كەشە استانا قالالىق ءماسليحاتىنىڭ تۇراقتى كوميسسيالارىنىڭ وتىرىسىندا ەلوردادا تۇرعىن ءۇي-كوممۋنالدىق شارۋاشىلىقتىڭ قازىرگى جاعدايى تالقىلانىپ, الداعى دامۋ پەرسپەكتيۆالارى ءسوز بولدى. اتالمىش ماسەلە بويىنشا قالالىق كوممۋنالدىق شارۋاشىلىق باسقارماسىنىڭ باسشىسى تولەگەن زاكاريانوۆ بايانداما جاسادى.
الدىمەن حالىقتى سۋمەن قامتاماسىز ەتۋ جانە سۋدى بۇرۋ جايىنا توقتالعان بايانداماشى جىل سايىن ەلوردادا سۋدى تۇتىنۋ كورسەتكىشى 7-10 پايىزعا ارتىپ كەلە جاتقانىن ايتىپ ءوتتى. وسىنىڭ ىشىندە كوپ پاتەرلى ۇيلەردىڭ تۇرعىندارى سۋدى ەسەپتەۋ قۇرالدارىمەن 70 پايىزعا قامتىلسا, جەكە سەكتوردا بۇل كورسەتكىش 20 پايىزعا عانا جۋىقتايدى. ال «شۇبار» شاعىن اۋدانىندا, «قاراوتكەل» اۋىلىندا, «پريگورودنىي», «كوكتال», «ءوندىرىس», «پرومىشلەننىي» تۇرعىن الاپتارىندا 30 پايىزعا جاقىن.
قالادا ۇزىندىعى 2,5 شاقىرىمدى قۇرايتىن ماگيسترالدى سۋ تاراتقىشىن سالۋدىڭ العاشقى كەزەڭى باستالدى. ول ىسكە قوسىلعاندا شاھارعا قوسىمشا 50 مىڭ تەكشە مەتر سۋ كەلەدى دەپ جوسپارلانۋدا. سونداي-اق, استانانى سۋمەن قامتاماسىز ەتۋدىڭ ءتورت ءىرى جوباسى بويىنشا جوبالىق-سمەتالىق قۇجاتتارىن ازىرلەۋ جۇمىسى اياقتالىپ قالدى.
«تالدىكولدىڭ اعىن سۋلار جيناعىشىن جويۋ» نىسانى بويىنشا تەحنولوگيالىق قوندىرعىلاردى مونتاجداۋ اياقتالىپ, جوبانىڭ ەكىنشى كەزەگىن ىسكە قوسۋ مەرزىمى جاقىندادى. بۇل جاعداي تازارتقىش قۇرىلعىلاردىڭ قۋاتىن تاۋلىگىنە 254 مىڭ تەكشە مەترگە جەتكىزبەك. نوسەر سۋلارىن اعىزۋ كارىزدەرىنىڭ قۇرىلىسى جالعاسۋدا. ولار 2019 جىلى ىسكە قوسىلۋى ءتيىس.
بۇعان قوسا, باسقارما باسشىسى ينجەنەرلىك ينفراقۇرىلىمدى دامىتۋ جايىنان حابار بەرىپ, كەيبىر ماڭىزدى نىسانداردىڭ قۇرىلىس بارىسىمەن تانىستىردى. ونىڭ ايتۋىنشا, 1500 كورەرمەنگە ارنالعان امفيتەاتر قۇرىلىسى اياقتالىپ قالدى. بوتانيكالىق ساياباق تا جىلدىڭ سوڭىندا پايدالانۋعا بەرىلۋى ءتيىس. ۇلتتىق پانتەوننىڭ قۇرىلىسىنىڭ العاشقى كەزەگى دە باستالدى.
ودان كەيىن بايانداما جاساعان قالالىق ەنەرگەتيكا باسقارماسىنىڭ باسشىسى باقتىبەك جاپاەۆ شاھاردى ەلەكترەنەرگياسىمەن, جىلۋمەن, گازبەن قامتاماسىز ەتۋ جاعدايىنا توقتالدى. «وركەن قالا» جشس ديرەكتورى ساعىندىق ەسىمحانوۆ قالانىڭ الداعى جىلدارعا دامۋ جوسپارىمەن تانىستىرىپ, «ەسىل» پيك قاۋىمداستىعىنىڭ ءتورايىمى رىسكۇل تەلەپوۆا وسى سالاداعى كەيبىر تۇيتكىلدەردى قوزعادى.
امانعالي قالجانوۆ
