«سۇڭقار ساكەن» كىتابى
جۋىردا س.سەيفۋللين مۇراجايىندا «سۇڭقار ساكەن» كىتابىنىڭ تۇساۋكەسەر ءراسىمى ءوتتى. جاڭا تۋىندى اقىن مۇراجايى قىزمەتكەرلەرىنىڭ جيناقتاۋىمەن جارىققا شىققان. سالتاناتتى كەشكە ەلوردالىق زيالى قاۋىم وكىلدەرى مەن كىتاپسۇيەر كوپشىلىك قاتىستى.
باسقوسۋدا مۇراجاي ديرەكتورى, اقىن نەسىپبەك ايتۇلى ءسوز سويلەپ, ۇلت قايراتكەرىنىڭ تاريحي تۇلعاسى جونىندە اڭگىمەلەدى. «بۇل جيناققا ساكەننىڭ زامانداسى, ۇزەڭگىلەسى ءىلياس جانسۇگىروۆتەن باستاپ, ىنىلەرى قاسىم امانجولوۆتىڭ, سىرباي ماۋلەنوۆتىڭ جانە ورتا بۋىن, كەيىنگى تولقىن اقىنداردىڭ كورنەكتى قالامگەرگە ارناعان ولەڭ-جىر, تولعاۋلارى توپتاستىرىلدى. اردا اقىننىڭ 120 جىلدىق مەرەيتويىنا وراي ازىرگە مىڭ دانامەن وقىرمانعا جول تارتقان عيبراتى مول بۇل كىتاپ ساكەن سەيفۋللينگە ولەڭنەن ورناتىلعان تاعى ءبىر ەسكەرتكىش دەپ بىلەمىز» دەدى ول.
اقىن نۇرعوجا وراز ساكەن ولەڭدەرىن سارالاپ, شىعارماشىلىعىن اڭگىمەلەدى. «ول زامانىنىڭ قىسىمىنان كەڭ كوسىلىپ جازا المادى, اينالاسى «ماياكوۆسكيگە ەلىكتەپ, ولەڭنىڭ مانەرىن بۇزدى» دەپ ورىنسىز ايىپتادى. الداعى ۋاقىتتا ونىڭ تەك ليريكالىق ولەڭدەرىن جيناقتاپ, جارىققا شىعارۋ كەرەك» دەگەن ۇسىنىسىن دا ءبىلدىردى ن.وراز. سەنات دەپۋتاتى ورالباي ابدىكارىموۆ اناسى كەلىن بولىپ تۇسكەندە اۋىلعا قوناق بولىپ كەلگەن سەرىنى كورگەنىن اسقان ىلتيپاتپەن ەسكە الىپ وتىراتىنىن ايتتى.
قازاقستاننىڭ ەڭبەك سىڭىرگەن قايراتكەرى قاسەن اباەۆ ورىس تىلىندەگى ارناۋىن تارتۋ ەتىپ, وتاندىق سۋرەتشىلەردىڭ «سۇڭقار ساكەن» تاقىرىبىنداعى كارتينالارىن جيناقتاپ, ەلوردادا كورمە ۇيىمداستىرۋعا ۋادە ەتتى. بەلگىلى ءانشى, قازاقستاننىڭ ەڭبەك سىڭىرگەن ءارتىسى سەرىك وسپانوۆ «ساكەننىڭ مۋزىكالىق مۇراسى» اتتى ەڭبەكتىڭ كوپ ۇزاماي جارىققا شىعاتىنىن سۇيىنشىلەدى.
تاعى ءبىر ايتا كەتەرلىگى, بۇگىندە قاراعاندى وبلىسىنىڭ اكىمدىگى ساكەن سەيفۋلليننىڭ 120 جىلدىق مەرەيتويىنا ازىرلىك جۇمىستارىن باستاپ كەتكەن. استانا قالاسىنىڭ اكىمى يمانعالي تاسماعامبەتوۆ تە اتالمىش شارانى ەلوردادا ءوز دەڭگەيىندە اتاپ وتۋگە ارنايى تاپسىرما بەرگەن.
نۇرگۇل احانقىزى