كەشە ماسكەۋدەگى استانانىڭ مادەني كۇندەرى اياسىندا رەسەيدىڭ ءىرى مادەني ورتالىعى – ماسكەۋ حالىقارالىق مۋزىكا ءۇيىنىڭ ساحناسىندا ەلوردالىق م. گوركي اتىنداعى اكادەميالىق ورىس دراما تەاترى بەلگىلى جازۋشى بولات جانداربەكوۆتىڭ «ساق» رومانىنىڭ جەلىسىمەن دايىنداعان «توميريس – ساق پاتشايىمى» اتتى تاريحي قويىلىمدى جۇرتشىلىققا ۇسىندى.
ومىردەن ەرتە وزعان قالامگەر بولات جانداربەكوۆتىڭ «ساق» رومانى كەزىندە وقىرمانداردان جوعارى باعا العان ەدى. جۇرتشىلىق تاريحي كىتاپتى قولىنان تۇسىرمەي وقىعان. شىعارمادا ساق داۋىرىندە عۇمىر كەشىپ, پاتشايىم اتانعان ءتوميريستىڭ ءومىر جولى مەن كۇرەسكەرلىك قاسيەتى كوركەم سومدالعان. تۋىندىدان سوناۋ كوز ۇشىنداعى قياندا قالعان ساق ءداۋىرىنىڭ ورەلى مادەنيەتىن كورۋگە بولادى. سول كەزدىڭ وزىندە دە ءبىزدىڭ ارعى تەكتى بابالارىمىزدىڭ وركەنيەتكە ەلەۋلى ۇلەس قوسقاندىعىن بايقايمىز. تاريحي درامادا وسى باياننىڭ بارلىعى بايىپتى بەينەلەنگەن.
– ماسكەۋدەگى استانانىڭ مادەني كۇندەرى اياسىندا قالا تۇرعىندارىنا ەلىمىزدىڭ تەرەڭ تاريحىنان سىر شەرتەتىن «توميريس – ساق پاتشايىمى» اتتى تاريحي درامانى ادەيى الىپ كەلدىك. ويتكەنى وندا تاريحىمىزدىڭ تەرەڭ سىرلارى جاتىر. وتكەن جىلى عانا قويىلىمنىڭ پرەمەراسى بولدى. وعان مەملەكەتتىك حاتشى گۇلشارا ابدىقالىقوۆا قاتىسىپ, جوعارى باعاسى بەردى. قويىلىم ەلوردالىق كورەرمەندەردىڭ دە ىستىق ىقىلاسىنا بولەندى. ماسكەۋلىكتەر دە سپەكتاكلدى بيىك باعالادى. ارعى بابالارىمىزدىڭ تاريحىمەن تانىستى. ارتىستەردىڭ ونەرىنە ءتانتى بولدى. تۋىندىنىڭ تالعامى بيىك كورەرمەندەردىڭ كوڭىلىنەن شىققانىنا ريزا بولىپ تۇرمىن, – دەيدى م. گوركي اتىنداعى اكادەميالىق ورىس دراما تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى ەركىن قاسەنوۆ.
تاريحي قويىلىمدا ەلوردالىق ارتىستەردىڭ شەبەرلىكتەرى بارىنشا اشىلدى. داۋىس مانەرى, كيىمدەرى مەن ساحناداعى وزدەرىن ۇستاۋ مادەنيەتى جوعارعى دەڭگەيدە بولدى. سپەكتاكلدى كورۋگە كەلگەن رەسەيلىك ارىپتەستەرى دە ولاردىڭ ونەرىنە ءتانتى بولدى. العىستارىن جەتكىزدى. ال كورەرمەندەردىڭ پىكىرى ەرەكشە. ءبارى دە تاريحي درامانىڭ ۇناعانىن ايتىپ, العىستارىن جەتكىزىپ جاتتى.
ازامات ەسەنجول
