«TechConnect» جارىسىندا جەڭىمپاز اتانعان «Wipon» جوباسى جايلى جازعانىمىز ەستەرىڭىزدە شىعار؟! جۋىردا اتالعان كومپانيانىڭ ديرەكتورى رۇستەم سۇلتانمۇراتوۆپەن جاقىنىراق تانىسۋدىڭ ءساتى ءتۇستى. ونەرتاپقىش جىگىت الماتىداعى كيمەپ ۋنيۆەرسيتەتىن ءتامامداپتى. ءوزى – نەبارى جيىرما ءتورت جاستا. ەلورداعا كوشىپ كەلگەلى ءبىر جىلدان ەندى اسقان.
– رۇستەم, «Wipon» قوسىمشاسىن شىعارۋ يدەياسى ويىڭا قالاي كەلدى؟
– دۇكەننەن بىرنەشە رەت جالعان تاۋاردى ساتىپ العان سوڭ, وسى پروبلەمانى شەشەتىن جول ويلاستىرا باستادىق. دوستارىمنىڭ ءبارى – تەحنيكالىق ينجەنەرلەر. ءسويتىپ, بىلتىرعى تامىز ايىندا ىسكەرلىك كوماندامىزدى جيناپ, جاڭا جۇيەنى قۇراستىرۋعا كىرىستىك. وندا دا مەيلىنشە وڭايىراق ادىستەردى پايدالانۋعا تىرىستىق. ادەتتە كەز كەلگەن ادام سمارتفونىن قولىنان تاستامايدى. بىزگە دە كەرەگى سول, ياعني, قاي ۋاقىتتا دا قولايلى بولاتىن قۇرال ىزدەگەنبىز. اقىرى, اقىلداسا وتىرىپ, كونترافاكتىلى ءونىمدى انىقتايتىن ءموبيلدى قوسىمشا جاساپ شىعاردىق. بۇگىندە ول قوسىمشانى «Play Market», «App Store» جانە «Windows Store» دۇكەندەرىنەن جۇكتەپ الۋعا بولادى.
– مەن سونى تەلەفونىما جۇكتەپ العان ەدىم. باعدارلامانى اشىپ, قوسىلعان كامەراعا ەرىن دالابىنىڭ شتريح-كودىن توستىم. الايدا ەشتەڭە كورسەتىلمەدى…
– كوسمەتيكالىق تاۋارلاردى تەكسەرەتىن قىزمەتتى ءالى ەنگىزگەنىمىز جوق. ازىرگە «Wipon» ارقىلى الكوگولدى سۋسىنداردىڭ ساپاسى قاداعالانادى. ول ءۇشىن دۇكەننەن اكەلىنگەن ىشىمدىكتىڭ اكتسيزدىك ماركاسىن سمارتفونمەن سكانەرلەيمىز. باعدارلاما بىردەن ونىڭ جاساندى نە تۇپنۇسقا ەكەنىن ايىرىپ بەرەدى.
– ءار سكانەرلەۋدىڭ قورىتىندىسى قانداي دا ءبىر جەردە تىركەلە مە؟
– ءيا. ءبىز مەملەكەتتىك كىرىستەر كوميتەتىمەن كەلىسىمشارتقا وتىرعانبىز. «Wipon» باعدارلاماسىنىڭ كومەگىمەن ايقىن بولعان اقپاراتتاردىڭ ءبارى كوميتەت سايتىنداعى جەكە كابينەتتە ساقتالادى. سوندىقتان ونداعىلار قاي دۇكەندە قانداي كونترافاكتىلى ءونىم ساتىلىپ جاتقانىنان ارقاشان حاباردار. سونداي تاۋاردىڭ تابىلعانى تۋرالى مالىمەت تۇسە سالىسىمەن, دەرەۋ الگى دۇكەندى تەكسەرەدى. قازىردىڭ وزىندە استانادا 120-دان اسا تەكسەرىس جۇرگىزىلىپ, 16 مىڭعا جۋىق كونترافاكت ىشىمدىك اشكەرەلەندى.
– مۇنشاما پايدالى جوبانى باسقا دا تاۋار تۇرلەرىنىڭ جالعان ەمەستىگىن انىقتاۋعا پايدالانار بولساق, نۇر ۇستىنە نۇر عوي.
– ارينە. ەندى ءبىز «Wipon» قوسىمشاسىن ازىق-تۇلىك پەن ءدارى-دارمەكتىڭ ساپاسىن باقىلايتىن قۇرىلعى رەتىندە دە دامىتامىز. بۇيىرسا, كەلەر جىلدىڭ ەكىنشى توقسانىنان باستاپ وسى فۋنكتسيا قولجەتىمدى قىزمەتكە اينالادى.
– سول فۋنكتسيا ىسكە قوسىلسا, ءونىمنىڭ حالال ەكەنىن دە ايعاقتاۋ مۇمكىن بە؟
– بۇل دا جوسپاردا بار. وكىنىشكە قاراي, قازىرگى ۋاقىتتا ءوزىن حالال دەپ جارنامالايتىن كوپ كومپانيانىڭ ارنايى سەرتيفيكاتى جوق. حالال دەگەن ۇعىمدى شوشقانىڭ ەتىنەن جاسالماعان ءونىم دەپ قانا تۇسىنبەۋ كەرەك. ونىڭ ساقتالۋ ءتاسىلى, قۇرامىنداعى قوسپالارى, دايىندالۋ امالى – ءبارى-ءبارى ناقتى تالاپتارمەن بەكىتىلەدى. سولاردىڭ ۇدەسىنەن شىققاندا عانا تاۋار تولىقتاي حالال. جەتىلدىرىلگەن «Wipon» ءدال سونداي جالعان ءونىمدى «تانىپ», بەلگى بەرەدى.
– ينتەرنەت-دۇكەننەن ساتىپ الىنعان دۇنيەلەردى دە تەكسەرەتىن ءبىر جۇيە قۇرىلماعان. تاۋاردىڭ تۇپنۇسقالىعىنا ەشقانداي كەپىلدىك جوق. وسى ولقىلىقتى جويۋ قولدارىڭىزدان كەلە مە؟
– الداعى ۋاقىتتا «Aliexpress, «E-bay», «Tao-bao» سياقتى ءىرى ينتەرنەت-دۇكەندەرمەن ورتاق شارت جاساسۋ ويىمىزدا ءجۇر. ماقساتىمىز ورىندالسا, ول دا – ۇلكەن جەتىستىك. ءبىر جاعىنان, تۇتىنۋشىلاردى, ەكىنشى جاعىنان, كاسىپورىن يەسىن الاياقتىقتان قورعاپ, ءبىراز زاڭسىزدىقتى تۇساۋلار ەدىك.
– وتاندىق نارىقتا باسەكەلەستەرىڭىز بار ما؟
– جالپى, الەمدە قۇرىلىمى, قىزمەتى بىزدىكىنە ۇقساس بىرنەشە كومپانيا بار. ءبارىن دە جاقسىلاپ زەرتتەدىك. كەمشىن تۇستارىن قايتالاماي, بارىنشا ىڭعايلىراق پلاتفورما قۇرۋدى كوزدەدىك. شتريح-كودتى سكانەرلەيتىن جەكەلەي باعدارلامالار كوپ. بىراق ولار تەك زاتتىڭ اتىن عانا ايتادى. كونترافاكتىنى انىقتايتىن دا قوسىمشالار بار, بىراق ولار تىم كۇردەلى. ارقايسىنىڭ وسىنداي سيپاتىن ءبىز ءبىر قوسىمشاعا جيناقتادىق. ال وتاندىق نارىقتا باسەكەلەستەرىمىز جوق.
– جوبانى جاساۋعا قانشا قارجى كەتتى؟ دەمەۋشىلەر بولدى ما؟
–باس-اياعى 200 مىڭ اقش دوللارىن جۇمسادىق. العاشقى قارجىلاي كومەككە «دۇنيەجۇزىلىك بانكتىڭ» تەحنولوگيالاردى كوممەرتسيالاندىرۋ جوباسى بويىنشا قول جەتكىزدىك. جاقىندا قاتىسقان «TechConnect» سايىسىنان 25 مىڭ اقش دوللارىن ۇتتىق. وسىلاردىڭ ارقاسىندا ەشقانداي ماتەريالدىق قيىندىققا ۇشىراماي, ەمىن-ەركىن جۇمىس جاساۋىمىزعا مۇمكىندىك تۋدى.
– جوبانىڭ ءوزىن-ءوزى اقتاۋى دا ۇلكەن مىندەت قوي.
– كەلەسى جىلدان باستاپ پايدا تاباتىن مەحانيزمدەردى ىسكە قوسامىز. ازىرگە قوسىمشانى جۇكتەۋ تەگىن. اۋەلى تۇتىنۋشىلاردى, وندىرۋشىلەردى شاقىرىپ, مۇددەمىزبەن تولىقتاي تانىستىرىپ العاندى ءجون كوردىك. نەگىزىنەن IT-جوبالاردىڭ جۇمىس ىستەۋ ءتاسىلى وسىنداي. تامىز ايىنان بەرى 12 مىڭنان اسا ادام «Wipon» قوسىمشاسىن جۇكتەگەن. «TechConnect» كونكۋرسىنان سوڭ ول كورسەتكىش 2-3 مىڭعا ءوستى. بۇگىندە 16 مىڭعا جۋىق پايدالانۋشىمىز بار.
– «Wipon» دەگەن اتاۋ نەنى بىلدىرەدى؟
– بۇل – قىسقارتىلعان ۇعىم. ماعىناسى – زياتكەرلىك مەنشىكتى قورعاۋعا ارنالعان حالىقارالىق جۇيە. وسى ماقساتتا قولدان كەلگەنشە ايانىپ قالماۋعا تىرىسامىز. كولەڭكەلى ەكونوميكامەن كەشەندى كۇرەستى كۇشەيتۋگە اتسالىسامىز. قازىردىڭ وزىندە ءبىز تەكسەرگەن ونىمدەردىڭ 30 پايىزى كونترافاكت بولىپ شىقتى. بولاشاقتا قىزمەت اياسىن كەڭەيتسەك, بۇدان دا كادەلىرەك تىرلىك تىندىرامىز.
– اڭگىمەڭىزگە راحمەت. ىستەرىڭ العا باسسىن.
بوتاگوز ماراتقىزى
