استاناداعى ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ءوزىنىڭ مەرەيتويلىق XXV ماۋسىمىندا كورەرمەندەردىڭ نازارىنا ءار الۋان سيپاتتاعى جاڭا قويىلىمداردى ۇسىنۋدا. انتون چەحوۆتىڭ «شيە», مۇحتار اۋەزوۆ پەن قاليحان ىسقاقتىڭ «قاراش-قاراش», شىڭعىس ايتماتوۆتىڭ «بوراندى بەكەت» رومانى مەن «ءجاميلا» پوۆەسى نەگىزىندە قويىلعان «اققۋدىڭ كوز جاسى» ليريكالىق دراماسى سىندى كلاسسيكالىق تۋىندىلاردان باستاپ, «جۇت» سياقتى قازاق حالقىنىڭ باسىنان وتكەن قاسىرەت سىرىن شەرتەتىن شىعارمالاردى ساحنالادى.
ونەر ورداسى, ءتىپتى, ءار اي سايىن كورەرمەندەردى جاڭا كەيىپكەرلەرمەن قاۋىشتىرۋدا. ماسەلەن, وتكەن ايدا كورەرمەندەر بەلگىلى جازۋشى-دراماتۋرگ روزا مۇقانوۆانىڭ «ساررا» دراماسىن تاماشالادى. ال وتكەن اپتادا قاللەكيلىكتەر ونەر سۇيەر قاۋىمعا «سۇرىنگەن سۇربويداق» كومەدياسىن تارتۋ ەتتى.
تەاتر – ومىرلىك سۇراقتارعا جاۋاپ ىزدەيتىن, ادامنىڭ ساناسى مەن رۋحىن قوزعايتىن ونەر. بەلگىلى رەجيسسەر, قر ەڭبەك سىڭىرگەن قايراتكەرى الىمبەك ورازبەكوۆ ساحنالاعان «سۇرىنگەن سۇربويداق» قويىلىمى قوعامىمىزدا قىزۋ, ءارى ءجيى تالقىلاناتىن وزەكتى پروبلەمانىڭ مانىسىنە بويلاتا ءتۇستى. ءازىل-قالجىڭنىڭ استارىندا اششى شىڭدىق جاتاتىندىعى جالپاق جۇرتقا بەلگىلى. قويىلىم كۇلكى سىيلاپ قانا قويماي, جۇرەكتى ەلجىرەتىپ, جينالعان قاۋىمدى ويلانتىپ, كوڭىلىن بوساتتى.
جالعىزدىقتى سەرىك ەتكەن, قىزبا مىنەزدى تەميككو ورىنسىز ءبىر قاتەلىكتىڭ ونىڭ ءومىرىن تۇبەگەيلى وزگەرۋىنە سەبەپ بولارىن ءبىلدى مە ەكەن؟! قاراپايىم سۋرەتشىنىڭ كۇندەلىكتى قوڭىرقاي, بىركەلكى تىرشىلىگىنە ءسان كىرگىزگەن ايەلگە دەگەن كوزقاراسى ونىڭ جان دۇنيەسىن سىلكىنتىپ جىبەردى. وسى كورىنىس زالداعى كورەرمەندەردى تەبىرەنتپەي قويمادى. تەميككونىڭ جانى نازىك دزەراسساعا دەگەن سۇيىسپەنشىلىگى جۇرەگىندە ماحاببات وتىن لاۋلاتتى. ءيا, جالعىزدىق قۇدايعا عانا جاراسادى…
قىزۋقاندى كاۆكاز ۇلتىنىڭ تەمپەرامەنتىن كورەرمەن قاۋىمعا ەرەكشە جەتكىزە بىلگەن تەاتر اكتەرلەرىنىڭ شەبەرلىگىندە ءمىن بولمادى. اسىرەسە, ەزۋگە كۇلكى سىيلاعان سيكو ءرولىن سومداعان قر ەڭبەك سىڭىرگەن قايراتكەرى بورانباي مولداباەۆ ەزۋگە كۇلكى ءۇيىرىپ, كورەرمەننىڭ ىستىق ىقىلاسىنا بولەندى. ەركەلىكتىڭ, شىنايى دوستىقتىڭ, ادالدىقتىڭ, ماحابباتتىڭ بەينەسى ايشىقتالعان قويىلىمنان ۇعىنارىمىز كوپ ەكەنىن بىردەن تۇسىنۋگە بولادى. باستى رولدەردەگى ەرلان مالاەۆ, گۇلبارشىن قىلىشباي, مەيرام قايسانوۆ, قازاقستاننىڭ ەڭبەك سىڭىرگەن ءارتىسى جانات چايكينا, اسىلبەك قاپاەۆ, جاسۇلان ەربولات جانە ولجاس جاقىپبەك سىندى ارتىستەردىڭ ونەرى دە ءتانتى ەتپەي قويمادى. ساحنانىڭ تاقىرىپقا ساي بەزەندىرىلۋى, ويناقى اۋەن مەن ۇتىمدى ءازىل كورەرمەن قاۋىمنىڭ تالعامىنان شىقتى.
قويىلىمنىڭ اۆتورى وسەتيالىق دراماتۋرگ اساحمات ايلاروۆ. ونىڭ «كەلىسىمشارت بويىنشا قالىڭدىق» تۋىندىسىن قازاق تىلىنە تارجىمالاعان ەلميرا ماقاشەۆا. قويىلىمدى تاماشالاعان ءاربىر ادام ەموتسيا جەتەگىنە ەرىپ, سىرتقى ومىردەن بىرەر ساعاتقا دەمالۋعا مۇمكىندىك الدى. كورەرمەندەردى الداعى ۋاقىتتا قاللەكيلىكتەردىڭ تاعى ءبىر پرەمەراسى كۇتىپ تۇر. 17 ماۋسىم كۇنى تەاتردا جابال ەرعاليەۆتىڭ «ەسىگىمدى قاققان كىم؟» پسيحولوگيالىق دراماسى قويىلادى. رەجيسسەر, قر ەڭبەك سىڭىرگەن قايراتكەرى نۇرلان جۇمانيازوۆ قازىر سونى ساحنالاۋ ازىرلىگى ۇستىندە.
سونداي-اق, ونەر سۇيەر قاۋىم تەاترعا قاتىستى ۇلكەن مەرەكە قارساڭىندا تۇر. 20-26 ماۋىسىم ارالىعىندا ەلوردادا «ساحنادان سالەم» اتتى تەاترلاردىڭ IV حالىقارالىق فەستيۆالى وتەدى. ەندەشە, تەاتردا قاۋىشقانشا, اعايىن.
اياۋلىم قاناپيانوۆا,
ل. گۋميلەۆ اتىنداعى ەۋرازيا ۇلتتىق
ۋنيۆەرسيتەتىنىڭ 2 كۋرس ستۋدەنتى
