استاناداعى ۇلتتىق اكادەميالىق كىتاپحانادا قازاقستان جازۋشىلار وداعىنىڭ مۇشەسى, بەلگىلى قالامگەر ەرعازى راحيموۆتىڭ 80 جىلدىعىنا ارنالعان ادەبي-تانىمدىق كەش ءوتتى.
بۇگىندە ەرعازى راحيموۆتىڭ ەسىمىن كەيىنگى جاس قاۋىم بىلە قويمايدى. ءومىر بويى اياگوز اۋداندىق «العا» گازەتىندە ءتىلشى, ءبولىم مەڭگەرۋشىسى سەكىلدى قىزمەتتەردى اتقارا ءجۇرىپ, العاشىندا جۇرتشىلىققا ليريكالىق ولەڭدەرىمەن تانىلىپ, كەيىن پروزاعا قالام تارتىپ, «ءسۇرى قار», «تەنتەك كەلىن», «تەرىسايرىق» اتتى اڭگىمە-پوۆەستەرىمەن ادەبي قاۋىمدى جالت قاراتقان قالامگەردىڭ شىعارمالارى ءتىلىنىڭ شۇرايلىلىعىمەن, ويلارىنىڭ سونىلىعىمەن ەرەكشەلەنەدى. ونىڭ جۋرناليستيكا سالاسىنا دا سىڭىرگەن ەڭبەگى زور. تالانتتى جازۋشى 1994 جىلى ومىردەن وتكەن.
تاعىلىمدى شاراعا كەلگەن اكادەميك سەيىت قاسقاباسوۆ, پروفەسسورلار سەرىك نەگيموۆ, راحىمجان تۇرىسبەك, قۇنىپيا الپىسباەۆ, قالامگەر تولىمبەك ءابدىرايىم سەكىلدى زيالى قاۋىم وكىلدەرى ءسوز زەرگەرىنىڭ ادامي بولمىسى مەن شىعارمالارى تۋرالى ەستەلىكتەر ءوربىتتى.
«الماتىداعى قازانداي قايناپ جاتقان ادەبي ورتاعا كىرۋ ونىڭ ماڭدايىنا جازىلمادى. ەلدە جاتىپ-اق ەكى جانردا بىردەي بۇرقىراتا جازدى. الايدا گازەتتىڭ كۇندەلىكتى قىم-قۋىت جۇمىسى, تۇرمىس تاۋقىمەتى باۋىرىن ەركىن جازدىرمادى. دەنساۋلىعى دا دىمكاس بولاتىن. اقىرى الىپ تىندى. اقكوڭىل, ەشكىمدى جاتىرقامايتىن, قازاقتىڭ ارعى-بەرگى تاريحىنان حابارى مول, كەشەگى دەگدار شالداردىڭ سارقىتىن ىشكەن ءتىلى قۇنارلى ەرعازى قالامىنان قانشاما دۇنيەلەر تۋدى. اسىرەسە, ونىڭ پروزالىق شىعارمالارىن وقي وتىرىپ, اۋەزوۆتەر قانىپ ىشكەن قازاق ءتىلىنىڭ قاينارىنان سۋسىندايسىڭ. تارباعاتايدىڭ ۇڭعىل-شۇڭعىلىن, ساي-سالاسىن, اڭ-قۇسىن, قاراعان-بۇرگەنىنە دەيىن جان-تانىمەن جىرلاعان, قارا سوزبەن سىرلاعان تاسجارعان تالانت ەدى» دەدى كورنەكتى اقىن, مەملەكەتتىك سىيلىقتىڭ لاۋرەاتى نەسىپبەك ايتۇلى.
شارا اياسىندا ەرعازى راحيموۆتىڭ 80 جىلدىعىنا ارنالعان ءمۇشايرانىڭ قورىتىندىسى جاريالاندى. بۇل بايگەدە باس جۇلدەنى اقىن نۇربول مۇراتبەك جەڭىپ الدى. جالپى, راحيموۆتار اۋلەتىنە ونەر دارىعان. جازۋشىنىڭ تۋعان باۋىرى, كومپوزيتور, تاماشا ءداستۇرلى ءانشى, مارقۇم تۇرسىنعازى راحيموۆتى كوپشىلىك جاقسى بىلەدى. كەشتە تۇرسىنعازى اعامىزدىڭ اندەرى شىرقالىپ, قوس تالانتتى تۇلعا تۋرالى اسەرلى اڭگىمەلەر ايتىلدى.
