ەلوردادا ءبىر اپتا بويى «استانا كەشتەرى» حالىقارالىق ونەر فەستيۆالى ءوتتى. وعان الەمنىڭ ەڭ ۇزدىك ونەرپازدارى قاتىستى.
عاجايىپ ونەر فەستيۆالى 2012 جىلى ەلوردانىڭ تۋعان كۇنىنە تارتۋ رەتىندە ومىرگە كەلگەن. ۇيىمداستىرۋشىسى – «دەگدار» گۋمانيتارلىق قورى مەن «JTI» كومپانياسى. ناقتىراق ايتقاندا, «دەگدار» قورىنىڭ قامقورلىق كەڭەسىن باسقارۋشى داريعا نازارباەۆانىڭ باستاماسىمەن دۇنيەگە كەلگەن جوبا.
– بيىل ءبىزدىڭ فەستيۆالعا بەس جىل تولدى. العاشقى مەرەيتويىمىزدى ەرەكشە اتاپ ءوتىپ جاتىرمىز. اۋقىمدى جوباعا الەمنەن كوپتەگەن دارىندى ونەرپازدار كەلدى. العاشقى جىلدارى فەستيۆال اياسىندا ءبىز كورەرمەندەرگە ءۇش كونتسەرت وتكىزىپ جۇردىك. بيىل بەس باعدارلاما ۇسىنىپ وتىرمىز, – دەيدى اتالعان جوبانىڭ كوركەمدىك جەتەكشىسى, قر ەڭبەك سىڭىرگەن قايراتكەرى تيمۋر ۋرمانچەەۆ.
حالىقارالىق فەستيۆال اياسىندا وتكەن كونتسەرتتەردىڭ بارلىعى ەلوردانىڭ كوركەمدىگى كەلىستى زالدارىندا ءوتتى. ماسەلەن, باس قالاداعى قازاق ۇلتتىق ونەر ۋنيۆەرسيتەتىنىڭ ورگان زالىنداعى «كامەرالىق مۋزىكا» كەشىندە بيىل عانا مەملەكەتتىك مارتەبە العان «FORTE-TRIO» ۇشتىگى مەن مەملەكەتتىك كامەرالىق وركەستىرىنىڭ «اكادەميا سوليستوۆ» توبىنىڭ دارىندى مۇشەلەرى ونەر كورسەتتى.
«استانا وپەرا» تەاترىندا بولعان «كلاسسيكالىق مۋزىكا» كەشىنە رەسەيلىك تالانتتى پيانيست پ.چايكوۆسكي اتىنداعى IX اتىنداعى بايقاۋدىڭ جەڭىمپازى بوريس بەرەزوۆسكي مەن امەريكادان كەلگەن اتاقتى سكريپكاشى فيليپپ كۆينت قاتىستى. «وپەرالىق مۋزىكا» كەشىندە وسەتيانىڭ حالىق ءارتىسى ۆەرونيكا دجيوەۆا مەن ماسكەۋ ۇلكەن تەاترىنىڭ ءسوليسى اننا اگلاتوۆا ءوز ونەرلەرىمەن كورەرمەندەردى كوركەم كۇيگە بولەدى. باريتون داۋىستى رەسەيلىك ۆاسيلي لاديۋك پەن قر ەڭبەك سىڭىرگەن قايراتكەرى, جەرلەسىمىز مەدەت شوتاباەۆ تا تەنور داۋىسىمەن تىڭدارمانداردى ءتانتى ەتتى.
سونداي-اق, ەۋروپا ورگانيستەرىنىڭ ىشىندەگى بىرەگەي جەتەكشى دەپ تانىلعان كريستيان فون بلون مەن رەسەيلىك «موسكوۆسكايا وپەراتتا» تەاترىنىڭ باس ديريجەرى كونستانتين حۆاتىنەتستىڭ شەبەرلىكتەرىنە سۇيسىنبەگەن جان بولمادى. ازەربايجاننان كەلگەن «Jangi» توبى مەن قازاقستاندىق «Magic of Nomads» دەپ اتالاتىن ەتنو-فيۋجن توبىنىڭ ونەرى دە ەشكىمدى بەيجاي قالدىرمادى.
ايتا كەتەرلىگى, قايىرىمدىلىق جوبا بولعاندىقتان بيلەتتەردىڭ بارلىعى جۇرتشىلىققا تەگىن تاراتىلدى.
ازامات ەسەنجول
