ەلوردا اكىمى التاي كولگىنوۆ قالانىڭ سول جاعالاۋىندا سالىنىپ جاتقان وقۋشىلار سارايىنىڭ قۇرىلىسى, وقۋشى ورىندارىنىڭ تاپشىلىعىن ازايتۋ جانە بوس ۋاقىتتى پايدالى وتكىزەتىن ورىندار جايلى ءمالىم ەتتى.
«وسىعان دەيىن «نوماد», «سارمات», «ينفينيتي» جانە ت.ب. تۇرعىن ءۇي كەشەندەرىنىڭ تۇرعىندارى قالانىڭ سول جاعالاۋىندا وقۋشىلار سارايىن, جاڭا مەكتەپ جانە گۇلزار سالۋ ماسەلەلەرى بويىنشا جۇگىندى. بۇل پروبلەمالاردىڭ ءبارى شەشىلدى. مىسالى, تۇران داڭعىلى بويىندا جەكە ينۆەستيتسيالار ەسەبىنەن وقۋشىلار سارايىنىڭ قۇرىلىسى باستالدى. قازىرگى ۋاقىتتا الاڭدى بولشەكتەۋ (دەمونتاج) جانە تەگىستەۋ جۇمىستارى ءجۇرىپ جاتىر. وقۋشىلار سارايىنىڭ جالپى اۋدانى شامامەن 5 مىڭ شارشى مەتردى قۇرايدى. كەشەندە باسسەين, روبوتوتەحنيكا جانە IT-باعدارلامالاۋ كابينەتتەرىن, حورەوگرافيا, سپورتتىق-بال ءبيى, گيمناستيكا, شاحمات جانە ت.ب. زالدارىن اشۋ جوسپارلانىپ وتىر. بۇل وقۋشىلار سارايى قالا تۇرعىندارىنىڭ ءوتىنىشى بويىنشا سول جاعالاۋدا اشىلماق. سەبەبى العاشقى سالىنعان وقۋشىلار سارايى قالانىڭ وڭ جاعالاۋىندا ورنالاسقان. بىرنەشە ءۇيدىڭ تۇرعىندارى كوتەرگەن ەكىنشى ماسەلە – مەكتەپ قۇرىلىسى. قابانباي باتىر داڭعىلى مەن سىعاناق كوشەسىنىڭ قيىلىسىندا «پوكولەنيە» تۇرعىن ءۇي كەشەنىنىڭ اۋدانىندا 2400 ورىندىق مەكتەپ سالامىز (2 اۋىسىمدى). ونىڭ قازانشۇڭقىرىن قازۋ جانە قادالارىن قاعۋ جۇمىستارى باستالدى. سونىمەن قاتار, وقۋشى ورىندارىنىڭ تاپشىلىعىن ازايتۋ ماقساتىندا № 59 مەكتەپ اۋماعىندا (ساۋران كوشەسى, 5/1) 1200 ورىندىق تاعى ءبىر كورپۋس سالامىز (2 اۋىسىمدا). ناۋرىز ايىنىڭ سوڭىنا دەيىن مەملەكەتتىك ساراپتامادان جوبالىق-سمەتالىق قۇجاتتامانىڭ شىعۋىن كۇتەمىز, ساۋىردە مەكتەپ قۇرىلىسىنا كونكۋرس جاريالايمىز. بيىل وقۋ ورنىنىڭ قۇرىلىسىنا قاراجات قاراستىرىلدى. ءۇشىنشى ماسەلە – اشىق اسپان استىندا بوس ۋاقىتتى پايدالى وتكىزەتىن ورىن قۇرۋ. اباتتاندىرۋ ماۋسىمى باستالىسىمەن قابانباي باتىر داڭعىلىنىڭ بويىندا («ينفينيتي» تك قاراما-قارسى) اۋماقتى كوگالداندىرۋ مەن اباتتاندىرۋعا باسا ءمان بەرىلىپ, قوعامدىق كەڭىستىك سالامىز» دەپ جازدى ەلوردا اكىمى.
