قالالىق جاعاجايدا ءبىر مەزگىلدە 50 بالا قاتار شومىلا الاتىن بالالارعا ارنالعان سۋى تاياز اكۆاپارك بار. ودان باسقا قانشاما جابىق باسسەيندەر بولسا دا, بالالار سۋبۇرقاقتاردا شومىلاتىن ادەتىن قويار ەمەس, جامان ادەتتىڭ اقىرى جۇقپالى ىندەتكە جەتكىزەتىنىن ەسكەرەر ەمەس.
ءتىپتى, «شومىلۋعا بولمايدى!» دەگەن ەسكەرتپەنى دە ەلەمەيدى. كەسەلدىڭ قاتەرى جايىندا سانيتارلىق دارىگەرلەردىڭ قاداعالاپ ايتۋىنان كەمدىك جوق. ولاردىڭ مالىمەتتەرىنە قاراعاندا, جىل سايىن جاز ايلارىندا ەنتەروۆيرۋستىق ينفەكتسيامەن اۋىرعانداردىڭ سانى ارتىپ كەتەدى ەكەن. بۇل جۇقپالى اۋرۋدىڭ تارالۋى كۇننىڭ قاتتى قىزۋىمەن تىعىز بايلانىستى. سودان دا اۋرۋدىڭ اسقىنۋىنىڭ شارىقتاۋ شەگى ماۋسىم, شىلدە, تامىز ايلارىنا تۋرا كەلەدى. بيىلعى جازدىڭ ىستىق بولۋىنا قاراي, بالالار اراسىنداعى ەنتەروۆيرۋستىق ينفەكتسياعا ۇشىراعاندار فاكتىسى ءجيى تىركەلىپ وتىر. تەك مامىر ايىندا عانا ينفەكتسيا جۇقتىردى دەگەن كۇدىكپەن 46 بالا دارىگەرلىك تەكسەرۋدەن ءوتىپ, ونىڭ وتىزى زەرتحانالىق تالداۋدان كەيىن راستالعان. سىرقاتتانعانداردىڭ ءبارى – 14 جاسقا دەيىنگى جاسوسپىرىمدەر. ولاردىڭ الپىس پايىزى سۋبۇرقاقتاردا شومىلىپ, اۋرۋدى سوندا جۇقتىرعانى بەلگىلى بولىپ وتىر.
وسىعان وراي, دارىگەرلەر «جاسوسپىرىمدەردىڭ دەمالىس ۋاقىتىن قالاي وتكىزەتىنىن قاداعالاۋ قاجەت» دەيدى. ولاردىڭ تەك قانا رۇقسات ەتىلگەن جەرلەردە شومىلۋىن ءجىتى باقىلاۋ كەرەك. قالاداعى سۋبۇرقاقتاردىڭ قاۋىپتى جانە شومىلاتىن جەر ەمەس ەكەنىن ايتىپ ءتۇسىندىرۋ – ەرەسەكتەردىڭ مىندەتى. «جۇقپالى ىندەت استان دا كەلەدى» دەيدى دارىگەرلەر. جەكە باسىنىڭ تازالىعى, تاماق جەر الدىندا قولىن تازالاپ جۋىپ, جەمىس-جيدەكتى دە مۇقيات جۋىپ, ىستىق سۋمەن شايىپ الۋدىڭ قاجەتتىگىنە ءمان بەرۋ كەرەك. وسىنداي قاراپايىم ەرەجەلەردى ساقتاعاندا كەز كەلگەن اۋرۋ ءسىزدى اينالىپ وتەدى.
