تاريحي كينولار تەگىن كورسەتىلەدى
ەلوردالىق 5-11-سىنىپ وقۋشىلارى جىل سوڭىنا دەيىن كينوتەاترلاردا وتاندىق فيلمدەردى تەگىن تاماشالايتىن بولادى. مۇنداي مۇمكىندىك «ۇلى دالا مۇراسى» جوباسىنىڭ اياسىندا بەرىلىپ وتىر.
ەل مەن جەردىڭ تاريحىن, مادەنيەتىن بىلۋگە نەگىزدەلگەن بۇل باستاماعا استانا قالاسىنىڭ اكىمدىگى مۇرىندىق بولدى.
– ەلباسى ءوزىنىڭ «ۇلى دالانىڭ جەتى قىرى» ماقالاسىندا ەل تاريحىن ءبىلۋدىڭ ماڭىزدىلىعىن اتاپ ءوتتى. سونىمەن قاتار, پرەزيدەنت تاريحقا قۇرمەتپەن قاراۋعا جانە زەردەلەۋگە, وتكەننەن ساباق ۇيرەنۋگە شاقىرىپ, پاتريوتيزم مەكتەپ قابىرعاسىنان باستالۋى كەرەكتىگىن ايتتى. ءبىزدىڭ ويىمىزشا, كينوماتوگرافيا ارقىلى وقۋشىلار قازاق حالقىنىڭ عاسىرلار بويى ساقتاعان بارلىق ۇلتتىق قۇندىلىقتارىن بويلارىنا ءسىڭىرىپ وسەدى, – دەيدى استانا قالاسى قوعامدىق دامۋ ىستەرى باسقارماسىنىڭ باسشىسى دانيار ەسين.
بالالارعا ارنالىپ كورسەتىلەتىن فيلمدەردىڭ بارلىعى تاريحي تاقىرىپتا. العاشقى كۇنى شاكىرتتەر «كەرۋەن» ساۋدا جانە ويىن-ساۋىق ورتالىعىندا «جاۋجۇرەك مىڭ بالا» كينوسىن تاماشالادى. ودان بولەك, الداعى ۋاقىتتا «الماس قىلىش», «اناعا اپارار جول», «جەرۇيىق», «قۇنانباي», «تاك سلوجيليس زۆەزدى» سەكىلدى تانىمال كينوتۋىندىلاردىڭ كورسەتىلىمى ۇيىمداستىرىلماق.