ەكسپەديتسياعا قاتىسۋشىلار جولشىباي بىرنەشە ەلدى-مەكەنگە توقتاپ, قازاقستاندىقتاردى مەرەكەلىك كونتسەرتپەن قۋانتپاقشى.
«ۇلى جىبەك جولى. كونە تارازدان اسقاق استاناعا تارتۋ» كەرۋەنى «كونە-تاراز» تاريحي-ارحەولوگيالىق كەشەننەن استاناعا جولعا شىقتى. قالا تۇرعىندارى مەن قوناقتارى تاريحي ساتكە كۋاگەر بولدى.
كەرۋەن 25 جۇك ارتىلعان تۇيەدەن, 46 ات جانە كەرۋەنشىدەن, 10 جۇك ماشيناسىنان جانە 3 اۆتوبۋستان تۇرادى. وعان قوسا, شىعارماشىلىق ۇجىمدار, دارىگەرلەر, جول پوليتسياسى مەن توتەنشە جاعداي قىزمەتكەرلەرى – بارلىعى 150 ادام ەلورداعا اتتاندى.
اۋقىمدى شاراعا قاتىسۋشىلار جامبىل جانە قاراعاندى وبلىستارىنداعى 10 ەلدى-مەكەنگە ايالدايدى. ءار جەردە كيىز ۇيلەر تىگىلىپ, ۇلكەن ساحنالاردا ءتۇرلى-ءتۇرلى شارالار ۇيىمداستىرىلادى. ماسەلەن, تۇرعىندار كونتسەرتتەر مەن تەاترلاندىرىلعان قويىلىمدار تاماشالاپ, ۇلتتىق سپورت تۇرلەرىنەن جارىسقا قاتىسا الادى.
كەرۋەن استاناعا ات باسىن تىرەگەن سوڭ, كورمە كەشەنى اۋماعىندا 26-30 شىلدەدە جامبىل وبلىسىنىڭ مادەني كۇندەرى وتەدى. بەس كۇن بويى م.گوركي اتىنداعى ورىس دراما تەاترىندا, جاستار تەاترىندا جانە «حان-شاتىر» ساۋدا-ويىن-ساۋىق ورتالىعى ايماعىندا كورمەلەر, تەاترلاندىرىلعان قويىلىمدار, كونتسەرتتىك باعدارلامالار جوسپارلانىپ وتىر. ال 28 شىلدەدە «قازانات» اتشابارىنداعى ەتنواۋىلدا قولونەر جانە ساندىك-قولدانبالى بۇيىمداردىڭ جارمەڭكەسى وتكىزىلەدى كۇتىلۋدە.
شارا ۇلى جىبەك جولى ورتالىقتارىنىڭ ءبىرى بولعان ەجەلگى تاراز قالاسىنىڭ تاريحىن ەكسپو قوناقتارىنا تانىستىرۋ ماقساتىندا ۇيىمداستىرىلىپ وتىر.
گۇلدانا تالعاتقىزى
