ەكسپو اياسىندا ءار مەملەكەتتىڭ ۇلتتىق كۇنىن ۇلىقتاۋ ءراسىمى جالعاسۋدا. بۇل جولى سولومون ارالدارىنىڭ رەسمي دەلەگاتسياسى بالامالى ەنەرگيا كوزدەرىمەن تانىستىرسا, ارتىستەرى ۇلتتىق ناقىشتا بي بيلەپ, اننەن شاشۋ شاشتى.
مەرەكەلىك شارانىڭ سالتاناتتى اشىلۋ راسىمىندە ادەتتەگىدەي ەكى ەلدىڭ ءانۇرانى شىرقالىپ, جالاۋى جەلبىرەدى. وعان قازاقستان تاراپىنان سىرتقى ىستەر ءمينيسترىنىڭ ورىنباسارى اقىلبەك كامالدينوۆ جانە سولومون ارالدارىنان تاۋ-كەن ءوندىرىسى, ەنەرگيا مەن اۋىلدىق ايماقتاردى ەلەكترلەندىرۋ ءمينيسترى دەۆيد دەي پاچا قاتىستى.
– ەكسپو كورمەسىنە قاتىسا وتىرىپ, ءبىز جالپاق جۇرتقا ءداستۇرلى مۋزىكامىز بەن ءبيىمىزدى پاش ەتىپ, جەتكەن جەتىستىكتەرىمىزبەن بولىسۋگە مۇمكىندىك الدىق. «بولاشاق ەنەرگياسى» تاقىرىبىنا كەلەتىن بولساق, ەلىمىزدىڭ قالالارىندا جانە اۋىلدى ايماقتارىندا جاڭارتىلاتىن ەنەرگيا كوزدەرىن قولدانۋعا الەۋەتىمىز جەتكىلىكتى. قازىرگى تاڭدا, مينيسترلىك ەلەكتر ەنەرگياسى مەن ونى تاسىمالداۋ بويىنشا بىرقاتار جوبالاردى قولعا الدى.
دونورلار قارجىلاندىراتىن ەنەرگەتيكالىق جوبالاردىڭ مىسالى رەتىندە Fio Hydro-نى ايتۋعا بولادى. جوبا ازيا دامۋ بانكىنەن الىنعان كرەديت پەن گرانت نەگىزىندە كومپانيامەن بىرلەسىپ, ىسكە اسىرىلۋدا. تينا وزەنىنىڭ گيدروەنەرگەتيكاسىن دامىتۋ جوباسى دا ينۆەستورلار مەن دونورلاردىڭ ارقاسىندا جۇزەگە اسپاق. سوندىقتان, ءتاڭىر سىيلاعان رەسۋرستاردى نىعايتۋ ماقساتىندا ءبىزدىڭ ۇكىمەت پەن سولومون ارالدارىنىڭ حالقىمەن بىرىگىپ جۇمىس ىستەۋگە نيەتتى بارلىق ارىپتەستەردى سەرىكتەستىككە شاقىرامىن, – دەدى دەي پاچا.
ال كەش سوڭىندا ارنايى ارالداردان كەلگەن Inamauri Panpipers توبى جانە ەۆان مانۋنۋا اتتى ءانشى ونەر كورسەتتى. سونداي-اق, قوناقتار سولومون ارالدارىنا ءتان ۇلتتىق كيىمى مەن ىرعاقتى ءبيىن تاماشالاپ, اۋەزدى ءانىن تىڭدادى.
گۇلدانا تالعاتقىزى
