استاناداعى «MEGA» ويىن-ساۋىق ورتالىعى الدىندا سەنبى-جەكسەنبى كۇندەرى جامبىل وبلىسى تاۋار وندىرۋشىلەرىنىڭ اۋىل شارۋاشىلىق جارمەڭكەسى ءوتتى.
بىز جارمەڭكەگە كەلگەندە ءبىر-بىرىمەن ءيىن تىرەسكەن حالىقتى كورىپ, ابىرجىپ قالدىق. «ەت ارزان», «كوكونىستىڭ باعاسى سۋ تەگىن», «بالى بال تاتيدى» ەكەن دەگەن كوپشىلىكتىڭ جاپاتارماعاي ايتىپ جاتقان اڭگىمەلەرىن ەستىپ, ءبىز دە «بالعا ۇيمەلەگەن اراداي» شۇباپ تۇرعان جۇرتتىڭ سوڭىن الا كەزەككە تۇردىق. راسىندا, اۋليەاتالىق شارۋالاردىڭ اكەلگەن ونىمدەرىنىڭ باعاسى اسپانداپ تۇرعان باس قالانىڭ باسىنەن 15-20 پايىز تومەندەۋ ەكەن. ايتالىق, قاراپايىم عانا كارتوپتىڭ باعاسى – 55 تەڭگە, ءبىزدىڭ ەلوردادا ونىڭ باعاسى – 80-110 تەڭگەنىڭ ۇستىندە. پياز – 40 تەڭگە. قىزاناق, قيار, بولگار بۇرىشىنىڭ باعاسى – 50 تەڭگە, باكلاجان – 30 تگ, 1 كگ قانت – 150 تەڭگە. بىلاي قاراساڭىز, قاراپايىم ادامنىڭ قالتاسى كوتەرەتىن باعالار. قىزىعىپ كەتىپ, كوكونىستەردى قاپشىقپەن الىپ جاتقانداردى دا كوردىك. ءبىر شەتتە قاپقا سالعان كارتوبىن «اۋپىرىمدەي» كوتەرىپ, ماشيناسىنا قاراي ەمپەلەڭدەپ بارا جاتقان جىگىتتى سوزگە تارتتىق:
– اينالايىن-اۋ, مىناۋ ازىقتىق تاۋاردىڭ قۇنى ۇشىنىپ تۇرعان زاماندا وسىنداي جارمەڭكەدەگى ارزان باعانىڭ ءوزى قالت-قۇلت كۇن كورىپ وتىرعان ءبىز سەكىلدى جارلى-جاقىبايلارعا اجەپتاۋىر قولداۋ عوي. سوندىقتان, الداعى قىستا قامسىز وتىرمايىن دەپ, بارلىق كوكونىستى قاپشىقتاپ الدىم. ايتەۋىر, قارىن توق بولسا, ۋايىم از عوي, – دەيدى استانالىق بالقاش اعامىز.
سول مەزەتتە جانار ەسىمدى كەلىنشەك تە ءوز پىكىرىن ايتىپ ۇلگەردى:
– ءتورت بالام بار, ءوزىم ءبىر مەكەمەدە ەدەن جۋامىن. امال نە, قيىندىق ارقامىزعا شىمبايداي باتادى. بۇگىنگى جارمەڭكەدەگى باعالار ءبىزدىڭ قالا نارىعىنا قاراعاندا ەداۋىر ارزان. سوندىقتان, شامام كەلگەنشە بارلىق ازىق-تۇلىكتى مولداپ الىپ جاتىرمىن. اسىرەسە, كوكونىستىڭ قۇنى ارزان دەسە بولادى. ەكى قاپشىق كارتوپ الىپ, كوڭىلىم جايلانىپ تۇر, – دەيدى.
جامبىل وبلىستىق اۋىل شارۋاشىلىق باسقارماسىنىڭ باستىعى نۇرجان نۇرجىگىتوۆتىڭ ايتۋىنشا, جارمەڭكەگە قۇنى 24,5 ملن تەڭگەنى قۇرايتىن 115 توننا اۋىل شارۋاشىلىق ونىمدەرى اكەلىنگەن. ونىڭ ىشىندە: 10 توننا ەت, 2 توننا ءسۇت ونىمدەرى مەن 5 توننا شۇجىق تۇرلەرى جانە 57 تونناداي جەمىس-جيدەك, كوكونىس بار. ايتۋلى شاراعا جامبىلدان تاۋار تيەلگەن 6 رەفريجەراتور كولىگى جانە 30 ساتۋشى كەلگەن. جارمەڭكە ءبىر اي بويى اتالعان ورىندا سەنبى-جەكسەنبى كۇندەرى وتكىزىلەدى.
– ەلوردا اكىمى وسىنداي جارمەڭكەلەردى بارلىق ايماقتار ءۇشىن ۇيىمداستىرۋعا تاپسىرما بەردى. وسىعان وراي جۇمىس ىستەپ جاتىرمىز. العاشقى باستامانى جامبىل وبلىسى قولداپ, حالىقتىڭ كوڭىلىنەن شىعۋدا. جارمەڭكەدەگى ونىمدەردىڭ باعالارى دا قولجەتىمدى. ەندى اتالعان شارا ءوز جالعاسىن تابا بەرمەك, – دەيدى استانا قالالىق اۋىلشارۋاشىلىق باسقارماسىنىڭ باستىعى اسەت قۇرمانعاليەۆ.
ازامات ەسەنجول
