تالانتتى تالاپ ۇشتايدى
ۇمسىن ارقاباەۆا, وقۋشىلار سارايىنىڭ ديرەكتورى
–ۇمسىن نۇرجىگىتقىزى, وسكەلەڭ ۇرپاققا ءارتۇرلى سالادا قوسىمشا ءبىلىم بەرەتىن بىردەن-ءبىر مارتەبەسى بيىك مەكەمەنى باسقارىپ وتىرسىز. ءدال قازىرگى تاڭدا وقۋشىلار سارايىندا قانشا ۇيىرمە جۇمىس ىستەيدى؟
–ەلباسىمىز ەلىمىزدىڭ بولاشاعى بۇگىنگى جاس ۇرپاقتىڭ قولىندا ەكەنىن ءارى جاس بۋىندى جان-جاقتى قولداۋ ماسەلەسىن ۇنەمى ءوز سوزىنە تىرەك ەتەدى. مىنە, وسىنداي ماقساتتان باستاۋ العان بۇگىنگى وقۋشىلار سارايى جاس ۇرپاقتى ۇلتتىق جانە پاتريوتتىق, عىلىمي-ينتەللەكتۋالدىق ءارى تەحنيكالىق باعىتتا, قوعامدىق-ازاماتتىق, شىعارماشىلىق-مادەني, سونىمەن قاتار, سالاۋاتتى ءومىر سالتى نەگىزىندە ءتاربيەلەپ, وقىتۋ ارقىلى باۋليدى. بولاشاعىن بەلگىلى ءبىر كاسىپ سالاسىمەن بايلانىستىرعىسى كەلەتىن وقۋشىلارعا, سونداي-اق, قابىلەتتى, تالانتتى, ونەرلى دارىن يەلەرىنە ارقاشان ەسىگىمىز ايقارا اشىق. ءمىندەتىمىز – ءار بالانىڭ قابىلەتىن ۇشتاي ءبىلۋ. مۇنداي زاماناۋي جان-جاقتى تاربيە ورداسىندا ءبىلىم الۋ ءار وقۋشىعا ارمان جانە ابىروي دەپ بىلەمىن. قازىرگى تاڭدا بالالار مەن جاسوسپىرىمدەرگە نەگىزگى 14 باعىت بويىنشا 137 ۇيىرمە جۇمىس ىستەيدى. جاز ايىندا ۇيىرمە جۇمىستارىنا قاتىسۋشىلاردىڭ سانى ون مىڭنان اسادى. ال, قازىر, قىس مەزگىلىندە 7500 بالا قوسىمشا ءبىلىم الىپ ءجۇر. ولارعا 141 ۇستاز ساباق بەرەدى.
–وقۋشىلاردىڭ قانداي ءۇيىرمەگە قىزىعۋشىلىعى باسىم؟
ء–بىزدىڭ وقۋشىلار ماتەماتيكانى جاقسى كورەدى ەكەن. ودان كەيىن اعىلشىن ءتىلىن مەڭگەرۋگە قۇمار. وليمپيادا ويىنىنان كەيىن وقۋشىلاردىڭ سپورتقا قىزىعۋشىلىعى ارتتى. ونىڭ ىشىندە جەڭىل اتلەتيكا, بوكس ۇيىرمەلەرىنە جازىلۋشىلار كوپ.
–شاكىرتتىڭ تۇلعالىق قاسيەتىن دامىتۋ ءۇشىن قانداي جاعدايلار جاسالعان؟
–بالالار مەن جاسوسپىرىمدەرگە ءبىلىم بەرۋ, ولاردىڭ تۇلعالىق قاسيەتىن دامىتۋ ءۇشىن بارلىق قولايلى جاعداي جاسالعان دەپ ايتا الامىن. ءار بالاعا قاجەتتىلىگىنە جانە مۇمكىندىگىنە ساي ارنايى ماماندارمەن بىرىگە وتىرىپ ءجۇزەگە اساتىن, ناتيجەسىندە – ءىس-تاجىريبەگە باعىتتالعان ءبىلىم بەرىلەدى. قوسىمشا بiلiم بەرۋ پەداگوگتارى اراسىندا كوپتەگەن عالىمدار, ەلىمىزدىڭ مادەنيەت قايراتكەرلەرi جانە تانىمال سپورتشىلار بار. ەلباسى ءوز سوزىندە «ەلىمىزگە ءوزىنشە ويلاي بىلەتىن ماماندار كوبىرەك كەرەك» دەگەن بولاتىن. دەمەك, قوسىمشا ءبىلىم بەرۋ بارىسىندا وقۋشىلاردىڭ تانىمدىلىق بەلسەندىلىگىن ارتتىرىپ, شىعارماشىلىق ارەكەتىنىڭ دامۋىنا جول اشىلعان. قازىرگى جاڭا وقىتۋ تەحنولوگيالارىنىڭ الدىنا قويعان ماقساتى – بالانىڭ ءبىلىم, بىلىك, داعدىسىن ەمەس, ونىڭ جەكە تۇلعاسىن قوسىمشا ءبىلىم بەرۋ ارقىلى دامىتۋ.
–وقۋشىلاردىڭ اشقان جاڭالىقتارى بار ما؟
–«حيميك-زەرتتەۋشى» ءۇيىرمەسىنىڭ شاكىرتتەرى قازاقستاندا وسەتىن شوپتەردەن ءيىس سۋ جاساپ شىعاردى. قازىرگى تاڭدا اشقان جاڭالىعىمىزدى امەريكانىڭ ميسسيسيپي ۋنيۆەرسيتەتىنە ساراپتاماعا جىبەردىك. ناتيجەسىن كۇتىپ وتىرمىز.
–مۇندا وقۋشىلار ماشينا جاساۋدى ۇيرەنىپ, كەمە, روبوت ۇلگىسىن قۇراستىرادى ەكەن. عىلىمي-تەحنيكالىق جەتىستىكتەرىڭىزدى ايتىپ وتسەڭىز…
–بىزدە تەحنيكالىق شىعارماشىلىق ءبولىمى بار. مۇندا وقۋشىلاردىڭ عىلىمي-تەحنيكالىق, يننوۆاتسيالىق شىعارماشىلىعىن دامىتامىز. ءوزىڭىز بىلەسىز, عىلىمي-تەحنيكالىق جەتىستىكتەردىڭ قوعامداعى ورنى جەتكىنشەكتەردىڭ جاڭا تەحنولوگيالارعا دەگەن قىزىعۋشىلىعىن كۇن سايىن ارتتىرۋدا. بالانى تەحنيكالىق شىعارماشىلىق باعىتتا تاربيەلەي وتىرىپ, ءارتۇرلى ماتەريالدارمەن جانە قۇرىلعىلارمەن جۇمىس جاساۋدى ۇيرەتۋدەمىز. بالا وسىلايشا ەڭبەك مادەنيەتىن مەڭگەرەدى. كاسىبي جانە ەستەتيكالىق ءبىلىم الادى.
–بالانىڭ تەحنيكالىق شىعارماشىلىعىن دامىتۋ ءۇشىن قانشا جاستان بەرگەن دۇرىس؟
–بىزدە 1-4-سىنىپ وقۋشىلارىنا ارنالعان «باستاپقى تەحنيكالىق شىعارماشىلىق» ۇيىرمەسى جۇمىس جاسايدى. وندا بالالار العاشقى گرافيكالىق ءبىلىمدى مەڭگەرىپ, قۇراستىرۋدىڭ جولدارىن يگەرەدى. «كەمە ۇلگىسىن جاساۋ» سپورتتىق -تەحنيكالىق ءۇيىرمەسىندە 4-7-سىنىپ وقۋشىلارى كەمەلەردىڭ ستەندتىك ۇلگىدەگى تۇرلەرىن جاساپ, ونى سپورتتىق جارىستارعا قاتىستىرا الادى. ساباق بارىسىندا ولار كولىك تاريحىمەن تانىسىپ, قۇراستىرۋشىلىق وي قابىلەتىن جەتىلدىرەدى. تەحنيكالىق سپورت ءتۇرىن كەڭىنەن ناسيحاتتايدى. وندىرىستىك-تەحنيكالىق «روبوتوتەحنيكا» جانە «راديوەلەكترونيكا» ءۇيىرمەلەرى ءارتۇرلى تەحنيكالىق قۇراستىرۋلارعا قىزىعۋشىلىق ءبىلدىرەتىن 6-11-سىنىپ وقۋشىلارىن قابىلدايدى.
–مۇندا كوپشىلىككە بەيتانىس ۇيىرمەلەر جۇمىس ىستەيدى. جاساندى ينتەللەكت ءبولىمى تۋرالى كەڭىنەن ايتىپ بەرسەڭىز…
–جاساندى ينتەللەكت – بۇل مودەل مەن ءتيىستى باعدارلامالىق قۇرالدار جاسايتىن, ەەم كومەگىمەن شىعارماشىلىق مىندەتتەردى شەشۋگە مۇمكىندىك بەرەتىن عىلىمي-زەرتتەۋ باعىتى. وسى رەتتە ايتا كەتەيىن, استانا ءبىر جىلدان استام ۋاقىتقا سوزىلعان بايگەدە الەمنىڭ كوپتەگەن ۇمىتكەر قالالارىن ارتقا تاستاپ, «ەكسپو-2017» كورمەسىن وتكىزۋ قۇقىعىنا يە بولدى. قۋانتاتىنى – تمد مەملەكەتتەر اۋماعىندا تۇڭعىش رەت وتكىزىلەدى. بۇل ساتتە, «جاساندى ينتەللەكت» ءبولىمى دە قالىس قالماي, ءوز ۇلەسىمىزدى قوسۋعا دايىنبىز. كەلەشەكتە ءبىز IT مامانداردىڭ ارنايى توبىن دايارلايتىن بولامىز. جاساندى ينتەللەكت بولىمىندە «كومپيۋتەرلىك گرافيكا», «پروگراممالاۋ ءتىلدەرى», «ينتەرنەت-جوبالاۋ», «يندۋستريانىڭ IT جانە 3D جوبالاۋ» ءۇيىرمەلەرى جۇمىس جاسايدى. وقۋشىلارعا تەحنولوگيانىڭ ۇشى-قيىرى جوق شەكسىز الەمىن تانىستىرۋعا زور مۇمكىندىكتەر جاسالعان.
–مەدياورتالىق – بولاشاق جۋرناليستەر ءۇشىن تاپتىرماس ءتاجىريبە الاڭى. وقۋشىلار ورتالىقتا قانداي جۇمىستارمەن اينالىسادى؟
ء–بىزدىڭ مەدياورتالىق بولاشاق باق وكىلدەرىنە جاستايىنان وسى سالانى «كوزىمەن كورىپ, قولىمەن ۇستاپ كورۋىنە» زور مۇمكىندىك تۋعىزىپ وتىر. زاماناۋي قۇرىلعىلارمەن جابدىقتالعان ورتالىقتا ءبىلىم مەن تاربيە الۋ ۇيىرمەگە قاتىسۋشى جەتكىنشەكتەردىڭ شابىتىنا شابىت قوسىپ, قاناتتاندىراتىنى حاق. بالالار مەن جاسوسپىرىمدەردىڭ باسپاسوز, تەلەۆيزيا, راديو, كينو, فوتو سالالارىنا دەگەن قىزىعۋشىلىعىن ارتتىرادى. بۇگىندە, «جاس جۋرناليست» ۇيىرمەسىنە قاتىسۋشىلار ءبىلىمدى دە بىلىكتى مامانداردىڭ كومەگىمەن وزدەرىن ناعىز جۋرناليست سەزىنىپ, العاشقى تىلشىلىك قىزمەتتەرىن باستاپ تا كەتتى. ولار «ۆەچەرنيايا استانا», «ينفوتسەس» گازەتتەرىنە ماقالالار ازىرلەپ, «استانا» راديوسىنىڭ اۋە تولقىنىنداعى «الاقاي» باعدارلاماسىنىڭ شىعۋىنا ات سالىسۋدا. «ۆيدەوستۋديا» مەن «فوتوستۋديا» ءۇيىرمەلەرىنىڭ ءتاربيەلەنۋشىلەرى بولسا, مەكەمەدە وتەتىن بارلىق مەرەكەلىك ءىس-شارالاردى كاسىبي تۇرعىدا ءتۇسىرىپ, سول تۋىندىلارىن مونتاجداۋدا تالپىنىستارى زور. جاس فوتوسۋرەتشىلەر وقۋشىلار سارايىنداعى بارلىق ۇيىرمەلەرگە ارنايى فوتوسەسسيا جاسادى. بولاشاق وپەراتورلار مەن مونتاجەرلار بولسا, 2012 جىلدىڭ جەلتوقسان ايىندا تۇڭعىش پرەزيدەنت كۇنىنە وراي وتكەن «ۆيدەومونتاج» بايقاۋىندا جۇلدەلى ورىننان كورىندى.
اتالمىش مەرەكەگە وراي مەدياورتالىق قىزمەتكەرلەرى «ەلباسى اشقان ەلورداداعى ءبىلىم وردالارى» اتتى بەينەفيلم ازىرلەپ, استانا قالاسى اكىمدىگىنىڭ ءبىلىم باسقارماسى تاراپىنان العىس حاتقا يە بولدى.
–تەلەجۇرگىزۋشىلەردى دە دايارلايتىن ۇيىرمە اشىلعانىن ەستىدىك…
–وتكەن وقۋ جىلىنىڭ العاشقى توقسانىندا تەلەجۇرگىزۋشىلەردى دايارلايتىن جاڭا ۇيىرمە اشىلدى. 400-دەن استام جەتكىنشەك جۇرگىزۋشى بولۋ ءۇشىن باقتارىن سىنادى. سىننان سۇرىنبەي وتكەندەر وقۋشىلار سارايىنداعى جانە قالا بويىنشا وتەتىن ءىس-شارالاردى جۇرگىزۋدە. مەدياورتالىقتا بىلىكتى ماماندار ەڭبەك ەتەدى. ولار – قازاقستان جۋرناليستەر وداعىنىڭ مۇشەلەرى, رەسپۋبليكالىق راديو قىزمەتكەرلەرى, كوپ جىلدىق پەداگوگيكالىق تاجىريبەسى بار ۇستازدار. بۇدان بولەك لينگۆيستيكا, بەينەلەۋ ونەرى, كيىم ديزاينى بولىمدەرى اشىلعان.
–جاس ورەندەردىڭ تالابى مەن تالانتىن قالاي باعالايسىز؟
– وقۋشىلار سارايىندا ءبىلىم الىپ جاتقان ءاربىر وقۋشى قازاق ەلىنىڭ ەرتەڭگى ءۇمىتى ەكەنى داۋسىز. ءار وقۋشىنىڭ كوزىنەن بىلىمگە دەگەن قۇشتارلىقتى بايقايسىڭ. ءبىر ۇيىرمەدەن شىعىپ, ەكىنشى ۇيىرمەگە اسىعىپ بارا جاتقاندارىن كورگەندە سۇيسىنەسىڭ. جەتكەن جەتىستىكتەرى دە كوپ. سەگىز ايدىڭ ىشىندە الىنعان اسۋلار قۋانتادى, ارينە. ونىڭ ءبارىن جىپكە ءتىزىپ بەرۋ قيىن. باستىسى – كۇن وتكەن سايىن ءبىلىم العىسى كەلەتىن بۇلدىرشىندەرىمىزدىڭ قاتارى كوبەيۋدە. ءبارىمىزدى تاڭقالدىرعان وقيعانى ايتا كەتەيىن. ءبىر ساتتە 15 ۇيىرمەگە قاتار جازىلعان بالا بولدى. ونىڭ قىزىعۋشىلىعىنىڭ ارتقانى سونشا, ساباعىنان دا, ءۇيىرمەلەردەن دە قالعان ەمەس. كەز كەلگەن ۇيىرمە بالا بويىنان تاپقىرلىق پەن كوپ ەڭبەكتى تالاپ ەتەدى. وسى قاسيەتتەر ءبىزدىڭ بالالارىمىزدىڭ بويىندا بار.
–وقۋشىلار سارايى اشىلعالى باسقارىپ كەلەسىز. ايەل بالاسىنا باسشىلىق قىزمەت اۋىر ەمەس پە؟
– ارينە, ءار ءىستىڭ كوتەرەر جۇگى بولادى. باسشى كىم بولسا دا – ايەل باسشى بولسىن, الدە ەر ازامات بولسىن, ماسەلە ونىڭ قانداي باسشى ەكەنىندە. قالاي باسقارعانى ماڭىزدى. قولىنان ءىس كەلە مە, ۇجىمدى العا سۇيرەۋگە قابىلەت-قارىمى, ءبىلىمى مەن بىلىگى جەتە مە, وسى جاعىن ەسكەرۋ كەرەك. ەڭ باستىسى, ءوز ىسىڭە جاۋاپكەرشىلىكپەن قاراۋ كەرەك. باسشى – قۇرعاق ۋادە, بوس سوزدەن اۋلاق بولىپ, ءوز بىلىكتىلىگىن ناقتى ىسپەن كورسەتۋى ءتيىس دەپ ويلايمىن. ۋادە بەردىڭ بە, ونى ورىنداۋ كەرەك. ەكىنشىدەن, ادىلدىك پەن ادالدىققا نۇقسان كەلتىرمەۋگە مىندەتتى. باسشى ادام اركەز ەسىندە ۇستايتىن ءۇشىنشى ماسەلە – قايىرىمدىلىققا جاقىن بولۋ. مەنىڭشە, قازاق ايەلدەرى ءبۇگىنگى تاڭدا قاي سالانى بولسا دا باسقارا الاتىندىعىن دالەلدەگەن سەكىلدى.
–وسىندا شەبەرحاناڭىز بار دەپ ەستىدىك. كۇردەلى شارۋالاردىڭ باسىندا ءجۇرىپ, سۋرەت ونەرىن اقساتىپ المايسىز با؟
–شەبەرحانا بولعان. بىراق ۇيىرمە جۇمىستارىنا كابينەت قاجەت بولعاننان كەيىن, شەبەرحانامدى بەردىم. الايدا, سۋرەت سالۋدان قول ءۇزدىم دەپ ايتا المايمىن. شارشاعان ساتتە ارىپتەستەرىمنىڭ شەبەرحاناسىنا بارىپ, سۇيىكتى كاسىبىممەن اينالىسامىن. ءبىر ايدا ءتورت كارتينا سالىپپىن. ماماندىعىم سۋرەتشى بولعاندىقتان, ءبىلىم عيماراتىنىڭ ءاربىر بۇرىشىنا دا كوڭىل بولەمىن. جانىم سۇلۋلىققا قۇمار بولعاندىقتان شىعار, ۇيدە دە, جۇمىستا دا, اينالامدا دا بارلىق زاتتىڭ اسەم, ادەمى بولعانىن قالايمىن.
گۇلميرا ايماعانبەت
كەمە ۇلگىسى ۇيىرمەسىنىڭ بەكىتىلگەن باعدارلاماسىن قالاي الۋعا بولادى