كەشە ەلورداداعى «1932-33 جىلدارداعى اشارشىلىق قۇرباندارىنا ارنالعان ەسكەرتكىش» مونۋمەنتىنىڭ الدىندا سول ءبىر قارالى جىلدارى قازا بولعانداردى ەسكە الۋعا ارنالعان تاعىلىمدى شارا ءوتتى.
وتكەن عاسىردىڭ جيىرماسىنشى جىلداردان باستاپ قىرقىنشى جىلدارعا دەيىن جالعاسقان اشتىق پەن قۋعىن-سۇرگىن وقيعالارى ەلىمىز ءۇشىن قاسىرەتكە تولى كەزەڭ بولدى. حالقىمىز اشتىقتان قىناداي قىرىلىپ, سانى جاعىنان تەڭ جارتىسىنان ايىرىلدى. تالاي جاقسىلار مەن جايساڭدار تۇرمەگە توعىتىلدى. وسى ءسوزدى جازعاندا كومەيگە وكسىك تىعىلادى. نەگە؟ ويتكەنى ۇلتىمىز ەشقانداي سوعىس نەمەسە توتەننەن كەلگەن اپاتسىز قولدان ۇيىمداستىرىلعان قىرعىننىڭ قۇربانىنا اينالدى.
جيىن الدىمەن ساياسي قۋعىن-سۇرگىن مەن اشارشىلىق قۇرباندارىنىڭ رۋحىنا ءبىر مينۋت ۇنسىزدىك جاريالاۋمەن باستالدى.
– بۇگىن ءبىز تاريحتا قارالى ءىز قالدىرعان ماڭىزدى شاراعا جينالىپ وتىرمىز. سول ءبىر سۇراپىل جىلدارى 2 ميلليوننان اسا ادام توتاليتارلىق جۇيەنىڭ قۇربانى بولدى. ەلىمىزدىڭ بەتكە ۇستار زيالى ازاماتتارى تۇرمەگە جابىلدى. ولاردىڭ وتباسىلارى دا ءتۇرلى ازاپتى باستان كەشتى. قانشاما جۇرتىمىز باسقا جەرگە جان ساۋعالاپ كەتتى. ءبىزدىڭ ەلگە دە جۇزدەن اسا ۇلتتىڭ وكىلدەرى زورلىقپەن كوشىرىلدى. سونىڭ ءبارى جادىمىزدا جاڭعىرىپ تۇر. وتكەن تاريح ەشقاشان ۇمىتىلمايدى. قۇربان بولعانداردىڭ رۋحىنا باسىمدى يەمىن, – دەدى قالالىق ىشكى ساياسات باسقارماسىنىڭ باسشىسى ەرلان قاناليموۆ. ودان كەيىن ەلوردا ءماسليحاتىنىڭ توراعاسى جانات نۇرپەيىسوۆ, «جاس وتان» جاستار قاناتى استانا قالالىق فيليالىنىڭ توراعاسى بولىسبەك مۇحامەدجان ءسوز سويلەدى.
«تۇتاس ۇلتتىڭ تەڭ جارىمىن جويىپ جىبەرگەن مۇنداي وقيعا سوعىستا دا بولماعان. سونىڭ ءبارى – قاسىرەت. مەن بۇگىنگى شارانى قايعىلى كۇن دەپ ايتار ەدىم. ەلىمىزدىڭ تاۋەلسىزدىگى مەن جارقىن كەلەشەگى ءۇشىن عاسىرلار بويى قىرىلعان بابالارىمىزدى ەسكە الاتىن, سودان جاس ۇرپاق وي تۇيەتىن كۇن بولۋ كەرەك» دەيدى بەلگىلى زاڭگەر سابىر قاسىموۆ.
شارا بارىسىندا اشتىق قۇرباندارىنا ارنالعان ەسكەرتكىشكە استانا اكىمدىگى مەن ەلوردا ءماسليحاتى جانە قالاداعى قوعامدىق ۇيىمدار اتىنان گۇل شوقتارى قويىلدى.
ازامات قۇسايىن
