سونى تاسىلدەرمەن وتا جاسالدى
استاناداعى №2 قالالىق بالالار اۋرۋحاناسىندا ليتۆا رەسپۋبليكاسىنان كەلگەن حيرۋرگتەر بالالار تراۆموتولوگياسى مەن ورتوپەدياسىنان شەبەرلىك سىنىپتارىن وتكىزدى.
اتالمىش اۋرۋحانانىڭ باس دارىگەرى راسۋلبەك ايپوۆتىڭ ايتۋىنشا, بيىلدىڭ وزىندە تراۆماتولوگيالىق پۋنكتتە 25 مىڭعا جۋىق بالا ەم-دوم قابىلداپ, ولاردىڭ 15 پايىزى ستاتسيونارعا جاتقىزىلدى. وسىعان وراي, تراۆموتولوگيا بويىنشا حالىقارالىق ستاندارتتاردى ناتيجەلى قولدانىپ جۇرگەن ليتۆالىق دوكتورلار مەن پروفەسسورلار شاقىرىلعان بولاتىن. شەبەرلىك سىنىبى اياسىندا ولار ءتۇرلى جاراقاتتار الىپ, مەرتىككەن سابيلەرگە وتا جاساۋدا. بۇل رەتتە ليتۆالىق حيرۋرگتەر ەمدەۋدىڭ حالىقارالىق ستاندارتتارعا ساي جاڭا ادىستەرى نەگىزىندە گيپستىڭ ورنىنا تەمىردەن جاسالعان ارنايى تيتان قالىپتى پايدالانادى.
– جالپى, بۇل ءتاسىل الەمدە ون بەس جىلدان بەرى جۇزەگە اسىرىلىپ كەلەدى, ليتۆادا ول ون جىلدان بەرى تاجىريبەگە ەنگىزىلگەن. جاڭا ءتاسىلدى قازاقستاندىق دارىگەرلەر دە يگەرۋدە. بۇل ارنايى قالىپتىڭ ىڭعايلىلىعى سول, ناۋقاس گيپسپەن ۇزاق جۇرەتىن بولسا جاراقاتتانعان سۇيەك گيپسپەن سالىستىرعاندا تەز جازىلادى. وسىلايشا, اۋرۋدىڭ ايىعۋى ءبىر جارىم-ەكى ايدان ءۇش اپتاعا دەيىن قىسقارادى, – دەدى ۆيلنيۋس ۋنيۆەرسيتەتىنىڭ پروفەسسورى, بالالار ورتوپەدياسى جانە تراۆماتولوگيا ورتالىعىنىڭ ديرەكتورى, بىلىكتى حيرۋرگ كياستۋتەس سانيۋكاس.
جەلتوقساننىڭ 9-ى كۇنى باستالعان شەبەرلىك سىنىپتارىنا ەلوردالىق ەمحانالار مەن كلينيكالاردىڭ دارىگەرلەرىمەن بىرگە قازاقستاننىڭ بارلىق وڭىرلەرىنەن كەلگەن تراۆماتولوگتەر مەن ورتوپەدتەر دە قاتىسىپ, مەديتسينا سالاسىنداعى جاڭاشا ءتاسىلدىڭ تيىمدىلىگى تۋرالى دارىستەر تىڭدادى.
اتالمىش شارا وسى ايدىڭ 13-ىنە دەيىن جالعاسادى.
گۇلبارشىن وكەشقىزى