سوڭعى كەزدە جاس تا, كارى دە قاسى-كوزىن قالاعانىنشا بوياتىپ, تاتۋاج جاساتۋدى سانگە اينالدىرىپ الدى. سۇلۋ كورىنگىسى كەلەتىن سول حانىمدار تەرىگە ينەمەن سۋرەت سالۋدىڭ ءتاندى ۋلايتىنىنا, ال ونىڭ ءومىر بويى ادام جانىن ازاپقا سالىپ, اۋرۋعا شالدىقتىراتىنىنا ءمان بەرمەيتىنى وكىنىشتى.
بار ۋاقىتىن اينا الدىندا بويانۋمەن وتكىزەتىن بويجەتكەندەر قازىر كوپ قينالمايدى. ءسان سالونىنا بارىپ, ءتيىستى اقشاسىن تولەسە بولدى, ونداعىلار دەنەنىڭ كەز كەلگەن جەرىنە تاتۋاجدىڭ ءتۇر-ءتۇرىن جاساپ بەرەدى. ال, ونىڭ زيانى تۋرالى ەستىگىسى دە كەلمەيتىن جاس قىزدارعا اقىل ايتاتىن اپالارىمىزدىڭ وزدەرى بۇگىندە قاسى-كوزىن سىزدىرتىپ العان.
ماسەلەنىڭ انىق-قانىعىن ءبىلۋ ماقساتىمەن باس قالاداعى «ايدانا» سۇلۋلىق سالونىنا باس سۇقتىق. سالون مەڭگەرۋشىسى اسەمگۇل ەلۋباەۆانىڭ ايتۋىنشا, مۇندا ءارتۇرلى جاستاعى قىز-كەلىنشەكتەر الدىن الا جازىلۋ ارقىلى كەلەدى ەكەن. ولاردىڭ تاڭدايتىن تاتۋاج تۇرلەرى دە سان الۋان. كوپشىلىگى قاسىن, كوزىنىڭ ءۇستىن, ەرنىنىڭ اينالاسىن سىزدىرتۋعا نيەت بىلدىرەدى. دەنەسىنە ينەمەن سۋرەت سالدىرتاتىندار دا جوق ەمەس.
– ونسىز دا قىسقا ومىردە قازىرگى قىزدار ۋاقىتتارىن بويانۋمەن وتكىزگىسى كەلمەيدى. تاڭەرتەڭ جاسالعان ماكياجدىڭ كەشكە دەيىن جارامايتىنى تاعى بار. كۇنىنە ەكى رەت بەتتى ساندەۋگە قانشاما ۋاقىت پەن شىدامدىلىق كەرەك. ءارى ونى ۇيىقتار الدىندا جۋىپ تاستاۋعا ءتيىسسىڭ. وسىنىڭ ءبارى قازىرگى قىزدارعا ۇنامايدى, ولار زامان تالابىنا ساي كورىنگىسى كەلەدى. سونىمەن بىرگە بوياۋدى قايتا-قايتا سۇرتە بەرۋدىڭ سوڭى بەتتىڭ قارتايۋىنا اكەپ سوعادى. ال تاتۋاج جاساتقاننان كەيىن بوياۋ قانشا جۋىنسا دا كەتپەيدى. قىمبات كوسمەتيكاعا اقشا شىعىنداپ, ۇزاقتى كۇن اينا الدىندا وتىرعانشا, ءبىر رەت تاتۋاج جاساتىپ العان دۇرىس دەپ سانايمىن, – دەيدى ءا.ەلۋباەۆا.
ارينە, ايەل ادامنىڭ وزىنە كوڭىل بولگەنى, كۇتىنىپ جۇرگەنى دۇرىس. سول ءۇشىن قىز-كەلىنشەكتەر, ءتىپتى, ەگدە جاستاعى ايەلدەردىڭ دە مانيكيۋر, پەديكيۋر جاساتۋى, SPA سالوندارعا, ماسساجعا, ترەناجەر زالدارىنا, شاشتارازعا بارۋىن قۇپتايمىز, ارينە. دەي تۇرساق تا, ماماندار كوز بەن ەرىننىڭ ماڭايى – وتە سەزىمتال نۇكتەلەرگە تولى ەكەنىن, ول جەرلەردى ينەمەن تەسىپ, بوياۋ ەندىرۋ, ارينە, وڭاي شارۋا ەمەستىگىن, ال تاتۋاج ارقىلى ءارتۇرلى جۇقپالى اۋىر دەرتتەر, اتاپ ايتساق, گەپاتيت, سپيد جانە ت.ب. تەرى اۋرۋلارىن جۇقتىرۋ ىقتيمالدىعى جوعارى ەكەنىن ەسكەرتەدى. جالپى, تاتۋيروۆكا مەن تاتۋاجدىڭ زارداپتارى اراعا ۋاقىت سالىپ, ءتىپتى, ون جىلدان سوڭ بەلگى بەرە باستايتىنىن دالەلدەگەن عالىمدار تەرىسى سەزىمتال, دەنەسىندە قالى بار ادامداردىڭ وعان جولاماۋى تۋرالى ايتىپ تا, جازىپ تا جاتقانىنا قاراماستان, ودان باس تارتۋشىلار قاتارى ازايماي تۇر. كەرىسىنشە, سۇلۋلىق سالوندارىنداعى كەزەك كەمىر ەمەس.
سالونعا كەلۋشىلەر قاتارى سايابىرسىمادى. ءبىرى كەلىپ, قاسىن سىزدىرتسا, ەكىنشىلەرى ەرنىن ۇلكەيتىپ الەك. اقبوتا ەسىمدى بويجەتكەندى سوزگە تارتتىم. مۇندا ەكىنشى رەت كەلىپ وتىرعان ول تاتۋاج جاساۋشى ماماننىڭ تاجىريبەسى مول بولسا, ءبارىن دە ويىڭداعىداي ەتىپ جاساتۋعا بولاتىنىن ايتتى. «قاسىم مۇلدە كورىنبەيتىن, ونى ۇنەمى قارىنداشپەن سىزىپ وتىرۋىما تۋرا كەلەتىن. وسىدان ەكى اي بۇرىن تاتۋاج جاساتىپ الدىم. قازىرگى الپەتىم وزىمە ۇنايدى. ەندى كوزىمنىڭ اينالاسىن سىزدىرتىپ الۋ ءۇشىن كەلىپ وتىرمىن» دەدى ول.
قۇربىلارىنان قالماۋ ءۇشىن قاسىن قولدان قيعاشتاتىپ الىپ, وكىنىپ جۇرگەندەر دە بار ەكەن. ايدا – سولاردىڭ ءبىرى. ول ءساتسىز بويالعان تاتۋاجىن وشىرتۋگە كەلىپتى. بۇل ءۇشىن قازىر لازەرلىك ساۋلەلەر جانە فوتوتەراپيالىق قۇرىلعىلار پايدالانىلاتىنىن العا تارتقان سالون مەڭگەرۋشىسى تەرى استىنداعى بوياۋدى كۇيدىرىپ الىپ تاستاۋ تاتۋاجدى ينەمەن تەسىپ جاساعاننان اۋىرىراق ەكەنىن
ايتتى. «بىراق, قازىرگى قىزدار سۇلۋ كورىنۋ ءۇشىن ەشتەڭەدەن دە قورىقپايدى, شىدايدى دەدى ول ءسال جىميىپ. دەگەنمەن, لازەرلىك ساۋلەلەردىڭ دە وزىندىك زياندى جاقتارىن ەسكەرسەك, تەرىنى زاقىمدار الدىندا اسىقپاي ويلانىپ العان ءجون-اۋ.
تانگە تۇسكەن جازبالار ازىپ-توزۋدىڭ, ازعىندالۋدىڭ بەلگىسى ەكەنىن تۇيسىنبەيتىنىمىز قالاي؟! ەرتەدە كەيبىر ەجەلگى تايپالاردا قىلمىسكەردى جازالاۋ, ماسقارالاۋ ءۇشىن دەنەسىنە سۋرەت سالاتىن بولعان. سونداي-اق, تۇرمەگە وتىرعان قىلمىسكەرلەردىڭ دەنەسىنە, نە بەتىنە تاتۋيروۆكا سالىناتىنى بەلگىلى. ال, يسلام دىنىندە اللانىڭ بەرگەن دەنەسىن ءبۇلدىرىپ, تانگە سۋرەت سالۋ حارام سانالادى. ەندەشە, ءبىر ءسات نەگە ويلانبايمىز؟
جاساندىنىڭ ءبارى الدامشى. اسىلى, تابيعي سۇلۋلىققا تەڭ كەلەر نە بار دەيسىز. سوندىقتان, ءسان قۋماي, ءتان تازالىعىنا ءمان بەرەيىكشى ءبىر ءسات.
گۇلبارشىن وكەشقىزى
