توسكەيدە مالى, توسەكتە باسى قوسىلعان قازاق پەن قىرعىز – تامىرى ءبىر باۋىرلاس حالىقتار. ىرگەلەس جاتقان ەكى ەلدىڭ باستان كەشكەن تاعدىرى دا بىردەي. وتكەن 30 جىلدا ەكى ەلدىڭ ەكونوميكا, مادەنيەت جانە گۋمانيتارلىق سالاداعى ىنتىماقتاستىعى ۇزدىكسىز نىعايدى. وسى ورايدا قىرعىز رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى داستان ديۋشەكەەۆ گازەت تىلشىسىنە سۇحبات بەردى.
– قازاقستاندا دەمالىس وتكىزۋ سىزگە ۇناي ما؟ 30 جىلداعى تاۋەلسىز قازاقستاننىڭ دامۋ جولىنا, وزگەرىستەرگە قانداي باعا بەرەر ەدىڭىز؟
– مەن ديپلوماتيالىق ميسسيامدى ەندى عانا باستادىم. قازىر دەم الۋعا كوپ ۋاقىت جوق. دەمالىس كۇندەرى دە ۇستەمەلەپ جۇمىس ىستەيمىن. سوندىقتان قازاقستاندا دەمالۋعا ارناۋلى ۋاقىت شىعارا العان جوقپىن. ەكى رەت نۇر-سۇلتانداعى ساياباقتاردى ارالاپ شىقتىم. سوندا بايقاعانىم, قالا تۇرىعىندارىنا, سپورتسۇيەر قاۋىمعا, ۆەلوسيپەدشىلەرگە وتە قولايلى جاعداي جاسالعان. ۆەلوسيپەد جولدارى دا وتە تاماشا. دەمالىس كۇندەرى جۇرتتىڭ بالا-شاعاسىمەن سەيىل-سەرۋەن قۇرۋىنا وتە ىڭعايلى.
تاريحي قىسقا مەرزىم ىشىندە قازاقستان حالقى تۇڭعىش پرەزيدەنت – ەلباسى نۇرسۇلتان ءابىشۇلى نازارباەۆتىڭ باسشىلىعىمەن جوسپارلى ەكونوميكادان باستاپ نارىقتىق ەكونوميكاعا ءوتۋ, حالىقتىڭ ءومىر ءسۇرۋ دەڭگەيىن ارتتىرۋ, قۇقىقتىق جانە دەموكراتيالىق مەملەكەتتى قالىپتاستىرۋ, مەملەكەتتىك ەگەمەندىكتى, قاۋىپسىزدىك پەن تۇراقتىلىقتى ودان ءارى نىعايتۋ, مەملەكەتتىك قۇرىلىستى تەرەڭدەتۋ سياقتى قىزمەتتىڭ بارلىق سالالارىندا زور تابىستارعا جەتتى.
قازاق ەلىنىڭ قۇلشىنىسى مەن جەتىستىكتەرىن تالداي وتىرىپ, قازاقستان رەسپۋبليكاسى ستراتەگيالىق تۇرعىدان دۇرىس جولدى تاڭداعان دەپ نىق سەنىممەن ايتا الامىن. تاۋەلسىزدىك العان ساتتەن باستاپ قازاقستان الەمدىك ارەنادا ستراتەگيالىق ماڭىزدى ەلگە جانە ورتالىق ازيا وڭىرىندەگى بىرەگەي كوشباسشىعا اينالدى. ەكونوميكاسى دامىعان 30 ەلدىڭ قاتارىنا قوسىلۋعا بارلىق كۇش-جىگەرىن جۇمسادى.
قازاقستان كوپجاقتى جانە بەيبىتشىلىكتى سۇيەتىن سىرتقى ساياسات ۇستانىپ, الەمنىڭ 183 ەلىمەن ديپلوماتيالىق قاتىناس ورناتتى. ساياسي, ەكونوميكالىق, الەۋمەتتىك, عىلىم-تەحنيكالىق جانە مادەني سالالارداعى بىرىڭعاي ماقساتتارعا قول جەتكىزۋ ءۇشىن حالىقارالىق قاۋىمداستىق قۇرعان نەگىزگى ۇكىمەتارالىق ۇيىمداردارعا مۇشە بولدى جانە بۇۇ, ەقىۇ, دسۇ, يىۇ (يسلام ىنتىماقتاستىعى ۇيىمى), تمد, شىۇ, ەاەو, ۇقشۇ-مەن ىنتىماقتاستىقتى تەرەڭدەتتى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ بەلسەندى سىرتقى ساياساتى مەن حالىقارالىق باستامالارىنىڭ ارقاسىندا ەۋرازيالىق ەكونوميكالىق وداق, ۇقشۇ, شىۇ جانە تۇركى كەڭەسى سياقتى ۇيىمداردى قۇرۋدا قازاق ەلى نەگىزگى ءرول اتقاردى. قازاقستان تمد ەلدەرىنىڭ ىشىندە ءبىرىنشى بولىپ ەقىۇ ءسامميتىن جانە دۇنيەجۇزىلىك كورمەنى وتكىزدى.
ەل ىشىندەگى وزگەرىستەر مەن جەتىستىكتەرگە توقتالسام, اسا ماڭىزدى ستراتەگيالىق شەشىمدەردىڭ ءبىرى رەتىندە قازاقستان رەسپۋبليكاسىنىڭ ەلورداسىن نۇر-سۇلتان قالاسىنا كوشىرگەنىن اتار ەدىم. قازىر نۇر-سۇلتان, الماتى جانە شىمكەنت قالالارى ميلليون تۇرعىنى بار قالا مارتەبەسىنە يە بولدى. بۇدان باسقا, قازاقستان بارلىق ۇلتتاردىڭ بىرلىگى مەن تەڭ قۇقىلىعى قۇندىلىقتارى ساقتالاتىن جانە قولداۋ تاپقان كوپۇلتتى مەملەكەت بولىپ تابىلادى.
قازاقستاندا سپورتقا كوپ كوڭىل بولىنەدى. 28 جىل ىشىندە قازاقستاندىق سپورتشىلار 60-تان استام وليمپيادا جۇلدەسىن جەڭىپ الدى. ينۆەستيتسيا تارتۋ جاعىندا سوڭعى 30 جىلدا قازاقستانعا 300 ميلليارد دوللاردان استام شەتەلدىك ينۆەستيتسيا تارتىلدى. قوسىمشا 1250 جاڭا جۇمىس ورنى, 300 مىڭنان استام جۇمىس ورنى اشىلدى. مۇنان سىرت, ءبىلىم بەرۋ, دەنساۋلىق ساقتاۋ جانە الەۋمەتتىك سالاداعى جەتىستىكتەردىڭ ءبىرى حالىققا جەڭىلدەتىلىگەن شارتتارمەن نەسيە بەرۋ ارقىلى تۇرعىن ءۇي ماسەلەسىن شەشۋگە كۇش سالدى. بۇل دا – ۇلكەن جەتىستىك.
– ءسىزدىڭ ويىڭىزشا, ەكى ەلدىڭ قارىم-قاتىناسى قانداي دەڭگەيگە كوتەرىلدى؟ الداعى ۋاقىتتا قانداي سالالارداعى ىنتىماقتاستىقتى دامىتۋ, باسىمدىق بەرۋ قاجەت دەپ سانايسىز؟
– ەكى باۋىرلاس مەملەكەت اراسىنداعى ديپلوماتيالىق قاتىناس 1992 جىلى 15 قازاندا ورنادى. سونىمەن قاتار, ەكى ەل اراسىنداعى تۋىسقاندىق قارىم-قاتىناستار ۇزاق ۋاقىت بويى ساقتالىپ كەلە جاتقانىن اتاپ وتكىم كەلەدى. «توسەكتە باسى, توسكەيدە مالى قوسىلعان» قىرعىز بەن قازاق ەجەلدەن توننىڭ ىشكى باۋىنداي تاتۋ-ءتاتتى عۇمىر كەشىپ كەلەدى. مىنە, وسى قاتىناستار قازىرگى كەزەڭدەگى ەكىجاقتى ىنتىماقتاستىقتى دامىتۋدىڭ نەگىزگى فاكتورى بولىپ تابىلادى جانە ءبىزدىڭ حالقىمىزدىڭ اراسىنداعى تاريحي تاعدىرلاردىڭ ورتاقتىعىن دالەلدەيدى.
تاۋەلسىزدىك جىلدارىندا ەكىجاقتى قاتىناستاردىڭ بەرىك ىرگەتاسى قالاندى. بۇگىندە ەكى ەل اراسىندا ەشقانداي اۋماقتىق شاعىمدار مەن ساياسي قايشىلىقتار جوق. بۇگىنگى تاڭدا 180-نەن استام مەملەكەتارالىق, ۇكىمەتارالىق جانە ۆەدومستۆوارالىق قۇجاتتارعا قول قويىلدى. سونىمەن قاتار, قىرعىز-قازاق ىنتىماقتاستىعىنىڭ تۇراقتى دامۋىنىڭ جالپى ستراتەگيالىق, تۇجىرىمدامالىق تاسىلدەرى مەن باعىتتارىن ايقىندايتىن «ماڭگىلىك دوستىق پەن وداقتاستىق قاتىناستار تۋرالى شارتى» جاسالدى. ەكى ەل اراسىنداعى ءوزارا ءتيىمدى ىنتىماقتاستىق پەن شىنايى باۋىرلاستىق قارىم-قاتىناستاردى ورناتۋداعى نازارباەۆتىڭ تاريحي ءرولى دە ەرەكشە.
قوس مەملەكەت اراسىنداعى وداقتاستىق قاتىناستار مەن ستراتەگيالىق ارىپتەستىك – جوعارى مەملەكەتارالىق كەڭەس, پارلامەنتارالىق كەڭەس, ۇكىمەتارالىق كەڭەس جانە سىرتقى ىستەر مينيسترلەرىنىڭ كەڭەسى سياقتى ەكى جاقتى ورگاندار ءوز وتىرىستارىندا ەكى جاقتى قاتىناستاردىڭ جاي-كۇيى مەن پەرسپەكتيۆالارىن, سونداي-اق ەكى تاراپ تا كوڭىل ءبولىپ وتىرعان وزەكتى ماسەلەلەردى قارايدى, تالقىلايدى. سونىمەن قاتار, جوعارى دەڭگەيدەگى تۇراقتى كەزدەسۋلەر مەن كەلىسسوزدەر ەكىجاقتى ىنتىماقتاستىقتى نىعايتۋدا ماڭىزدى ءرول اتقارادى. تاۋەلسىزدىك جىلدارىندا مەملەكەتتەر اراسىندا كوپتەگەن ءىس-شارالار, ءتۇرلى دەڭگەيدەگى كەزدەسۋلەر وتكىزىلدى, ساياسي, ساۋدا-ەكونوميكالىق جانە مادەني-گۋمانيتارلىق ىنتىماقتاستىق تۋرالى كەلىسىمدەرگە قول قويىلدى.
بيىلعى باستى وقيعا قىرعىز رەسپۋبليكاسىنىڭ پرەزيدەنتى سادىر جاپاروۆتىڭ قازاقستان رەسپۋبليكاسىنا العاشقى مەملەكەتتىك ساپارى بولدى. قازاقستان پرەزيدەنتى قاسىم-جومارت توقاەۆ قىرعىزستانعا 10 مىڭ توننا ۇن گۋمانيتارلىق كومەك جىبەرۋدى ۇيعاردى. وسى جىلدىڭ شىلدە ايىندا قازاقستان قىرعىزستان دەنساۋلىق ساقتاۋ مينيسترلىگىنە گۋمانيتارلىق كومەك رەتىندە «QazVac» ۆاكتسيناسىنىڭ 25 مىڭ دوزاسىن بەرگەنىن ايىرىقشا اتاپ وتكىم كەلەدى. وسىنداي كومەك كورسەتكەنى ءۇشىن قازاقستان حالقىنا جانە مەملەكەت باسشىسىنا زور العىسىمدى بىلدىرەمىن.
الداعى ۋاقىتتا قازاقستان رەسپۋبليكاسىنىڭ پرەزيدەنتى ق.توقاەۆتىڭ قىرعىز رەسپۋبليكاسىنا ساپارى, سونداي-اق ەكى ەلدىڭ جوعارى مەملەكەتارالىق كەڭەسىنىڭ, پارلامەنتارالىق كەڭەسىنىڭ, ۇكىمەتارالىق كەڭەسىنىڭ جانە سىرتقى ىستەر مينيسترلەرى كەڭەسىنىڭ كەزەكتى وتىرىستارىن وتكىزۋ جوسپارلانعان.
ءبىزدىڭ ماقساتتارىمىزدىڭ ءبىرى – ەكى ەل اراسىنداعى دوستىق قارىم-قاتىناس پەن ستراتەگيالىق سەرىكتەستىكتى دامىتۋ نەگىزىنىڭ ءبىرى بولىپ تابىلاتىن ساۋدا-ەكونوميكالىق ىنتىماقتاستىق. قازاقستان قىرعىزستان ءۇشىن نەگىزگى ساۋدا سەرىكتەس سانالادى. قىرعىزستان نارىعىندا قازاقستاندىق ينۆەستورلار, بيزنەستىك قۇرىلىمدار مەن كاسىپكەرلەر بەلسەندى جۇمىس ىستەۋدە. ءبىزدىڭ ەلىمىزدە قازاق كاپيتالىنىڭ قاتىسۋىمەن 300-دەن استام كاسىپورىن, ال قازاقستاندا قىرعىز كاپيتالىنىڭ قاتىسۋىمەن 250-گە جۋىق بىرلەسكەن كاسىپورىن جۇمىس ىستەيدى.
2021 جىلدىڭ قاڭتار-ماۋسىم ايلارىندا ەكىجاقتى تاۋار اينالىمىنىڭ كولەمى 495,6 ملن دوللاردى قۇراپ, 2020 جىلدىڭ سايكەس كەزەڭىمەن سالىستىرعاندا 28,4 پايىزعا ءوستى. 2021 جىلدىڭ 1 توقسانىندا قازاقستاننان تىكەلەي ينۆەستيتسيا اعىنى 8,1 ملن دوللاردى قۇرادى. 2020 جىلدىڭ سايكەس كەزەڭىمەن سالىستىرعاندا قىرعىزستان ەكونوميكاسىنا قۇيىلعان قازاقستاندىق ينۆەستيتسيا كولەمى 8 پايىزعا ارتتى.
مەملەكەت باسشىسىنىڭ قازاقستان رەسپۋبليكاسىنا مەملەكەتتىك ساپارى جانە 2021 جىلعى ساۋىردە قازاقستاندا وتكەن قىرعىز-قازاقستان ۇكىمەتارالىق كەڭەسىنىڭ 9-وتىرىسىنىڭ قورىتىندىسى بويىنشا تاراپتار وسى باعىتتاعى ماڭىزدى قۇجاتتارعا قول قويدى. اتاپ ايتقاندا, ءوزارا ساۋدا كولەمىن 1 ميلليارد دوللارعا جەتكىزۋ جانە ترانزيتتىك-لوگيستيكا سالاسىنداعى ماسەلەلەردى جەدەل شەشۋ – باستى ماقساتتاردىڭ ءبىرى.
ەكى ەل ۇكىمەتارالىق دەڭگەيدە ترانسشەكارالىق ىنتىماقتاستىق الەۋەتىن اشۋ ءۇشىن تۇڭعىش كەزەكتى «قىرعىز-قازاق وڭىرارالىق فورۋمىن» وتكىزۋ تۋرالى ۋاعدالاستىققا كەلىستى. بۇل تۇرعىدا وڭىرارالىق ىنتىماقتاستىق ەكىجاقتى ساۋدا-ەكونوميكالىق ىنتىماقتاستىقتى كەڭەيتۋدىڭ ماڭىزدى فاكتورىنا اينالىپ وتىرعانىن, جەرگىلىكتى ءوزىن-ءوزى باسقارۋ دەڭگەيىندەگى بايلانىستى نىعايتىپ وتىرعانىن اتاپ وتكەن ءجون. قازىرگى تاڭدا قىرعىزستان مەن قازاقستاننىڭ ءتورت وبلىسى – ىستىقكول مەن الماتى, وش پەن قاراعاندى, جامبىل مەن تالاس, شۋ جانە وڭتۇستىك قازاقستان وبلىستارى, سونداي-اق ەكى ەلدىڭ استانالارى مەن قالالارى, اتاپ ايتقاندا, بىشكەك پەن نۇر-سۇلتان, وش جانە تاراز – ءوزارا بارىس-كەلىس ورناتىپ, باۋىرلاستىق قارىم-قاتىناستار تۋرالى كەلىسىمدەرگە قول قويدى. ەكى ەلدىڭ باسقا ايماقتارىمەن دە وسىنداي ىنتىماقتاستىق مەحانيزمى قۇرىلادى دەپ كۇتىلۋدە.
مادەني-گۋمانيتارلىق ىنتىماقتاستىق ارقىلى ءتۇرلى مادەني, عىلىمي جانە سپورتتىق ءىس-شارالار تۇراقتى وتكىزىلىپ, ەكى ەلدىڭ جاستارى مەن وقۋ ورىندارى اراسىندا تىعىز بايلانىس ورناتىلۋدا. 2018 جىلى قازاقستاندا شىڭعىس ايتماتوۆتىڭ 90 جىلدىعىنا ارنالعان ءىس-شارا, 2019 جىلى قازاقستاندا «ماناس» ەپوسىنا ارنالعان سەمينار جانە «ماناس – ۇلى دالانىڭ ماڭگىلىك مۇراسى» اتتى فورۋمدار وتكىزىلىپ, شارا بارىسىندا س.راەۆ, شىڭعىس ايتماتوۆتىڭ «بالالىق شاق», «قازىرگى قىرعىز پوەزياسى», سونداي-اق م.مەرگەنباەۆتىڭ لاتىن تىلىندە جازىلعان «ماناس» ەپوپەياسى قازاقستاندىق وقىرماندارعا تارتۋ رەتىندە تاراتىلدى.
COVID-19 پاندەمياسىنا قاراماستان, ەلدەرىمىز اراسىنداعى مادەني جانە گۋمانيتارلىق ءوزارا ءىس-قيمىل 2020 جىلى دا ءوز جالعاسىن تاپتى. ءبىر عانا مىسال, «ماناس» ەپوسىنىڭ قازاق تىلىندەگى «ماناس – قىرعىز حالقىنىڭ ەپوسى» دەپ اتالاتىن كىتابى. قازاقستانداعى جالعىز ماناسشى ب.ءالىمجانوۆ قىرعىز حالىق ونەرىنىڭ ءىنجۋ-مارجاندارىن دامىتۋعا جانە تاراتۋعا قوسقان زور ۇلەسى ءۇشىن «دوستىق» وردەنىمەن ماراپاتتالدى, ونى قىرعىز رەسپۋبليكاسىنىڭ پرەزيدەنتى س.جاپاروۆ تابىس ەتتى.
الداعى كۇندەرگە جوسپارلانعان شارالاردىڭ قاتارىندا قىرعىزستاننىڭ قازاقستانداعى مادەني كۇندەرى دە بار. سونىمەن قاتار, نۇر-سۇلتاندا شىڭعىس ايتماتوۆ پەن ماناستىڭ جانە بىشكەكتە ا.قۇنانباەۆتىڭ ەسكەرتكىشتەرىن ورناتۋ, سونداي-اق قىرعىز ستۋدەنتتەرىنىڭ قازاقستاننىڭ بيۋدجەتتىك ۋنيۆەرسيتەتىندە وقۋىنا جىل سايىنعى كۆوتانى ۇلعايتۋ ماسەلەسى دە قارالىپ جاتىر.
قورىتىندىلاي كەلە, قىرعىزستان مەن قازاقستان اراسىندا ءوزارا قىزىعۋشىلىق تۋدىراتىن بارلىق سالالارداعى ىنتىماقتاستىقتىڭ پروگرەسسيۆتى ديناميكاسىن ودان ءارى دامىتۋعا جانە قولداۋعا بار كۇش-جىگەرىن سالاتىن كوپتەگەن جوسپارلار بار.
– قازاقستاندا قاي ۋاقىتتان بەرى تۇراسىز؟ ەلىمىزگە العاش كەلگەن كەزدەگى اسەرىڭىز قانداي بولدى؟
– 5 قىركۇيەكتەن بەرى قازاقستاننىڭ نۇر-سۇلتان قالاسىندا تۇرامىن. مەن قازاقستانعا العاش رەت 2010 جىلى كەلدىم. مەن ەكىنشى جوو-دا وقىپ جۇرگەن كەزىمدە الماتى ارقىلى ماسكەۋگە ۇشاتىنمىن. مەنىڭ قازاقستاندا دوستارىم بار, سولارعا باردىم. وسكەمەن قالاسىنا دا باردىم, ماعان قالانىڭ سۇلۋلىعى مەن تابيعاتى قاتتى ۇنادى. پاۆلوداردا بولدىم, ەرتىس وزەنىنە دەمالۋعا بارعان كۇندەرىم بولدى. سەمەيدە, الماتىدا, تۇركىستاندا, تارازدا كوپ بولدىم. ماعان قازاق جەرى, حالقى قاتتى ۇنايدى. مەن ءۇشىن قازاق حالقى – جانى جاقىن ءبىر تۋعان ەل.
– ءوز ەلىڭىزدى جانە قازاقستاندى ءبىر اۋىز پىكىرمەن, سوزبەن قالاي سيپاتتار ەدىڭىز؟
– ءبىر اۋىز سوزبەن ايتساق, قىرعىز بەن قازاق كوزدىڭ اعى مەن قاراسى سياقتى. ەڭ باستىسى, ءبىزدىڭ ءدىنىمىز, ءتىلىمىز, ءداستۇرىمىز ءبىرتۇتاس, بۇل – ءبىزدىڭ مىزعىماس ىرگەتاسىمىز.
– ءبىزدىڭ گازەت ارقىلى استانالىقتارعا قانداي تىلەك ايتاسىز؟
– نۇر-سۇلتان قالاسىنىڭ تۇرعىندارىنا جالىندى سالەم جولدايمىن. نۇر-سۇلتان قالاسى كوركەيە بەرسىن دەپ تىلەيمىن. ماعان نۇر-سۇلتان قالاسى قاتتى ۇنادى. جاراتۋشى نۇر-سۇلتاندىقتارعا زور دەنساۋلىق, ۇزاق عۇمىر, جۇمىستارىنا تابىس, شاڭىراقتارىڭىزعا بەرەكە-بىرلىك بەرسىن. بارلىق تىلەكتەر قابىل بولسىن دەپ تىلەيمىن!
قىسقاشا ومىردەرەك:
ديۋشەكەەۆ داستان ستانبەكوۆيچ 1987 جىلعى 12 جەلتوقساندا ىستىقكول اۋدانىنىڭ سەمەنوۆكا اۋىلىندا دۇنيەگە كەلگەن. 2005-2010 جىلدار ارالىعىندا ءجۇسىپ بالاساعۇن اتىنداعى قىرعىز ۇلتتىق ۋنيۆەرسيتەتىندە تاريح جانە ايماقتانۋ ماماندىعى بويىنشا ءبىلىم العان. 2011-2015 جىلدارى رەسەي فەدەراتسياسى سىرتقى ىستەر مينيسترلىگىنىڭ ديپلوماتيالىق اكادەمياسىندا «حالىقارالىق قاتىناستار» ماماندىعى بويىنشا ماگيستر دارەجەسىن الدى. 2010-2011 جىلدار ارالىعىندا چولپون-اتا قالاسىندا MegaCom ۇيالى بايلانىس وپەراتورى فيليالىنىڭ ديرەكتورى قىزمەتىن اتقارسا, 2015-2020 جىلدارى ساياسي تەحنولوگيالاردى پراكتيكالىق قولدانۋ سالاسىنداعى مامان بولىپ قىزمەت ىستەگەن. 2017-2018 جىلدارى قىرعىز رەسپۋبليكاسى جوعارعى كەڭەسى (جوگوركۋ كەنەشى) دەپۋتاتىنىڭ كومەكشىسى بولسا, 2018-2020 جىلدار ارالىعىندا قىرعىز رەسپۋبليكاسىنداعى 2گيس حالىقارالىق كومپانياسىنىڭ ديرەكتورى قىزمەتىن قوسا اتقارۋشى, «پوليپلاست-شىعىس» حالىقارالىق كومپانياسىندا قىرعىزستانداعى كۋراتورى بولىپ قىزمەت ىستەدى. 2020 جىلى قازان, قاراشا ايلارىندا قىرعىز رەسپۋبليكاسى پرەمەر-ءمينيسترىنىڭ ءباسپاسوز حاتشىسى بولىپ تاعايىندالسا, 2020 جىلعى قاراشادان 2021 جىلعى تامىزعا دەيىن قىرعىز رەسپۋبليكاسى پرەزيدەنتى اكىمشىلىگىنىڭ سىرتقى ساياسات ءبولىمىنىڭ مەڭگەرۋشىسى بولدى. 2021 جىلى تامىز ايىنان باستاپ قىرعىز رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى بولدى.
