بيىلعى كوكتەمدە ەلورداعا سۋ تاسقىنىنان ەشقانداي قاۋىپ جوق. باس قالادا توتەنشە جاعدايدىڭ ورىن الۋىنا جول بەرمەيتىن 202 تارماقتان تۇراتىن كەشەندى ءىس-شارالار جوسپارى جۇزەگە اسىرىلادى. بۇل تۋرالى كەشە استانا اكىمدىگىندە وتكەن ماجىلىستە ايتىلدى.
قالالىق كوممۋنالدىق شارۋاشىلىق باسقارماسىنىڭ باسشىسى تولەگەن زاكاريانوۆتىڭ ايتۋىنشا, كەشەندى جوسپاردى جۇزەگە اسىرۋعا اكىمدىككە باعىنىشتى 22 قۇرىلىمدىق بولىمشەلەر, مينيسترلىكتەردىڭ 8 اۋماقتىق ورگانى مەن ولاردىڭ بولىمشەلەرى, 2 كوممۋنالدىق كاسىپورىن جاۋاپ بەرەدى. تولەگەن زاكاريانوۆ ءوزىنىڭ بايانداماسىندا «كوكتال» تۇرعىن الابىنداعى اسپالى جاياۋ جۇرگىنشىلەر كوپىرىنىڭ ماسەلەسىنە توقتالدى. «ءبىز جوبالىق-سمەتالىق قۇجاتتامانى دايىنداپ قويدىق. اسپالى كوپىردى بيىلعى 15 ناۋرىزعا دەيىن قايتا جوندەۋدەن وتكىزەمىز» دەدى ول.
قۇزىرلى باسقارما جەتەكشىسى كوكتەمدەگى سۋ تاسقىنىنىڭ كولەمىن بولجاۋ ماقساتىندا «قازگيدرومەت» رمك-مەن بىرلەسە وتىرىپ, مويىلدى وزەنى باسسەينى مەن ەسىل وزەنىنىڭ جوعارعى الابىن زەرتتەۋدىڭ باعدارلىق كارتاسى جاسالعانىن حابارلادى. جينالعان قاردىڭ كولەمى جونىندە زەرتتەۋ جانە تالداۋ جۇمىستارىن جۇرگىزۋ ءۇشىن قاڭتار ايىندا ماماندار وزەن اڭعارلارىنا بارعان.
قازىرگى كەزدە قالا اۋماعىنداعى قار دەر كەزىندە تاسىلۋدا. قىسقى مەرزىمدە سىرتقا تاسىلعان قاردىڭ كولەمى 1,8 ملن كۋبومەتردى قۇرادى. قالا باسشىسى اسەت يسەكەشەۆ قۇرىلىس, ساۋلەت, ءبىلىم بەرۋ, دەنساۋلىق ساقتاۋ, الەۋمەتتىك دامۋ باسقارمالارىنا جانە اۋداندىق اكىمدىكتەرگە الەۋمەتتىك ماڭىزى زور نىسانداردىڭ (بالاباقشا, مەكتەپ, ورتا جانە جوعارى وقۋ ورىندارى), قۇرىلىس الاڭدارىنىڭ اۋماعىن قاردان تازارتۋدى تاپسىردى.
