ەلوردانىڭ ەلەكتر سالاسىنىڭ دا وزىندىك تاريحى بار. اقمولا قالاسىن قۋاتتاندىرۋ سەكسەنىنشى جىلدىڭ ورتاسىنان باستاپ تولىق قۋاتىندا جۇرگىزىلە باستادى. وتكەن جىلى «ايماقتىق ەلەكترجەلىسى كومپانياسى» اق ءوزىنىڭ قىرىق ءبىر جىلدىعىن اتاپ ءوتتى.
اقمولانى ەلەكترلەندىرۋدىڭ باستاماسى وتكەن عاسىردىڭ جيىرماسىنشى جىلىنىڭ اياعىندا اباي داڭعىلىنىڭ باتىس بولىگىنەن باستالدى (1920 جىلعا دەيىن ول تسەركوۆنايا كوشەسى, 1991 جىلعا دەيىن لەنين داڭعىلى دەپ اتالدى). وسى داڭعىلدىڭ بويىندا قازىرگى №27 ءۇيدىڭ جانىندا بۇرىن كىرپىشتەن سالىنعان شاعىن عانا دۇكەن تۇردى. كەيىن سول دۇكەن باسقا جەرگە كوشىرىلىپ, 1928 جىلى وسى ۇيگە قۋاتى 18 كۆت ىشتەن جاناتىن دينامو-ماشينا ورناتىلدى. مىنە, وسى تۇڭعىش قۋات بەرۋشى ورتالىق اقمولا مەملەكەتتىك ەلەكتر ستانساسى بولىپ تاريحتا قالدى. مۇندا جۇمىس ءبىر اۋىسىمدا ءجۇردى. الايدا كەشقۇرىم اۋىلدىڭ جاستارى جينالىپ, ەلەكتر ستانسانىڭ جۇمىسىن قىزىقتايتىن. ولارعا ديزەل قوزعالتقىشتىڭ شىر اينالعانى, دينامو-ماشينانىڭ گۋىلى, ءبارى-ءبارى تاڭسىق بولاتىن.
قۋات بەرۋشى جەلىنىڭ جالپى ۇزىندىعى 8 كم بولدى. ەلەكتر قۋاتى تەك عانا مەملەكەتتىك مەكەمەلەر ءۇشىن بەرىلدى. اقمولا قالاسىندا ەلەكتر قۋاتىنىڭ جەتىسپەۋشىلىگى قاتتى سەزىلگەسىن 1932 جىلى 7 قاڭتاردا قالالىق كەڭەس مەكەمەگە تەك 60 ۆت-تان, ال جەكە ۇيلەرگە 30 ۆت-تان ارتىق جارىق شامدارىن پايدالانۋعا تىيىم سالدى.
سۋ جىلىتۋعا, تاماق پىسىرۋگە, تاعى باسقا نارسەلەرگە ەلەكتر قۋاتىن پايدالانۋشىلار وتە قاتاڭ جازالاناتىن بولدى.
تەك 1940 جىلى عانا قۋاتى جوعارى گەنەراتورلارعا يە بولعاننان كەيىن (قۋاتى 60 كۆت-تان جوعارى) اقمولا قالالىق ەلەكتر ستانساسى وتىرار كوشەسىندەگى 41 ۇيگە (بۇرىنعى – وردجونيكيدزە كوشەسى) كوشتى.
1948 جىلدىڭ قىسىندا ليۋدينوۆسك زاۋىتىنىڭ 150 كۆت گەنەراتورىن ساتىپ العاننان كەيىن جۇمىسقا لوكوموبيل لم-7 قوسىلدى.
ال 1950 جىلى قالالىق ەلەكترستانسانىڭ قۋاتى ودان دا كۇشەيتىلىپ, قالالىق ەلەكتر جەلىسى بولىپ قايتا قۇرىلدى. العاشقى ديرەكتورى بولىپ – ي.ۆ.يلچەنكو, باس ينجەنەرى بولىپ – ب.س.سيزۋحين تاعايىندالدى. 1980 جىلدىڭ 6 تامىزىندا اقمولا قالالىق اۋداندىق ەلەكتر جەلىلەرى كاسىپورنى – «قالالىق ەلەكتر جەلىسى» قۇرىلدى. ال 2010 جىلى كاسىپورىن كومپانيا مارتەبەسىنە يە بولىپ, ايماقتىق دەڭگەيدە قىزمەت كورسەتەتىن «استانا – ايماقتىق ەلەكترجەلىسى كومپانياسى» اق دەپ اتالدى.
