«استانا سۋ ارناسى» مەكەمەسى ەلوردا تۇرعىندارى ءۇشىن «كەلىسىمشارت جاسا!» اكتسياسىن قولعا الدى. 28 قاراشادان 31 جەلتوقسانعا دەيىن بولاتىن اكتسيا ورتالىقتاندىرىلعان سۋمەن جابدىقتاۋ جانە كارىز قىزمەتتەرىن كەلىسىمشارتسىز پايدالانىپ كەلگەن تۇتىنۋشىلارعا تىكەلەي قاتىستى. «سۋدىڭ دا سۇراۋى بار» دەيدى حالقىمىز. مامانداردىڭ پىكىرىنشە, ەلوردانىڭ ءاربىر تۇرعىنى تاۋلىگىنە شامامەن 250 ليتر سۋ پايدالانادى ەكەن.
اۋىز سۋدى وڭدى-سولدى پايدالانۋدىڭ زيانىن بۇگىندە الەم حالىقتارى مويىنداۋدا. تازا سۋدى ۇنەمدەۋدىڭ ەڭ ءتيىمدى جولىن قاراستىرۋ ماقساتىندا «استانا سۋ ارناسى» مەكەمەسى تۇرعىندارعا قولايلى مۇمكىندىك تۋعىزباقشى. شىنىن ايتۋ كەرەك, كەيبىر قالا تۇرعىندارى سۋدى تۇتىنۋ كەزىندە قۇجات راسىمدەۋ كەرەكتىگىن بىلمەيدى. سوندىقتان اتالعان اكتسيا كەزىندە سۋمەن جابدىقتاۋ جانە كارىز قىزمەتتەرىن زاڭسىز تۇتىنىپ وتىرعان بارلىق تۇرعىندار كەلىسىمشارت جاساي الادى. بۇل ءۇشىن قوسىمشا شىعىن شىعارۋدىڭ قاجەتى جوق نەمەسە قولدانىستاعى زاڭنامادا قاراستىرىلعانداي, قانداي دا ءبىر ايىپپۇل تولەمەي, قىزمەت كورسەتۋدى توقتاتۋسىز جاساۋعا بولادى.
ايتا كەتكەن ءجون, 2017 جىلدىڭ 1 قاڭتارىنان باستاپ تۇرعىن ۇيلەردە اۋقىمدى تەكسەرۋ جۇرگىزىلەدى. تۇگەندەۋ شاراسى بارىسىندا انىقتالعان بارلىق مەكەنجايلار بويىنشا قوسىمشا ەسەپتەۋ سومالارى قويىلىپ, سۋمەن جابدىقتاۋ جانە سۋ اعىزۋ قىزمەتتەرى توقتاتىلادى. قوسىمشا اقپارات الۋ ءۇشىن 27-03-70, 37-50-07 تەلەفوندارىنا نەمەسە call-ورتالىقتىڭ «1302» نومىرىنە قوڭىراۋ شالۋعا بولادى. تابيعات بايلىعىنىڭ ءبىر كۇنى سارقىلاتىنىن بىلسەك, قولداعى بارىمىزدى بايىپپەن باعالايىق.
گۇلميرا شارحانقىزى
