استانا قالاسىنىڭ ەسىل اۋداندىق ءىىب باستىعى سەرىك ءابۋتالىپوۆ ءوزى باسقاراتىن اۋماقتىڭ جاعدايىن بايانداي كەلە, جارتى جىل بويى اتقارعان جۇمىستاردىڭ ەسەبىن بەردى.
بۇگىندە پروفيلاكتيكالىق ەسەپكە اۋدان بويىنشا 140 ادام الىنعان. ۋچاسكەلىك ينسپەكتورلار ولاردى مەكەنجاي بويىنشا ءاردايىم تەكسەرىپ تۇرادى. سونىمەن قاتار, جۋىردا وتكەن رەيد كەزىندە ەسىل اۋدانىندا پاتەرىن جالعا بەرەتىن 550 ادام انىقتالىپ, ونىڭ 328-ءى زاڭدىلىعىن تەكسەرۋ ءۇشىن سالىق ورگاندارىنا ۇسىنىس رەتىندە جولدانعان.
جالپى, 2016 جىلدىڭ جارتى جىلدىعىندا جەرگىلىكتى پوليتسيا قىزمەتكەرلەرىمەن 8 250 اكىمشىلىك ءتارتىپ بۇزۋشىلىق انىقتالعان. ونىڭ ىشىندە ۇساق بۇزۋشىلىقپەن 572 تۇلعا اكىمشىلىك جازاعا تارتىلىپ, 104 تۇلعا اكىمشىلىك قاماۋعا الىنعان ەكەن. تىنىشتىقتى بۇزۋ – 662, قوعامدىق ورىندا سپيرتتىك ىشىمدىك ءىشۋ – 640, بەلگىلەنبەگەن ورىندا تەمەكى شەگۋ – 369, بەلگىلەنبەگەن ورىندا ساۋدا جاساۋ – 179, قالانىڭ اباتتاندىرۋ ەرەجەسىن بۇزۋ– 1919 جانە باسقا دا ءتارتىپ بۇزۋدىڭ 3909 دەرەگى تىركەلگەن. جالپى 34 ملن 603 مىڭ 814 تەڭگە ايىپپۇل سالىنىپ, ونىڭ 17 ملن 129 مىڭ 534 تەڭگەسى وندىرىلگەن.
– ءتارتىپ بۇزۋشىلىق پەن قىلمىس ءجيى بولاتىن كريمينوگەندى جەرلەردە, اتاپ ايتقاندا «پريگورودنىي», «زارەچنىي», «پولەت», «زاپادنىي» اۋداندارىندا اپتا سايىن جەدەل پروفيلاكتيكالىق شارالار جۇرگىزىلۋدە. سونداي-اق, پوليتسيا جاساقتارىن قايتا ورنالاستىرۋ, پاترۋلدىك باعىتتاردا تۇزەتۋ مەن وزگەرىستەر ەنگىزىلۋدە. سونىمەن قاتار, كەلەر جىلى الەم نازارىن اۋداراتىن «ەكسپو-2017» كورمەسىن ءوتكىزۋگە دايىندىق بارىسىندا لايىقتى دەڭگەيدە قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ ماقساتىندا بىرقاتار شارالار جوسپارلى تۇردە جۇزەگە اسىرىلۋدا. وسى باعىتتا اعىمداعى جىلدىڭ ەكىنشى جارتى جىلدىعىندا تۇرعىندار مەن پوليتسيا اراسىندا تىعىز قارىم-قاتىناستى نىعايتۋ ماقساتىندا كوپقاباتتى تۇرعىن ءۇي كەشەندەرىندە, اۋلالاردا تۇرعىندارمەن كەزدەسۋ جيىندارىن وتكىزۋدى جالعاستىرامىز, – دەيدى س.ءابۋتالىپوۆ.
گۇلميرا شارحانقىزى
