«بابالار ەرلىگى – تاۋەلسىزدىكتىڭ باستاۋى» دەگەن ۇرانمەن «استانا جاستارى» رەسۋرستىق ورتالىعىندا «پارىز» اكتسياسى ءوتتى.
«قازاق قولىنىڭ جوڭعار باسقىنشىلىعىنا قارسى ازاتتىق سوعىسىن «ۇلى وتان جەڭىسى» دەپ اتاپ, ول كۇندى مەملەكەتتىك دەڭگەيدە مەرەكە رەتىندە تويلاۋ قاجەت پە؟» دەگەن ساۋال رەسپوندەنتتەرگە قويىلىپ, باسىم كوپشىلىكتىڭ تاراپىنان بۇل باستاما قولداۋعا يە بولعان ەدى. ناقتى ايتقاندا, شارانىڭ ءبىرىنشى كەزەڭى 2010 جىلى جامبىل وبلىسىنداعى تاراز قالاسى مەن قورداي اۋداندىق جاس-تار قوعامدىق بىرلەستىكتەرىنىڭ ۇيىتقى بولۋىمەن ۇيىمداستىرىلدى. بۇل اڭىراقاي شايقاسىنداعى قازاق حالقىنىڭ 280 جىلدىق جەڭىسىنە ورايلاستىرىلعان ەدى. جوبانىڭ ەكىنشى كەزەڭىن الماتى وبلىسىنىڭ «حالىق» جاستار قوعامدىق بىرلەستىگى جالعاستىردى. ال, بيىل شەرۋ اتىراۋ ورال, اقتوبە, قوستاناي, كوكشەتاۋ, پەتروپاۆل قالالارىنا دا جەتكەن بولاتىن. «وسى 4 جىل ىشىندە جاستار بولىپ شايقاس وتكەن جەرلەرگە ەكسپەديتسيامەن باردىق, ارالادىق. تاريحتا تەك بوگەنباي, قابانباي سياقتى باتىرلاردىڭ عانا اتى اتالادى. ال, ەل ءۇشىن جانپيدا بولعان باسقا دا ەرلەرىمىز بار عوي. مىنا ساپار بارىسىندا وسى اتى اتالماي قالعان باتىرلار باسىنا زيارات ەتىپ, ەسىمدەرىن تىزىمگە قوستىق. تاريحشىلاردان باستاپ, تاريح عىلىمىنىڭ ماگيسترلارىنا دەيىن وسى ىسكە جۇمىلدى. الەۋمەتتىك سۇحبات جۇرگىزدىك» دەيدى جوبا ۇيلەستىرۋشىسى احمەت داۋتوۆ. جيىنعا قاتىسقان استانالىق جاستار اڭىراقايداعى جەڭىس قازاق مەملەكەتى تاۋەلسىزدىگىنىڭ باستاۋى بولعانىن ايتىپ, يدەيانى ءبىراۋىزدان قولدادى. ۇيىمداستىرۋشىلاردىڭ ەندگى ماقساتى – قىركۇيەك ايىندا ەلوردادا وسىعان قاتىستى اۋقىمدى فورۋم وتكىزىپ, پارلامەنت دەپۋتاتتارىنا جىبەرگەن ۇسىنىستىڭ وڭ باعاسىن الۋ.
ءمادينا جاقىپ
