«ەكسپو-2017» – جۇزگە جۋىق مەملەكەتتەردىڭ پاۆيلونىنداعى قىزىقتارمەن شەكتەلمەيدى. كورمە ەلىمىز بەن شەتەلدەن اعىلىپ كەلگەن ءار سالاداعى مامانداردىڭ پىكىر الماسۋىنا, تاجىريبە بولىسۋىنە تاپتىرماس ورىنعا اينالدى. ماسەلەن, كەشە عانا كونگرەسس-حولدا سۋتەكتى ەنەرگياعا قاتىستى حالىقارالىق عىلىمي-تاجىريبەلىك كونفەرەنتسيا ۇيىمداستىرىلدى.
مەديتسينا عىلىمدارىنىڭ دوكتورى, پروفەسسور, رەسەي جانە ەۋروپا ەلدەرىنىڭ ەڭبەك سىڭىرگەن ونەرتاپقىشى, اقش, رەسەي جانە قىتاي ەلدەرىندە 60-قا جۋىق پاتەنتتىڭ اۆتورى اتانعان اشوت حاچاتريان جيىن تىزگىنىن ۇستادى.
ول 1993 جىلى نوۆوسىبىردە سۋتەكتى مەديتسيناعا ارنالعان كلينيكاسىن اشادى. عالىمنىڭ پايىمداۋىنشا, پاتەنتتەلگەن سۋتەكتى تەحنولوگيالاردىڭ كومەگىمەن ءجيى كەزدەسەتىن جانە سوزىلمالى اۋرۋعا شالدىققان ادامداردى قۇلان-تازا ەمدەپ شىعۋعا بولادى. وسى ۋاقىتقا دەيىن حاچاتريان پروفەسسورىنىڭ كلينيكاسىندا ەڭبەكتەگەن بالادان ەڭكەيگەن كارىگە دەيىن 40 مىڭنان استام ادام ەمدەلىپ شىققان. دارىگەردىڭ ەمدەۋ ءادىسى اپروباتسيادان ءوتىپ, قازىرگى ۋاقىتتا اقش, سينگاپۋر جانە قىتايدا قولدانىلىپ ءجۇر. ال نوۆوسىبىردەگى كلينيكانىڭ قازاقستاندىق فيليالى استانادا ورنالاسقان.
– سۋتەكتى مەديتسينا پاركينسون اۋرۋى, اۋتيزم, تەرى وبىرى, ءسۇت بەزى وبىرى, مەلانوما, ەكزەما (قىشىما), بۋىننىڭ قابىنۋى, برونح دەمىكپەسى, جوعارى قان قىسىمى جانە مۇگەدەككە الىپ كەلەتىن وزگە دە اسا قاۋىپتى دەرتتى ەمدەۋگە كومەكتەسەدى. سونداي-اق, سۋتەكتى ەنەرگيانى سۇلۋلىق سالاسىندا دا قولدانۋعا بولادى, – دەيدى عالىمنىڭ ءوزى. ەندىگارى اشوت حاچاتريان ۇيگە ارنالعان سۋتەكتى گەنەراتورلاردىڭ نارىقتا كەڭەيۋىن كوزدەپ وتىر.
كونفەرەنتسيا بارىسىندا جينالعان قاۋىمعا تانىمدىق فيلمدەر كورسەتىلىپ, سۋتەكتى ەنەرگيانىڭ مۇمكىندىكتەرى ءتۇسىندىرىلدى. كونفەرەنتسياعا قاتىسۋشىلاردىڭ نازارىنا ۇسىنىلعان ەڭ قاراپايىم ءادىس – سۋدىڭ ىشىنە سۋتەكتى ءدارىنى سالىپ ىشسەك, ونىڭ ەداۋىر تازا سۋ ەكەندىگىنە كوزىمىز جەتەدى. بۇنىڭ بارلىعى سۋتەكتىڭ قورشاعان ورتانى لاستامايتىندىعىمەن بايلانىستى.
گۇلدانا تالعاتقىزى
