بىلتىر جازدا شىمكەنت قالاسى اكىمىنىڭ قاراپايىم حالىقپەن بىرگە اۆتوبۋسقا مىنگەن پوپۋليستىك قادامىن ۇلكەن جاڭالىق كورىپ, جارياعا جار سالدىق. بيىل استانا اۋداندارىنىڭ اكىمدەرى قالا تۇرعىندارىنا تەلەفون نومىرلەرىن بەردى دەپ تاعى تاڭعالىپ, باس شايقاپ جاتىرمىز. بۇل نەنى بىلدىرەدى؟ اكىم مەن حالىقتىڭ اراسىنىڭ الشاقتاۋ ەكەنىنىڭ كورىنىسى, ارينە. شىن ءمانىسىندە, حالىقپەن بىرگە, ءار ادامنىڭ پىكىرىنە قۇلاق اسۋى ءتيىس باسشىنى قاشان وزىمىزدەن ءبولىپ الدىق؟
ءوزىنىڭ جان قايعىسىن «بولىس بولدىم, مىنەكيىنە…» سىيعىزعان ابايدىڭ كەيىپكەرلەرى ءبىزدىڭ قوعامدا دا قاپتادى. وتىرعان ورىندىعى ويلاندىرمايتىن, شىققان بيىگىنەن تومەنگە كوزىنىڭ قيىعىمەن قاراي بەرمەيتىن باسشىلاردىڭ بار ەكەنىن اقپاراتتار نوپىرىنەن اڭعاراسىز. ءبىر قاراعاندا, جۇمىس ءجۇرىپ جاتىر. بىراق اكىم مەن حالىقتىڭ اراسىندا جاندى بايلانىس كەم. جوعارىداعىداي جاڭالىقتاردىڭ سيرەك قۇبىلىستاي كورىنۋى سوندىقتان. ءبىزدىڭ قوعامدا قاي اكىمنىڭ نەمەسە ءىرى لاۋازىم يەسىنىڭ قابىلداۋىنا كىرۋ – ۇلكەن ماسەلە. ولار دا, ءوز كەزەگىندە, حالىققا جاقىنداۋدى ماقسات تۇتا بەرمەيتىندەي. شىنىنا كەلسەك, قاي اكىم دە حالىقپەن بىرگە, سولاردىڭ ورتاسىندا ءجۇرۋى كەرەك ەمەس پە؟ بازارعا ءجيى بارىپ باعانى بىلسە, اسحانادان ءتۇستەنسە, ايالداماعا ايالداپ, قوعامدىق كولىككە وتىرسا, ءاربىر ادامنىڭ مۇڭىنا قۇلاق ءتۇرىپ, تەلەفونىمەن تىلدەسە بەرەتىندەي جاعدايعا جەتسە, جۇمىس جۇيەسى, ءتىپتى قوعام وزگەرەر ەدى. ورىنباسارلارى مەن كومەكشىلەرىنىڭ كومەگى نەمەسە ەلەكتروندى قۇرالدار ارقىلى عانا بايلانىسىپ, حالىقتىڭ قالىڭ كوشىنەن ءوزى سيرەك كورىنەتىن اكىمدەر تۋرالى باسقا نە ايتۋعا بولادى؟ وسى تۇرعىدان كەلگەندە, وتكەن ايدا استانالىق اۋدان اكىمدەرىنىڭ حالىقپەن بايلانىسىن, ەسەپ بەرۋ جينالىستارىن وزگە ايماقتارعا ۇلگى ەتىپ تاراتۋعا بولادى.
بۇل ەسەپتەر بارىسىندا «باتا بەرگىش» اقساقالدار مەن كوڭىلجىقپاس كولگىرسىگەندەردى كورە المادىق. «كوپشىك قويۋ» ءۇشىن كەزەككە تۇراتىندار دا كەزىكپەدى. وتكىر سۇراقتار قويىلدى, قيىن ماسەلەلەر ورتاعا سالىندى. قالانىڭ بۇكىل تىنىس-تىرشىلىگىنىڭ شىنايى سۋرەتتەرى كورىنىس بەردى دەپ ايتا الامىز. اۋىل, اۋدان, قالا, وبلىس اكىمدەرىنىڭ ەل الدىندا ءبىر جىلدا ءبىر بەرەتىن ەسەبىندە ەبىن تاۋىپ, «ەرەن ەڭبەكتەرىن» پاش ەتەتىن باياندامالارى مەن كەزەككە تۇرىپ ودا ايتۋشىلار عانا ەمەس, كۇندەلىكتى ءار ادامنىڭ باسىندا كەزدەسەتىن ماسەلەلەرگە ءمان بەرىلگەنى ابزال-اۋ. «اكىم بول, حالقىڭا جاقىن بول!» دەگەن قاناتتى ءسوزدى وسى ەسەپ كەزىندە ۇنەمى قاعيدا ەتىپ ۇستاساق…
گۇلجان راحمان
