى. دەگەنمەن, ءىرى بايقاۋلار شىن تالانتتاردى عانا ىرىكتەپ, ساحنا الەمىنە جولداما بەرەدى. بايقاعانىمىزداي, قازاق ەستراداسىندا ديماش, ادەمى, Adam سەكىلدى جاڭا تولقىننىڭ لەگى قالىپتاسىپ كەلە جاتقانىن اڭعارۋ قيىن ەمەس.
جانسايا سىدىقباي